Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 68

Mwanā Leza​—“Kitōkeji kya Ino Ntanda”

Mwanā Leza​—“Kitōkeji kya Ino Ntanda”

YOANO 8:12-36

  • YESU WASHINTULULA MWIKADILE MWANA

  • LELO BAYUDA I BAPIKA BA MUSWELO’KA?

Mu difuku dya busamba-bubidi, dine dya mfulo dya Masobo a Tabenakulo, Yesu wafundija mu kipindi kya tempelo kitwa bu “kilambwilo.” (Yoano 8:20; Luka 21:1) Bimweka padi i mu Kipango kya Bana-Bakaji, mutūla bantu byamulambu byabo.

Bufuku mu kitatyi kya masobo, mu kino kipindi kya tempelo mwikalanga kitōkeji tō. Mwanda mudi bitūlwa binanu biná bikatampe, kimo ne kimo kidi na masāni aná makatampe mayule māni. Kitōkeji kitamba ku ano malampi i kikatampe kimunika ne kufula kufula kulampe. Byobya byanena Yesu padi bibavuluja bevwaniki bandi bino bintu: “Ami ne kitōkeji kya ino ntanda. Yewa ense unonda kakanangepo mu mfindi nansha dimo, inoko ukekala na kitōkeji kya būmi.”​—Yoano 8:12.

Bafadiseo abapatanya binenwa bya Yesu na kunena’mba: “Usapulanga bukamoni pa mwanda wa abe mwine.” Yesu walondolola’mba: “Nansha shi nsapulanga bukamoni pa mwanda wa ami mwine, bukamoni bwami i bwa bine, mwanda ndyukile kontambile ne koñenda. Ino banwe kemuyukilepo kontambile ne koñenda kwine.” Wabweja’ko amba: “I kilembwe mu Bijila byenu amba: ‘Bukamoni bwa bantu babidi i bwa bine.’ Ami ne umo usapula bukamoni pa mwanda wami, kadi Tata untumine nandi usapulanga bukamoni pa mwanda wami.”​—Yoano 8:13-18.

Bafadiseo pa kupela milangwe yandi abamwipangula amba: “Le Shobe udi kwepi?” Yesu webalondolola pampikwa kafinda amba: “Kemundyukilepo ami nansha Tata mwine. Shi mwadi mundyukile, mwadi ba kuyuka ne Tata.” (Yoano 8:19) Nansha nankyo Bafadiseo basaka’nka kukwata Yesu, ino kutupu usomonwa kumutenga.

Yesu wapituluka binenwa byaanenanga kala amba: “Ami ñendanga, kadi mukankimbanga, ino banwe mukafwila mu bubi bwenu. Kokwa ko ñenda, banwe kemukokejapo kwiya’ko.” Bayuda abaivwana bibi binenwa bya Yesu kebeipangula’mba: “Le aye usa kwiipaya’ni? Mwanda yeu unena’mba, ‘Kokwa koñenda, banwe kemukokejapo kwiya’ko.’ ” Kebevwanijepo bisaka kunena Yesu, mwanda kebayukilepo kwatambile. Webashintulwila’mba: “Banwe mwi ba pano panshi; ami ne wa kokwa kūlu. Banwe mwi ba ino ntanda; ami nkidipo wa ino ntanda.”​—Yoano 8:21-23.

Yesu wisambilanga pa būmi bwandi momwa mūlu kumeso kwa kwiya pano pa nshi ne pa kwikala kwandi bu Meshiasa wālailwe, nansha Kidishitu, mwine ufwaninwe kutengelwa na bano bendeji ba bipwilo. Nansha nankyo, abamwipangula na kafutululo amba: “Abe wi ani?”​—Yoano 8:25.

Pa kumona byobamupela ne kumupangapanga, Yesu walondolola’mba: “Le kyonesambila bidi nenu kine i kika?” Kadi wakokela milangwe padi Shandi na kushintulwila Bayuda kine kyobafwaninwe kutejeja Mwana amba: “Yewa wantumine i wa bine, kadi byobya bine byonaivwene kwadi e byonesamba mu ino ntanda.”​—Yoano 8:25, 26.

Kupwa Yesu walombola kikulupiji kyakulupile Shandi, kine kekidipo na Bayuda amba: “Pomusa kupwa kutulula Mwanā muntu e pomusa kuyuka’mba ami ye aye ne amba nkiloñangapo nansha kimo na milangwe ya ami mwine; ino monka mwaunfudijije Tata, ye monesambila bino bintu. Kadi Yewa wantumine udi nami; kandekelepo bunka bwami, mwanda noñanga kyaba kyonso bimusangaja.”​—Yoano 8:28, 29.

Ino Bayuda bamo kebetabijepo mudi Yesu, nandi webanena’mba: “Shi mwikale mu mwanda wami, nabya mwi bami bana ba bwanga binebine, kadi mukayuka bubine, bubine nabo bukemupa bwanapabo.”​—Yoano 8:31, 32.

Bamo abamone uno mwanda wa bwanapabo bu ungi. Abanena’mba: “Batwe twi lutundu lwa Abalahama kadi kashā ketwaikele bapika ba muntu nansha umo. I namani unena’mba, ‘Mukekala banapabo’?” Bayuda bayukile amba kudi kyaba kimo kyobamuninwe bupika, ino abapele kwitwa bu bapika. Yesu walombola patōka’mba bakidi bapika, wanena’mba: “I binebine nemulombola’mba, ense ulonga bubi i umpika wa bubi.”​—Yoano 8:33, 34.

Bayuda byobapela amba ke bapikapo ba bubi, abetūla mu kyaka. Yesu washintulula’mba: “Umpika kekalangapo nyeke mu njibo; mwana ye wikalanga’mo nyeke.” (Yoano 8:35) Mwanda umpika kadipo na lupusa lwa kupyana kintu, ubwanya kupangwa kitatyi kyo-kyonso. Poso’nka mwana ubutwidilwe mwinjibo nansha ulelelwe’mo ye ukashala’mo “nyeke,” ko kunena’mba, mu būmi bwandi bonso.

Nanshi bubine butala padi Mwana bo bupa bantu bwanapabo bwa nyeke ku bubi bwa lufu. Yesu wanena’mba: “Shi Mwana wemupe bwanapabo, nankyo mukekala bine banapabo.”​—Yoano 8:36.