Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 51

Waipaibwa pa Fetyi ya Kuvuluka Difuku dya Kubutulwa

Waipaibwa pa Fetyi ya Kuvuluka Difuku dya Kubutulwa

MATEO 14:1-12 MAKO 6:14-29 LUKA 9:7-9

  • HELODA WATETEJA YOANO MUTWE

Pavuija batumibwa mwingilo wabo mu Ngadilea, mwine webayukije Yesu kadipo mu bwanapabo. Pano ke kubwipi kwa myaka ibidi yapityija Yoano Mubatyiji mu kifungo.

Yoano wasapwidile patōkelela Mulopwe Heloda Antipese amba i bibi aye ayate Helodyasa mukaja Fidipa mwanabo ke wandi mukaji. Heloda walubwile wandi mukaji mubajinji mwanda wa kusonga Helodyasa. Mungya Bijila bya Mosesa, bine bitela Heloda amba byo byalonda, busongi bwa uno muswelo i makoji, kebwendele’mopo mungya bijila. Heloda pa kutopekwa nabya na Yoano, wamukutyija mu kifungo, padi i na kutononwa na Helodyasa.

Heloda wakomenwa kulonga Yoano kintu, mwanda bantu “bamumwene amba i mupolofeto.” (Mateo 14:5) Ino Helodyasa wamone kino bu moyo. “Wamukwatyilwa kīji” Yoano, kakimbe’nka kukimba mwa kumwipaila. (Mako 6:19) Ku mfulo, mukenga ubamweka.

Kinondanonda na Pashika ya mu 32 Yesu ke mwiye, Heloda walongeja fetyi mikatampe ya kuvuluka difuku dya kubutulwa kwandi. Bengidi bonso bakatampe ba Heloda ne bakatampe ba basola, ne bendeji ba bibundi bya Ngadilea abaiya ku fetyi. Papita fetyi, Salome, mwanā Helodyasa mwana-mukaji waabutwile na Fidipa wadi wandi mulume, watwela kuja ku meso a betwa. Bantu abakokwe na kuja kwandi.

Heloda pa kusangela bininge mwanā wandi mukaji, wamunena’mba: “Nombe kyonso kyowakasaka, nami nkakupa’kyo.” Wamutyipila ne kumutyipila’mba: “Kintu kyonso kyowakanomba, nkakupa’kyo, nansha ke kipindi kya bulopwe bwami.” Salome kumeso kwa kulondolola, wakepangula bidi inandi amba: “Lelo nkalombe kika?”​—Mako 6:22-24.

Helodyasa wamone mukenga waadi ukimba! Wamulondolola bukidi’tu amba, “Mutwe wa Yoano Umbatyiji.” Ponka’po, Salome wajokela kudi Heloda wamulombe amba: “Nsaka umpe’nka pano pa nsāni mutwe wa Yoano Mubatyiji.”​—Mako 6:24, 25.

Kino kibafītyija bininge Heloda ku mutyima, ino beni badi abaivwana mutyipo waatyipilanga Salome. Wakomenwa mwa kupelela nansha byobilomba kwipaya muntu wampikwa mambo. Ko kutuma, Heloda watume kalama wandi ku kifungo na musapu mubi. Kepejije kala kalama wajoka na mutwe wa Yoano pa nsāni. Wape’o Salome, nandi wakape’o inandi.

Bana ba bwanga ba Yoano pa kwivwana byalongeka, abasela mubidi wandi ne kukeujīka. Kupwa abasapwila Yesu mwanda.

Mwenda mafuku, Heloda pa kwivwana’mba Yesu ubelulanga bantu ne kupanga bandemona, ñeni ibamuvutakana. Kaeipangula shi yao Yesu ulonga bino bintu’u i Yoano Mubatyiji “wasanguka mu lufu.” (Luka 9:7) O mwanda Heloda Antipese kaabila mpata kumona Yesu. Ke mwandapo wa kwivwana busapudi bwa Yesu. Ino Heloda usakanga kuyukidija shi moyo waivwene i wa bine nansha wa bubela.