Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 58

Wavudija Mikate ne Kudyumuna Bantu ku Kiyujo

Wavudija Mikate ne Kudyumuna Bantu ku Kiyujo

MATEO 15:32–16:12 MAKO 8:1-21

  • YESU WADISHA BANA-BALUME 4 000

  • WADYUMUNA BANTU KU KIYUJO KYA BAFADISEO

Bibumbo bikatampe bibatūtyikila kudi Yesu mu ntanda ya Dekapodi, kutunduka kwa Dijiba dya Ngadilea. Abaiya kumwivwana ne kubelulwa, baselele bidibwa mu bilala, ne mu bisaku.

Inoko, kitatyi pa kupita’po, Yesu wasapwila bana bandi ba bwanga amba: “Nakwatyilwa kibumbo lusa mwanda abaikala nami ke mafuku asatu, ino kebadipo na kintu kya kudya. Shi nebanene bende kwabo na nzala, nabya basa kupona mpanga mwishinda, kadi bamobamo i batambe kulampe.” Ino bandi bana ba bwanga abamwipangula’mba: “Le kuno kufula namino muntu ukokeja kusokola kwepi mikate ibwanya kwikuta bano bantu?”​—Mako 8:2-4.

Yesu waipangula’mba: “Le mudi na mikate inga?” Bana ba bwanga amba: “Isamba-ibidi, ne twita twa lui tutyetye.” (Mateo 15:34) Penepo Yesu wanena bantu bashikate pa nshi. Wayata mikate ne twita twa lui, walombe Leza, wape’byo bana ba bwanga babile’byo bantu. Na bya kutulumukwa, bonso abadī ne kwikuta. Nansha byobadi kintu kya bana-balume 4 000, kutyanga’po bana-bakaji ne bana, ino abadī kadi pabashala ne bilala bisamba-bibidi bikatampe biyule bā!

Yesu pa kupwa kulundula kibumbo, aye ne bandi bana ba bwanga abaenda lwa bwato ku Makadala, kushika kwa Dijiba dya Ngadilea. Kwine’kwa, Bafadiseo bamo ne Basadusea kebatompa na kumulomba alete kiyukeno kya mūlu.

Yesu pa kujingulula kine kyobepangwila, walondolola’mba: “Shi kyolwa kibaoloba, munenanga’mba, ‘Kusa kwikala biyampe, mwanda kūlu kubatyile pyā,’ lubanga nalo amba, ‘Kusa kwikala mashika, ne mvula dyalelo, mwanda kūlu kubatyile pyā ino ako’ko makumbi fututu.’ Muyukile’ko kushintulula mumwekelo wa kūlu, ino biyukeno bya bitatyi, kubwanya kwibishintulula mpikila.” (Mateo 16:2, 3) Kupwa Yesu wasapwila Bafadiseo ne Basadusea amba i kutupu kiyukeno kikebapebwa poso’nka kiyukeno kya Yona kete.

Yesu ne bandi bana ba bwanga abakanda mu bwato ne kwenda ku Betesaida ku nkula idi pa bukata bwa kungala ne kutunduka kwa dijiba. Mu dishinda, bana ba bwanga abamone’mba kebaselelepo mikate ibabwana. Badi’nka na mukate umo. Yesu pa kuvuluka kwitana kobetene na Bafadiseo ne Basadusea bakwatakenye Heloda, Yesu webadyumuna’mba: “Pūtulai meso; kadi dyumukai kiyujo kya Bafadiseo ne kiyujo kya Heloda.” Bana ba bwanga abalanga’mba wisambilanga pa kiyujo kya kwilwa kobailwa kusela mikate. Yesu wajingulula’mba kebebivwenepo, wanena’mba: “I kika kyomwipatenya pa mwanda wa mikate yokemudipo nayo?”​—Mako 8:15-17.

Panopano ponka Yesu wadishishe tununu ne tununu twa bantu. Nanshi bana ba bwanga kebadipo kya kwikambakenya pa kubulwa mukate. Waipangula’mba: “Lelo kemuvulukilepo ponatyumwine mikate itano mwanda wa bana- balume 5 000, le mwakongele’po bilala binga biyule bipindi bā?” Nabo bamulondolola’mba: “Dikumi ne bibidi.” Yesu wabweja’ko amba: “Ponatyumwine mikate isamba-ibidi mwanda wa bana-balume 4 000, le mwakongele’po bilala bikatampe binga biyule bipindi bā?” Nabo bamulondolola’mba: “Bisamba-bibidi.”​—Mako 8:18-20.

Yesu webepangula’mba: “Le penepo mubakomenwa namani kujingulula’mba nkimunenangapo myanda ya mikate?” Wabweja’ko amba: “Dyumukai kiyujo kya Bafadiseo ne Basadusea.”​—Mateo 16:11.

Ku mfulo, bana ba bwanga abaivwanija mwanda mwine. Kiyujo kingidijibwanga mwanda wa kutatula mukama ne kubaija mukate. Yesu watela kiyujo bu kyelekejo kya disubi. Wadyumuna bana bandi ba bwanga belame ku “bufundiji bwa Bafadiseo ne Basadusea,” bubwanya kwibasubija.​—Mateo 16:12.