Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 66

Watanwa ku Masobo a Tabenakulo mu Yelusalema

Watanwa ku Masobo a Tabenakulo mu Yelusalema

YOANO 7:11-32

  • YESU WAFUNDIJA MU TEMPELO

Yesu wayukana bininge tamba mwaka waabatyijibwe. Bayuda bavule ke bamone bingelengele byandi, ne kwivwana myanda ya mwingilo wandi wasapulwa konso konso mu ntanda’ya. Pano kudi bavule bamukimba ku Masobo a Tabenakulo (a Bitanda) mu Yelusalema.

Bantu bamwene Yesu mu miswelo mishileshile. Bamo banenanga’mba “I muntu muyampe.” Bakwabo nabo amba: “Aa. Ongolanga kibumbo.” (Yoano 7:12) Kubaikala miuningo mivule ku mafuku a ñanjilo a kitango. I kutupu muntu wisamba patōkelela myanda ya Yesu mwanda bantu badi batyina bininge bendeji ba Bayuda.

Yesu wafika ku tempelo masobo ke mashilule. Bantu bavule abatendela mufundijijo wandi. Kafundilepo nansha dimo masomo a balabi, o mwanda Bayuda kebeipangula’mba: “Le uno muntu uyukile namani Bisonekwa, aye muntu kafundilepo ku masomo?”​—Yoano 7:15.

Yesu washintulula’mba, “Byomfundija ke byamipo, aa, ino i bya yewa wantumine. Shi muntu usaka kulonga kiswa-mutyima Kyandi, ukayuka shi byomfundija i bya kwa Leza nansha shi nesambanga bya ami mwine.” (Yoano 7:16, 17) Yesu ufundijanga mungya Bijila bya Leza, o mwanda i bimweke patōka’mba kakimbangapo ntumbo yandi, ino ya Leza.

Kupwa Yesu wanena’mba: “Mosesa wēmupele Bijila, mwene i amo? Inoko i kutupu muntu momudi’mo ukōkele Bijila. Mwanda waka mukimba kungipaya?” Bantu bamo mu kibumbo, padi bantu batambile panja pa kibundi, kebayukilepo uno mwanda. Bibebakomena kwitabija, muntu epaye mufundiji pamo bwa Yesu. Abamone amba kudi kintu kekyendekapo mu mutwe wa Yesu pa kunena namino. Abamunena’mba, “Abe udi na ndemona. Le ukimba kukwipaya i ani?”​—Yoano 7:19, 20.

Pabapite ke mwaka umo ne kipindi na pasakile Bayuda kwipaya Yesu kitatyi kyaabelwile muntu mu dya Sabato. Pano Yesu waingidija mulangwe uloba tudi mu kanwa mwanda wa kulombola kubulwa ñeni kwabo. Webavuluja binena Bijila amba mwana ufwaninwe kutwejibwa kwisao mu difuku dya mwānda nansha shi i dya Sabato. Kupwa waipangula’mba: “Shi muntu utwejibwanga kwisao mu dya sabato kutyina’mba Bijila bya Mosesa byakajilulwa, le mubandobela bya mwiko mwanda’po’tu nakomeje muntu nkē mu dya sabato? Lekai kutyiba mambo na kulonda mumwekelo wa panja, ino tyibai mambo na boloke.”​—Yoano 7:23, 24.

Bekadi ba mu Yelusalema bayukile uno mwanda abanena’mba: “Mwene uno’u ye muntu obakimba kwipaya [kudi bendeji]? Ino talai! yeu wisamba pa bantu, kadi abo kumunena kintu mpika. Le baledi abayuka’mba bine uno’u ye Kidishitu’ni?” Penepa mwanda waka bantu bapela kwitabija’mba Yesu i Kidishitu? Abanena’mba: “Batwe’ko tuyukile kutambile uno muntu; ino shi Kidishitu waiya, i kutupu ukayuka kwatambile.”​—Yoano 7:25-27.

Yesu walondolola’nka padi ku tempelo amba: “Mundyukile kadi muyukile ne kontambile. Ne kadi nkiidilepo ami mwine, aa, ino Yewa wantumine i wa bine, kadi banwe kemumuyukilepo. Ami muyukile, mwanda ne mwimaniji utambile kwadi, kadi Aye ye wantumine.” (Yoano 7:28, 29) Yesu pa kulondolola namino patōkelela, kebakimbe kumukwata bamukute nansha kumwipaya. Inoko, abakomenwa mwanda kitatyi kyandi kya kufwa kekyabwene.

Inoko bavule abaitabija mudi Yesu. Walandele pa mema, wataleje kivula, wadisha tununu  ne tununu mu kingelengele na tumikate tutyetye ne twita, wabelwile babela, balemane ke banange, waputwile meso a bampofu, wabelwile ba makopo, enka ne kusangula bafwe. Bine, badi na bubinga bwa kwipangwila’mba: “Pakāya Kidishitu, le ukalonga biyukeno bivule kutabuka bilonga uno muntu?”​—Yoano 7:31.

Bafadiseo ne babitobo bakulu pa kwivwana kibumbo ke kinena bino bintu, abatume basola kukakwata Yesu.