Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 21

Mu Shinankonka ya mu Nazala

Mu Shinankonka ya mu Nazala

LUKA 4:16-31

  • YESU UTANGA MUVUNGO WA ISAYA

  • BANTU BA MU NAZALA ABAKIMBE KWIPAYA YESU

Mu Nazala mudi byungwe na bintyila. Kintu kya mwaka umo kumeso kwa kukabatyijibwa na Yoano, Yesu wadi ukidi nsendwe wa mbao mu kino kibundi. Ino pano wayukana bu muntu ulonga mingilo ya kutendelwa. Bantu mu kibundi babila kumumona ulonga bingelengele mobadi.

Abasangala paenda Yesu ku shinankonka ya mwabo, mungya kibidiji kyandi. Mingilo iloñwanga’ko i kulombela ne kutanga mikanda ya Mosesa, monka mokilongelwanga “mu mashinankonka dya sabato ne dya sabato.” (Bilongwa 15:21) Kutañwanga ne bipindi bya mikanda ya bapolofeto. Yesu pa kwimana katange, kabudilwepo kujingulula mapala ayukile paadi wiyanga ku ino shinankonka. Abamupe muvungo wa mupolofeto Isaya. Watana popa palembelwe myanda ya Muntu umo mushingwe māni na mushipiditu wa Yehova, myanda itanwa dyalelo mu Isaya 61:1, 2.

Yesu watange myanda ya uno Muntu wālailwe pa muswelo waadi wa kusapula kulekelelwa kwa bamisungi, kupūtulwa kwa meso a bampofu, kwiya kwa mwaka wa mutyima muyampe wa Yehova. Yesu wajokeja muvungo kudi mwingidi umo kupwa washikata. Meso onso keamutale sō. Ebiya, mobimwekela wesambe mu minite kampanda mwine mwaatela ne bino binenwa bya mvubu amba: “Dyalelo kino kisonekwa kyomwaivwana’ki kibafikidila.”​—Luka 4:21.

Bantu abatendela “binenwa bilumbuluke byadi bitamba mu kyakanwa kyandi,” kadi kebenena’mba: “Mwene uno’u i mwanā Yosefa?” Yesu pa kumona’mba basakanga kumona mingilo ya bukomo na yoya yobaivwene, webanena’mba: “Na bubine mukangela luno lukindi amba, ‘A muñanga, wiundape abe mwine. Longa ne muno mwenu bintu byotwaivwene bilongeka mu Kapanama.’” (Luka 4:22, 23) Bimweka bu bantu badi bashikata na Yesu badi balanga’mba ufwaninwe kundapa bidi kwabo mwanda wa bantu ba kwabo bekale babajinji kumwena’mo. O mwanda balangile amba Yesu webasūla.

Yesu pa kuyuka milangwe yabo, wasekununa myanda imo ya mu mānga ya Isalela. Kwādi bakaji ba bishala bavule mu Isalela mu mafuku a Ediya, ino aye kātuminwepo kobadi. Ino wāendele ku mukaji wa kishala wampikwa kwikala mwine Isalela, wa ku Zelefata, kibundi kidi kubwipi na Shidone, kwine kwālongele Ediya kingelengele kipāna būmi. (1 Balopwe 17:8-16) Kadi mu mafuku a Edisha namo ba makopo bādi bangi mu Isalela, ino mupolofeto wātōkeje enka Nemani mwine Ashidia.​—2 Balopwe 5:1, 8-14.

I bika byalonga bantu ba mu kibundi kya Yesu pa ino nsekununi imweka bu yampikwa kwibasangaja ya kudingakanya nayo isokola patōka kwisakila ne kubulwa lwitabijo kwabo? Boba badi mu shinankonka bakalabala, abataluka ne kwela Yesu panja pa kibundi. Abaselela Yesu ku nenekelo ya lūlu yūbakilwe’po Nazala, kebakimbe kumwela mu lupongo. Ino Yesu webasontomoka ne kwibanyema pampikwa kumulonga kintu. Pano Yesu waenda watūkila ku Kapanama, pa bukata bwa kungala ne kushika kwa nkula ya Dijiba dya Ngadilea.