Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Yesu​—Dishinda, Bubine, ne Būmi

 SHAPITA 65

Waenda ku Yelusalema Wenda Ufundija

Waenda ku Yelusalema Wenda Ufundija

MATEO 8:19-22 LUKA 9:51-62 YOANO 7:2-10

  • MUSWELO UMWENWE YESU NA BANABABO

  • MWINGILO WA BULOPWE UDI NA MVUBU’KA?

Yesu waingila bininge mu Ngadilea, mwanda i mutane’mo bantu basangela kupita’ko mu Yudea. Paadi mu Yelusalema wabelwile’mo muntu umo mu dya Sabato, ino “Bayuda badi kebakimbidila kumwipaya.”​—Yoano 5:18; 7:1.

Pano ke ku dikumbi dya mwaka 32 Yesu ke mwiye, Masobo a Tabenakulo (a Bitanda) abafwena. Ano masobo alongekanga mu mafuku asamba-abidi, kupwa alondwa na kitango kijila mu difuku dya mwānda. Ano masobo alombolanga mfulo ya mwangulo wa babidimye ne kikalanga kitatyi kya nsangaji mikatampe ne mitendelo.

Banababo na Yesu​—ba Yakoba, Shimona, Yosefa, ne Yudasa​—abamuzenze amba: “Taluka kuno wende mu Yudea.” Yelusalema kyo kitako kya mutōtelo mu ntanda’ya. Mu kitatyi kya masobo aloñwanga disatu pa mwaka, kibundi kikalanga kiyule bantu bā. Banababo na Yesu abalombola kyobasaka’mba: “I kutupu usakanga kuyukana ulongelanga bintu kufula. Byolonga bino bintu, wilombole ku ino ntanda.”​—Yoano 7:3, 4.

Kufika ne pano, bano banababo na Yesu baná ‘kebalombwele lwitabijo mwadi’ lwa amba i Meshiasa. Ino basaka’ko boba baile ku masobo bamumone ulonga bilongwa bya kutendelwa. Yesu byayukile kyaka kidi’ko, webasapwila’mba: “Ino ntanda keidipo na bubinga bwa kwimushikwa, inoko inshikilwe amiwa, mwanda nsapulanga bukamoni pa mwanda wayo amba mingilo yayo i mibi. Banwe kandai ku masobo; ami’ko nkisapo kala kukanda ku ao masobo, mwanda kitatyi kyami kekyafikile ne pa mfulo.”​—Yoano 7:5-8.

Banababo na Yesu abaenda na kibumbo kya bantu badi benda, kupwa Yesu ne bandi bana ba bwanga nabo abaenda’ko mu bufyafya, pampikwa kumonwa na bantu. Abaenda mu dishinda dyoloke dipityila ku Samadia, pa kyaba kya dyendwanga nyeke dipityila kubwipi na Munonga wa Yodano. Yesu ne bana bandi ba bwanga basakilwa kwa kufikila mu Samadia, o mwanda watume mikendi ikateakanye kala. Bantu ba mu kibundi kimo abapele kwibatambula nansha kulombola kizaji kilombolwanga ku bonso amba mwanda Yesu wendanga ku Yelusalema ku masobo a Bayuda. Ba Yakoba ne Yoano abalobe bininge abamwipangula’mba: “A Mfumwetu, le usaka tunene mudilo utūke mūlu wibaloteje fututu?” (Luka 9:54) Yesu webafunina pa kuleta uno mulangwe, kupwa kebenda.

Pobadi mu dishinda, musonekeji umo wanena Yesu amba: “A Mufundiji, nkakulonda konso koenda.” Yesu wamulondolola’mba: “Mikenge idi na mikembo, toni twa mūlu nato tudi na manswa, ino Mwanā muntu kadipo na pa kusāmina mutwe.” (Mateo 8:19, 20) Walombola patōka’mba uno musonekeji ukatanwa na bikoleja shi waikala mulondi  wa Yesu. Padi bimweka’mba uno musonekeji usangedile būmi bwa uno muswelo. I biyampe muntu ne muntu eipangule amba, ‘Le ngitabije kulonda Yesu?’

Yesu waite muntu mukwabo amba: “Ikala mulondi wami.” Muntu’wa wamulondolola’mba: “A Mfumwami, ndeke bidi ñende nkajīke tata.” Yesu pa kuyuka ngikadilo idi’mo uno muntu, wamunena’mba: “Leka bafwe bajīke bafwe babo, abe enda ukasapule pi na pi Bulopwe bwa Leza.” (Luka 9:59, 60) Bimweka bu shandi kafwile. Shi wadi ke mufwe, longa wandi mwana kadipo wa kwikala pano ne kwisamba na Yesu. Uno mwana ketabijepo kutūla Bulopwe bwa Leza pa kifuko kibajinji mu būmi bwandi.

Yesu wesambe na muntu mukwabo pobatūkila ku Yelusalema, uno muntu wasapwidile Yesu amba: “Ami nkakulonda, abe Mfumwami, inoko ndeke bidi nkashadike ba mu njibo yetu.” Yesu walondolola’mba: “I kutupu muntu ukwata lukasu mu maboko koku utala bintu bidi kunyuma ufwaninwe Bulopwe bwa Leza.”​—Luka 9:61, 62.

Boba basaka kwikala bana ba bwanga ba bine ba Yesu bafwaninwe kuta mutyima ku mwingilo wa Bulopwe. Shi kidimye katalepo kumeso, nabya kakōlolapo matumba. Shi ele lukasu pa nshi katale bidi kunyuma, mwingilo wandi wa budimi ukalāla. Mo monka ne yewa ense utala kunyuma ku ino ngikadilo ya bintu ya kala, ukakukala mu kashinda katwala ku būmi bwa nyeke.