Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 37

Yesu Wasangula Mwana wa wa Kishala

Yesu Wasangula Mwana wa wa Kishala

LUKA 7:11-17

  • LUSANGUKILO MU NENI

Yesu pa kupwa’tu kubelula mwingidi wa mukatampe wa basola, wataluka ku Kapanama waenda ku Neni, kibundi kidi ku makilometele 32 pa bukata bwa kunshi ne kushika. Kadipo bunka. Waenda na bandi bana ba bwanga ne kibumbo kya bantu. Abo pa kufwena kubwipi na Neni, kyadi ke kyolwa. Kwine’kwa abatana’ko Bayuda bavule ku madilo. Abatambe na ngitu mifwe ya nkasampe mu kibundi kebakajīka.

Muntu utapilwe bininge ku mutyima i inandya ufwile. I mukaji wa kishala, kadi pano mwana umo kete waadi nandi wafu. Pafwile wandi mulume, wadi usengwa’ko pa kumona wandi mwana muswedibwe. Fwatakanya’po mobadi belamatyidile, mwanda lukulupilo lwandi ne būmi bwandi bwa kumeso byadi’nka pa mwana. Pano kadi nandi wafu. Penepa i ani washala wa kwikala nandi ne kumukwatakanya?

Yesu pa kumona uno mwana-mukaji, mutyima wandi watengwa bininge na bulanda bwa ngikadilo yandi. Yesu wamunena na kanye ne kikulupiji amba: “Leka kudila.” Kakadikilepo’nka papo. Wafwena ne kutenga kitanda paselelwe umbidi. (Luka 7:13, 14) Mwiilo wandi ne byalonga bibalengeja bantu badila bemane. Bavule ye bano abeipangula’mba: ‘Le byobi nabyo bika, ne byasaka kulonga bine i bika?’

I bika bibwanya kulanga boba bendanga nyeke na Yesu bamona bilongwa byandi bikatakata bya kubelula misongo mivule? Padi kebamwene Yesu usangula muntu mufwe. Myanda ya lusangukilo yālongekele myaka ya kala, le Yesu ubwanya kusangula muntu? (1 Balopwe 17:17-23; 2 Balopwe 4:32-37) Yesu wasoñanya amba: “A nsongwalume, nakunena’mba, imana!” (Luka 7:14) Nandi awa ulanguka. Mwana washikata kanena ne kunena! Yesu wapa’ye inandi wadi mutyimukwe mutyima ino pano wasangala bininge. Kakidipo bunka.

 Bantu pa kumona’mba uno mwana ke mūmi monka, abatumbija Yehova, Mwine Upānanga būmi amba: “Mupolofeto mukatampe wamweka motudi.” Bakwabo abavuluka buluji bwa bilongwa bya kutendelwa bya Yesu, ke banena’mba: “Leza wate bantu bandi mutyima.” (Luka 7:16) Ino myanda itulumukwa ibasambakana bukidibukidi mu bibundi bya kufula, mobimwekela i ne mu Nazala, mu kibundi kya ba Yesu kidi ku makilometele 10. Lusango’lwa lubaenda’nka ne kunshi kwa Yudea.

Yoano Mubatyiji ukidi mukutwe, usangedile bintu bilonga Yesu. Bana ba bwanga ba Yoano abamusapwila bino bingelengele. Le walonga’po namani?