Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 45

Udi na Bukomo Kupita Bandemona

Udi na Bukomo Kupita Bandemona

MATEO 8:28-34 MAKO 5:1-20 LUKA 8:26-39

  • WAPANGILA BANDEMONA MU BANGULUBE

Bana ba bwanga pa kupwa kususuka pa dijiba na mwanda uleta moyo, abafika ku nkula bakōke. Bantu babidi balobo, bakwatwe na bandemona, abatambe ku bibundu kebāya lubilo kudi Yesu! Ino nsekununi ibesambila pa umo, padi i mwanda wadi mulobo bininge kadi kemwije mpata mu kukwatwa na bandemona.

Uno muntu uleta bulanda wadi bwa aye wampikwa kuvwala. Dyuba ne bufuku, wadi “wela ñanji mu bibundu ne mu ngulu ne kwitapa aye mwine bilonda na mabwe.” (Mako 5:5) Wadi mutomboke, o mwanda bantu badi batyina kwendela mu dishinda’dya. Badi batompa kumukuta, ino aye uketa miyololo ne nkano ku maulu andi. Kekudipo wamubwenye.

Muntu’wa pa kufwena kudi Yesu, wapone ku maulu andi, bandemona bamwendeja’ba abamweleja lwanji amba: “Le ndi nobe mwanda’ka, abe Yesu, Mwanā Leza Mwine wa Mūlu Mwine? Nakutyipija ne Leza amba kokamwesha malwa.” Yesu walombola’mba upityile bandemona bukomo, na kusoñanya amba: “Tamba mu uno muntu, abe mushipiditu wa disubi.”​—Mako 5:7, 8.

Na bubine mu uno muntu mwadi bandemona bavule. Yesu pa kwipangula’mba, “Le dijina dyobe wi ani?” walondolola’mba: “Dijina dyami ne Kibumbo kya Bulwi, mwanda tudi bungi.” (Mako 5:9) Kibumbo kimo kya bulwi kya bene Loma kikalanga na tununu tuvule twa basola; nanshi uno muntu wadi ususuka bininge pa kukwatwa na bandemona bavule. Kebazenze Yesu amba “kakibasoñanya bende mu lupongo.” Bimweka bu bayukile byobya bibatengēle kumeso abo ne Satana, mwendeji wabo.​—Luka 8:31.

Abo pa kutala kufula abamone luombe lwa bangulube kintu kya 2 000, banyama ba disubi mungya Mukanda wa Bijila, ne bapelejibwe kumunwa na Bayuda. Bandemona banena’mba: “Witutume mu bangulube, tukatwele’mo.” (Mako 5:12) Yesu webasapwila bende’mo, nabo bakatwela mu bangulube. Ponka’po, bangulube bonso 2 000 bakemana ku lupongo kebeela mu dijiba.

 Boba badi bakumba bangulube pa kumona kino, abanyemena lubilo mu kibundi ne kufulakufula kwakyo kukasapula myanda’ya. Bantu nabo ko kwiya kutala byalongeka. Abo pa kufika, abatana muntu watambwa na bandemona ke mukomo kadi kalonga bya bu muntu mubwane. Au kavwele ne kushikata ku maulu a Yesu!

Bantu baivwana mwanda ne bemwena’o abakwatwa moyo, kebevwanijepo mushintulwila bino bintu kobadi. Abazenze Yesu ataluke mu yabo ntanda. Yesu pa kukanda mu bwato kaenda, yewa wadi mukwatwe na bandemona wamuzenze ende nandi. Ino Yesu wasapwila muntu’wa amba: “Enda kwinjibo ku babutule bobe, ukebalombole byonso byakulongela Yehova ne lusa lwaakufwila.”​—Mako 5:19.

Divule Yesu ulombolanga boba babelula baleke kusapwila muntu nansha umo kutyina bantu bakamuyuka kupityila ku nsapu-nsapujana ya bintu byulula masenda. Pano, uno muntu wadi na bandemona i bukamoni bumweke bwa bukomo bwa Yesu, kadi ubwanya kusapwila bantu ku mitamba keisapo kufika’ko Yesu. Buno bukamoni bubwanya ne kūbija boba badi ba kumunenena bibi pa bangulube bajimina. Ebiya uno muntu waenda kasapula mu Dekapodi monso bintu byamulongela Yesu.