Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 78

Kalama Mukōkele, Wilongolole Nyeke!

Kalama Mukōkele, Wilongolole Nyeke!

LUKA 12:35-59

  • KALAMA KUKŌKELE UFWANINWE KWIKALA MWILONGOLOLE NYEKE

  • YESU WAIYA KUKALAÑANYA

Yesu wanenene amba i enka “kaluombe katyetye” kakatambula kyepelo kyako mu Bulopwe bwa mūlu. (Luka 12:32) Ino kutambula ino mpalo milumbuluke ke mwandapo wa kukwatyila ku nsongo ya minwe. Na bubine, walombola mvubu ya kwikadila na mumweno muyampe pa kubadilwa mu Bulopwe.

Ino, Yesu wadyumuna bandi bana ba bwanga amba bekale batengele pa kujoka kwandi. Wanena’mba: “Ikalai bavwale kadi belongolole ne binanu byenu nabyo bikale byake, kadi ikalai bwa bantu batengele mfumwabo ujoka ku butundaile amba shi wafika kakokola, bamushitwile ponka na ponka. I ba katōkwe boba bapika shi mfumwabo pa kwiya webatana bakesha!”​—Luka 12:35-37.

Bana ba bwanga bevwanije senene uno mumweno kupityila ku kyelekejo kya Yesu. Bengidi baatela i belongolole, batengele kujoka kwa mfumwabo. Yesu washintulula’mba: “Kadi shi [mfumwenu] waiya mu kilo kya bubidi, nansha ke mu kya busatu [lubanga], webatana namino, i ba katōkwe!”​—Luka 12:38.

Bino bilomba bivule kupita’ko’tu kusapula na bukankamane ku njibo ne njibo nansha kwikala bengidi bitupu. Kino i kimwekele patōka mu muswelo washintulula’kyo Yesu, Mwanā muntu, mu kyelekejo. Wasapwila bandi bana ba bwanga amba: “Banwe nenu, mwilongololei nyeke, mwanda Mwanā muntu wiyanga pa nsá yokemulangidijapo.” (Luka 12:40) Nanshi Yesu usa kwiya monka. Usaka balondi bandi​—nakampata ba “kaluombe katyetye”​—belongolole nyeke.

Petelo byasaka kwivwanija senene waipangula Yesu amba: “A Mfumwetu, le i’nka batwe bonena kino kyelekejo’ni nansha i ne bonso?” Yesu pa kyaba kya kulondolola Petelo, washilula bidi na kushintulula kyelekejo amba: “Na bubine, i ani le kalama mukōkele, mudyumuke, ukatongwa na mfumwandi kulama kitango kyandi kya bengidi amba ebape nyeke kipimo kyabo kya byakudya pa kitatyi kifwaninwe? I wa katōkwe yao umpika shi mfumwandi pa kwiya amutane ulonga namino! Nemulombola bya binebine amba, ukamutonga kulama bintu byandi byonsololo.”​—Luka 12:41-44.

Mu kyelekejo kibajinji, “mfumwandi” ufunkila padi Yesu, Mwanā muntu. Mungya buluji, uno “kalama mukōkele” ubadilwa mu “kaluombe katyetye” kadi ukapebwa Bulopwe. (Luka 12:32) Yesu wanena pano amba bantu bamo ba mu kano kabumbo bakapebwa kulama “kitango kyandi kya bengidi” na kwibapa “kipimo kyabo kya byakudya pa kitatyi kifwaninwe.” Petelo ne bana ba bwanga bafundijibwa ne kudishibwa na Yesu ku mushipiditu abamone amba nanshi kumeso’ku kudi difuku dikāya Mwanā muntu. Mu kitatyi’kya, kukekala mpangiko ya kudisha ku mushipiditu balondi ba Yesu, ke “kitango . . . kya bengidi” ba Mfumwabo kadi.

Yesu wakomeneja mu muswelo mukwabo amba bana ba bwanga bafwaninwe kudyumuka ne kuta mutyima ku mwikadila wabo. Mwanda i kipēla kuzoza ne kushilula kulwa na balondi bakwabo, wanena’mba: “Ino shi yewa umpika anene mu mutyima wandi amba, ‘Mfumwami waije kwiya,’ ashilule kukupila bengidi bana-balume ne bana-bakaji, kudya, kutoma ne kukolwa, mfumwandya yao umpika ukāya mu difuku dyakamutengelepo ne mu nsá yakayukilepo, kadi ukamupa mfuto na bulobo bya malwa ne kumupa kyepelo kyandi kumo na bampikwa kikōkeji.”​—Luka 12:45, 46.

Yesu wanena’mba i mwiye “kwakija mudilo pano pa ntanda.” I mukolomone mwanda ulengeja nkalañani ne kusōka mfundijo ne bisela bya bubela. Kadi usansanyanga bantu badi  bafwaninwe kupwana, ukalañanya “shandi na mwana mwana-mulume ne mwana mwana-mulume na shandi, inandi na mwana mwana-mukaji ne mwana mwana-mukaji na inandi, inandi muko na muko mwana-mukaji ne muko mwana-mukaji nandi na inandi muko.”​—Luka 12:49, 53.

Bino binenwa bitala nakampata bandi bana ba bwanga. Ino pano Yesu kaesambe na bibumbo. Bantu bavule i bapele kwitabija bukamoni bulombola’mba i Meshiasa, o mwanda webalombola’mba: “Pomumonanga makumbi akanda kushika, mwikalanga munena ponka na ponka’mba, ‘Kusa kwiya kimpumpu,’ nakyo kyaiya. Kadi pomumonanga kivula kya kunshi kipukuma, munenanga’mba, ‘Kusa kwikala dyekese,’ nadyo dyaikala’ko. Banwe banzazangi, muyukile mwa kubandawila mumwekelo wa ntanda ne diulu, ino mwanda waka kemuyukilepo mwa kubandawila kino kitatyi’ki?” (Luka 12:54-56) Na bubine kebelongolwelepo.