Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 137

Bavule Abamumone Kumeso kwa Pentekosa

Bavule Abamumone Kumeso kwa Pentekosa

MATEO 28:16-20 LUKA 24:50-52 BILONGWA 1:1-12; 2:1-4

  • YESU WAMWEKELA BANTU BAVULE

  • WAKANDA MŪLU

  • YESU WAPUNGULULA MUSHIPIDITU UJILA PA BANA BA BWANGA 120

Yesu pa kupwa kusanguka wakwata mulangwe wa kwitana na batumibwa bandi 11 pa lūlu lwa Ngadilea. Padi ne bana ba bwanga bakwabo, kintu kya bantu 500, bamo baikele bidi kutatana. (Mateo 28:17; 1 Kodinda 15:6) Ino byobya byanena Yesu pano bibebakwasha bakulupile amba bine i mūmi.

Yesu walombola’mba Leza i mumupe lupusa lonso mūlu ne panshi. Webasoñanya’mba: “Nanshi, endai mukalonge bana ba bwanga mu bantu ba ku mizo yonso, mwibabatyijei mu dijina dya Tata ne dya Mwana ne dya mushipiditu ujila, mwibafundijei kulama byonso byonemusoñenye.” (Mateo 28:18-20) Bine Yesu i mūmi, ino kadi utele mutyima ku mwingilo wa busapudi bwa myanda miyampe.

Balondi bonso ba Yesu​—bana-balume, bana-bakaji, ne bana​—abapebwa mwingilo umo onka wa kulonga bana ba bwanga. Balwana bakalonga bukomo bwa kwibakankaja kusapula ne kufundija, ino Yesu webakulupija’mba: “Lupusa lonso napebwa’lo mūlu ne pano panshi pene.” Le kino kishintulula bika kudi balondi bandi? Webasapwila’mba: “Talai! Ami ngidi nenu mafuku onso kufika ne ku mvuyo ya ngikadilo ya bintu.” Yesu kanenenepo amba boba bonso basapula myanda miyampe bakabwanya kulonga bingelengele. Inoko bakakwashibwa na mushipiditu ujila.

Yesu wamwekela ku bandi bana ba bwanga mu bula bwa “mafuku makumi 40” tamba usangulwa. Wavwala divule dine umbidi wa bu muntu kadi “welombwele mūmi kobadi na bukamoni buvule bumweke,” ne kwibasapwila “myanda ya Bulopwe bwa Leza.”​—Bilongwa 1:3; 1 Kodinda 15:7.

Mobimwekela batumibwa bakidi mu Ngadilea pebasoñanya Yesu bajokele ku Yelusalema. Aye pa kwitana nabo mu kibundi, wanena’mba: “Kemwakitalukai mu Yelusalema, ino ilaijai’nka kwilaija kyokya kyemulaile Tata, kyomwaivwene kondi; mwanda Yoano, shako, wadi ubatyija na mema, ino kepakapitepo mafuku mangi, banwe mukabatyijibwa na mushipiditu ujila.”​—Bilongwa 1:4, 5.

Kitatyi kityetye kadi Yesu wetana monka na batumibwa bandi. Webatwala “panja kufika ne ku Betani,” kibundi kidi ku matelo a kutunduka kwa Lūlu lwa Impafu. (Luka 24:50) Nansha Yesu byakadi mwibasapwile bintu byonso bitala pa lwendo lwandi, abo bakikulupile amba Bulopwe busa kwikala pano panshi.​—Luka 22:16, 18, 30; Yoano 14:2, 3.

Batumibwa abaipangula Yesu amba: “A Mfumwetu, le koaluja bulopwe ku Isalela kino kitatyi?” Nandi webanena’tu amba: “Ke kyenupo kya kuyuka bitatyi nansha byaba bitūdile Tata mu buludiki bwandi aye mwine.” Ino wakomeneja monka mwingilo obafwaninwe kwingila’mba: “Mukatambula bukomo pakāya mushipiditu ujila pomudi, kadi mukekala bami batumoni mu Yelusalema, mu Yudea ne mu Samadia monso, ne kulakula kwine kwa ntanda.”​—Bilongwa 1:6-8.

Batumibwa badi pa Lūlu lwa Impafu na Yesu musanguke paashilula kukanda mūlu. Kepejije makumbi amupūta kebakimumwene. Yesu pa kusanguka, wadi uvwala umbidi wa bu muntu. Ino pano Yesu wavūla umbidi waadi nao, wakanda mūlu bu kipangwa kya ku mushipiditu. (1 Kodinda 15:44, 50; 1 Petelo 3:18) Batumibwa ba kikōkeji pobakibandila mwaenda, “bana-balume babidi bavwele bivwalwa bitōka tō” abebamwekela kebemene nabo. Bano i bamwikeulu bavwele ngitu ya bu muntu, abaipangula’mba: “A bana-balume ba mu Ngadilea, i bika byomwimanine mutala mūlu sō? Uno Yesu wemutekwinwa mūlu ukāyanga muswelo umo enka momwamumwena wenda mūlu.”​—Bilongwa 1:10, 11.

Yesu katalukilepo pano pa ntanda na byungwe ne bintyila, ino bamumona, i enka balondi bandi ba kikōkeji kete. Ukajokanga “muswelo umo” —kwa kubulwa byungwe ne bintyila, kadi i enka balondi bandi ba kikōkeji bo bakayuka kwikala’po kwandi bu Mulopwe mubikikwe.

Batumibwa abajokela ku Yelusalema. Mu mafuku alonda’po, abebunge pamo ne bana ba bwanga bakwabo, kubadila’mo “ne Madia inandya Yesu ne banababo.” (Bilongwa 1:14) Kino kisumpi kitakamene na kulombela. Mwanda umo obalombela’po i mwa kutongela mwanā bwanga mukwabo wa kupingakana Yudasa Isakadiota nabya batumibwa bekale monka 12. (Mateo 19:28) Bakimbanga mwanā bwanga wemwenine mingilo ya Yesu ne lusangukilo lwandi. Pa kuyuka kiswa-mutyima kya Leza abate bubale, kadi uno o musunsa wa mfulo obutelelwe mu Bible. (Ñimbo ya Mitōto 109:8; Nkindi 16:33) Matyiasa, padi i wa mu ba 70 batuminwe na Yesu ye watongwa kadi “wabadilwa pamo na batumibwa 11.”​—Bilongwa 1:26.

Mafuku dikumi pa kupita’po tamba Yesu ukanda mūlu, kubalongwa Masobo a Bayuda a Pentekosa mu 33 Yesu ke mwiye. Bana ba bwanga 120 abebungila pamo mu Yelusalema mu kyumba kya pangala. Na pano kala, kubaikala lunwa lukatampe pamo bwa kivula kikatampe kyayula mu njibo yonso. Ndimi na ya mudilo ibamweka pa muntu ne muntu udi’mo. Bana ba bwanga bonso abashilula kwisamba ndimi mishileshile. Kuno ko kupungululwa kwa mushipiditu ujila kwebalaile Yesu!​—Yoano 14:26.