Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 42

Yesu Wafunina Bafadiseo

Yesu Wafunina Bafadiseo

MATEO 12:33-50 MAKO 3:31-35 LUKA 8:19-21

  • YESU WESAMBE YA “KIYUKENO KYA YONA”

  • BANA BA BWANGA BAPWENE NANDI KUPITA KISAKA

Basonekeji ne Bafadiseo byobatuna amba Yesu kapañangapo bandemona na bukomo bwa Leza, abaikala mu kyaka kya kutuka mushipiditu ujila. Penepa, badi ku mutamba wa Leza’ni nansha wa Satana? Yesu wanena’mba: “Banwe mukokeja kulumbulula mutyi ne bipa byao bine byalumbuluka, nansha kuboleja mutyi ne bipa byao bine byabola, mwanda mutyi uyukenanga ku bipa byao.”​—Mateo 12:33.

Bine, kutelela Satana bipa biyampe bilonga Yesu bya kupanga bandemona i bulubi. Monka mwekilombwedile Yesu mu Busapudi bwa ku Lūlu, shi bipa i biyampe, nankyo ne mutyi nao i muyampe, ke mubolepo. Le bipa bya Bafadiseo, keo matope a bubela obatopeka Yesu, alombola bika? Alombola’mba i babole. Yesu webasapwila’mba: “A lutundu lwa bampidi, le mukokeja namani kunena bintu biyampe banwe’ko babi? Mwanda kyakanwa kinenanga byobya biyudile ku mutyima.”​—Mateo 7:16, 17; 12:34.

Bine, binenwa byetu bilombolanga mwikadile mutyima wetu ke pa kwitutyibila mambo. O mwanda Yesu wanena’mba: “Nemulombola’mba bantu bakeshintulwilanga mu Difuku dya Butyibi pa mwanda wa binenwa byonso bya bituputupu byobanena; mwanda i pa binenwa byobe pokabingijibwa, kadi i pa binenwa byobe pokaponejibwa.”​—Mateo 12:36, 37.

Nansha bilonga Yesu bilongwa bya bukomo, basonekeji ne Bafadiseo abo kebamulombela’ko bikwabo amba: “A mufundiji, tusaka tumone kiyukeno kodi.” Bekale bemwenine bingelengele byalonga nansha kebemwenine’byopo, kudi batumoni bavule bemwenine na meso bintu byalonga. Yesu udi na bubinga bwa kusapwila bano bendeji Bayuda amba: “Lukongo lubi kadi lwa makoji lusakanga nyeke kiyukeno, ino i kutupu kiyukeno kyolukapebwa poso’nka kiyukeno kya mupolofeto Yona.”​—Mateo 12:38, 39.

Yesu kebashilepo mu kitonto, webashintulwila amba: “Monka mwāikadile Yona mu difu dya mushipa mukatampe mafuku asatu dyuba ne bufuku, ne Mwanā muntu nandi ukekala munda mwa nshi mafuku asatu dyuba ne bufuku.” Yona wāmininwe na mushipa kampanda mukatampe kupwa wālaswa pamo bwa aye wasanguka. O mwanda Yesu walaya amba aye mwine ukafwa kadi mu difuku dya busatu ukasanguka. Bino pa kulongeka’byo mwenda mafuku, bendeji ba Bayuda bapela “kiyukeno kya Yona,” bapela kwisāsa ne kushinta. (Mateo 27:63-66; 28:12-15) Ino, “Bantu ba Nineva” bēsāshile pebāsapwidile Yona. O mwanda bakaponeja luno lukongo. Yesu waleta kimfwa kikwabo kya mulopwe mukaji wa ku Sheba amba nandi ukebaponeja. Wāile kwivwana tunangu twa  Solomone ne kutendela’to. Ebiya Yesu wanena’mba, “kintu kitabukile Solomone kidi pano.”—Mateo 12:40-42.

Yesu wadingakanya luno lukongo lubi na muntu walupulwa mushipiditu wa disubi. (Mateo 12:45) Uno muntu byakadingilepo mwadi bintu bilumbuluke, mushipiditu umbi ubajokela’mo na mishipiditu isamba-ibidi mikwabo mibi kwiupita kadi ibashikata mu uno muntu. Mo mwikadile ne muzo wa Isalela watōkejibwe ne kulongololwa pamo bwa muntu walupwilwe’mo mushipiditu wa disubi. Ino uno muzo wāpelele bapolofeto ba Leza, kadi kibi mpata, bālwa na mwine umwekelele patōka amba udi na mushipiditu wa Leza, ke Yesu kadi. Kino kibalombola amba ngikadilo ya uno muzo ibabipidila’ko kupita mibajinji.

Yesu paakisamba, inandi ne banababo abafika ne kwimana ku kibumbo. Muntu umo wadi ushikete kubwipi nandi wamunena’mba: “Inobe ne banabenu aba bemene panja basaka kwimona nobe.” Ebiya Yesu walombola mwapwanine bininge na bana bandi ba bwanga badi pamo bwa banababo bana-balume, bana-bakaji, ne bainandi. Aye pa kufunka kudi bana bandi ba bwanga, wanena’mba: “Mama ne banabetu i bano’ba bevwana mwanda wa Leza ne kulonga’o.” (Luka 8:20, 21) Walombola’mba nansha byapwene na babutule bandi, ino kipwano kyandi na bana bandi ba bwanga i kipite bulēme. Bine bisangaja’po kashā kupwana bininge na banabetu ba ku mushipiditu, nakampata kitatyi kitupela bantu ne kwitutopeka pa mingilo yetu miyampe!