Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 73

Mwine Samadia Welombola bu Mukwabo wa Bine

Mwine Samadia Welombola bu Mukwabo wa Bine

LUKA 10:25-37

  • MWA KUPYANINA BŪMI BWA NYEKE

  • MUKWABO MWINE SAMADIA

Yesu udi kubwipi na Yelusalema, Bayuda bamo abamufwena. Bamo bakimba kufundijibwa nandi ino bakwabo nabo bakimba kumutompa. Umo mobadi ujingulwile Bijila wamwipangula’mba: “A Mufundiji, le mfwaninwe kulonga bika nkapyane būmi bwa nyeke?”​—Luka 10:25.

Yesu wajingulula’mba uno muntu kepangulangapo mwanda wa kuyuka. Ukimba Yesu alondolole mu muswelo ulobeja Bayuda. Yesu wajingulula’mba uno muntu udi kala na mumweno wandi. Walondolola bya tunangu mu muswelo usokala bilanga uno muntu.

Yesu wamwipangula’mba: “Le i bika bilembelwe mu Bijila? Le abe utañanga namani?” Uno muntu ufundile Bijila bya Leza, walondolola monka mobinenena. Watela myanda idi mu Kupituluka 6:5 ne mu Levi 19:18, kanena’mba: “‘Sanswa Yehova Leza obe na mutyima obe onso, na muya obe onso, na bukomo bobe bonso, ne na ñeni yobe yonso’ ne ‘mukwenu mowisanshilwe abe mwine.’” (Luka 10:26, 27) Le kino kyo kilondololwa?

Yesu wasapwila muntu amba: “Ubalondolola bya bine; longa nyeke namino nabya ukamona būmi.” Ino le mīsambo ibapwila papo? Uno muntu kasakilepo’nka kilondololwa kya bine kete; “ukimba kwilombola bu moloke,” bamulombole amba byalanga byo abyo nabya bibingije ne byalongelanga bakwabo. O mwanda waipangula’mba: “Lelo mukwetu mwine i ani?” (Luka 10:28, 29) Mu kino kipangujo kimweka bu kipēla mudi myanda mingi mifyame. Namani?

Bayuda bayukile amba kishima “mukwetu” kifunkila pa boba bonso balama bisela bya Bayuda, kadi muntu keje kumona’mba Levi 19:18 ukwatakanya uno mulangwe. Bayuda bafwatakanga’mba i ‘kijidikwe’ kupwana na muntu ke Muyudapo. (Bilongwa 10:28) O mwanda padi uno muntu enka ne bana ba bwanga bamo ba Yesu bemonanga bu boloke pobalongela Muyuda mukwabo bintu biyampe. Ino shi ke Muyudapo, bapela kumulongela biyampe; amba mwanda kadipo “mukwetu.”

Le Yesu walemununa namani uno mumweno pampikwa kusanshija uno muntu ne Bayuda bakwabo? Walondolola na kusekununa mwanda kampanda amba: “Kwadi muntu umo wadi utamba ku Yelusalema utūkila ku Yediko, ino wapona mu makasa a batubwalāla bamuyete byonso byaadi nabyo ne kumukupila, kupwa baenda bamushiya mupungile.” Yesu wabweja’ko amba: “Mu kitulumukila, kitobo umo wadi utūkila mu dyodya dishinda, ino pa kumumona, wapityila mutamba mukwabo. Ne mwine Levi nandi mo monka, aye pa kufika pa kifuko’kya wamumona, wapityila mutamba mukwabo. Ino mwine Samadia umo wadi wenda mu dyodya dishinda wafika pādi, aye pa kumumona, wamukwatyilwa lusa.”​—Luka 10:30-33.

Muntu obasekunwina mwanda kudi Yesu uyukile amba babitobo bavule ne bakwashi ba bene Levi ba ku tempelo bashikatanga ku Yediko. Pa kutamba ku tempelo kebajoka, bendanga kintu kya makilometele 23. Dino dishinda didi kyaka, dinangilanga’mo bangivi. Shi kitobo ne mwine Levi abatana Muyuda mu malwa, le babulwe’po kumukwasha? Mu ino nsekununi, Yesu wanena’mba kebamukweshepo. Ino wamukweshe i mwine Samadia, wa mu bantu bafutululwa na Bayuda.​—Yoano 8:48.

Le mwine Samadia wakwasha Muyuda mutapwe bilonda namani? Yesu unena’mba: “Wamufwena, wamukuta bilonda ne kumupungulwila’po māni ne vinyu. Kupwa wamukandija pa nyema wandi wakamutwala ku njibo ya beni ne kumulela. Difuku dilonda’ko, wayata ndenadi ibidi, wapa’yo mulami wa njibo ya beni, wamunena’mba: ‘Mulele, kadi byonso byowakalupula kupita pa ino, nsa kukwalwija’byo shi najoka.’”​—Luka 10:34, 35.

 Yesu, Mufundiji Mukatampe pa kupwa kusekununa ino mānga, waipangula muntu’wa kipangujo kiloba tudi mu kanwa’mba: “Lelo momwena pa bano basatu i ani welombwele bu mukwabo na yewa waponene mu makasa a batubwalāla’wa?” Padi uno muntu wakolelwa pa kutela amba i “mwine Samadia,” o mwanda walondolola’mba: “I yewa wamulongēle bya lusa.” Ebiya Yesu walombola ñeni iboilwa’ko idi padi tō amba: “Enda, nobe ukalonge’nka nankyo.”​—Luka 10:36, 37.

Ano shao o manwa mayampe a mwa kufundijija! Le shi Yesu wanenene’tu amba ne bantu ke Bayudapo nabo i bakwabo, le uno muntu ne Bayuda badi bamuteja, badi ba kwitabija’o? Padi badi ba kupela. Ino byawasekuna mwanda kampanda, ne kwingidija myanda ijingulwile bevwaniki, papo kilondololwa kibaikala’tu patōka ku kipangujo kya amba, “Lelo mukwetu mwine i ani?” Muntu welombola bu mukwabo wa binebine i yewa walombola buswe ne kanye byotulombelwe mu Bisonekwa.