Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 36

Mukatampe wa Basola Walombola Lwitabijo Lukatampe

Mukatampe wa Basola Walombola Lwitabijo Lukatampe

MATEO 8:5-13 LUKA 7:1-10

  • MUPIKA WA MUKATAMPE WA BASOLA WABELULWA

  • BOBA BADI NA LWITABIJO BAKESELWA

Yesu pa kupwa kunena Busapudi bwa ku Lūlu, waenda ku Kapanama. Bakulumpe bamo ba Bayuda abamufwena. I batumwe na muntu wa kungi—mukatampe wa basola mwine Loma.

Mupika muswedibwe wa mukatampe wa basola wabela ke kufwa. Nansha uno mukatampe wa basola byadi Mujentaila, wakimbe Yesu amukwashe. Bayuda abasapwila Yesu amba mwingidi wa muntu’wa “ulādikilwe mu njibo, ubela bulebe, wasusuka bya mwiko,” padi i misanshi mikatampe. (Mateo 8:6) Bakulumpe ba Bayuda abakulupija Yesu amba uno mukatampe wa basola ufwaninwe kukwashibwa, abashintulula’mba: “Usenswe muzo wetu kadi aye ye wetūbakīle shinankonka.”​—Luka 7:4, 5.

Ponka’pa Yesu ne bakulumpe’ba abataluka ne kwenda ku njibo ya mukatampe wa basola. Abo pa kufwena, mukatampe wa basola watume balunda nandi bamulombole amba: “A Mfumwami, kokakambakana’tu, mwanda ami nkifwaninwepo abewa utwele mu yami njibo. O mwanda mwine nadi nemone bu wampikwa kufwaninwa kwiya kodi.” (Luka 7:6, 7) Bino shabyo byo binenwa bya kwityepeja bya muntu wibidile kusoñanya! Kadi bibalombola kwishila kwishidile uno muntu na bene Loma bakwabo basusula bapika bibi.​—Mateo 8:9.

Ne kutatana mpika, uno mukatampe wa basola uyukile amba Bayuda bapelanga kupwana na bantu ba mizo ingi. (Bilongwa 10:28) Padi kyo kyatumina mukatampe wa basola balunda nandi bazenze Yesu amba: “Nena’tu kishima, mwingidi wami akome.”​—Luka 7:7.

Yesu watulumuka pa kwivwana kino, wanena’mba: “Nemusapwila’mba, nansha ke mu Isalela mwine nkyamwene lwitabijo lukatampe namino.” (Luka 7:9) Balunda nandi pa kujokela kudi mukatampe wa basola abamone amba mupika wadi mubele bininge wakoma.

Yesu upwa’tu kubelula uno muntu, wanenenena’mba bantu ba mizo badi na lwitabijo bakeselwa, na kulombola’mba: “Bavule batamba kutunduka ne kushika, bakāya ne kushikata ku meza pamo na Abalahama ne Izake ne Yakoba mu Bulopwe bwa mūlu.” Le Bayuda bampikwa lwitabijo nabo? Yesu unena’mba “bakelwa mu mfindi panja. Mo mobakadila madilo ne kwishenkenya meno.”​—Mateo 8:11, 12.

Nanshi Bayuda bapelele kwitabija mukenga webapelwe bidi abo wa kubadilwa mu Bulopwe pamo na Kidishitu bakelwa. Ino Bajentaila bakatambulwa ne kushikata ku meza, bwa abo badi “mu Bulopwe bwa mūlu.”