Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 59

Le Mwanā Muntu I Ani?

Le Mwanā Muntu I Ani?

MATEO 16:13-27 MAKO 8:22-38 LUKA 9:18-26

  • YESU WABELULA MPOFU

  • PETELO WAPEBWA MAFUNGULO A BULOPWE

  • YESU WALAYA KUFWA NE KUSANGUKA KWANDI

Yesu ne bandi bana ba bwanga abafika ku Betesaida. Bantu abaletela Yesu muntu umo mpofu kebamuzenze amutenge ne kumubelula.

Yesu wamukwata ne kwenda nandi panja pa kibundi. Yesu pa kupwa kumupēlela mata mu meso, wamwipangula’mba: “Le kudi kyowamona?” Muntu’wa walondolola’mba: “Namone bantu, inoko bamweka pamo bwa mityi yenda.” (Mako 8:23, 24) Yesu wamutenteka maboko pa meso, wamujokejeja bukomo bwa kumona. Ebiya wanena muntu wamona biyampe’wa amba kakitwela mu kibundi.

Yesu ne bana bandi ba bwanga ko kwenda dya kungala kwa ntanda ya Kesalea Fidipai. I mukuna mulampe wa kintu kya makilometele 40. Kibundi kidi peulu, shi na pa dijiba, akyo kidi pa mametele 350, kadi mashika atambanga pa bukata bwa kungala ne kutunduka eela pa Lūlu lwa Helemone. Padi luno lwendo lubebalombe mafuku abidi.

Pobadi mu lwendo, abafika pantu pamo, Yesu waenda kukalombela bunka. Yesu wakambakena bandi bana ba bwanga mwanda kubashala’tu kintu kya myeji kitema nansha dikumi afwe. Panopano ponka bavule bamunyemene, kadi bakwabo bimweka bu bakilangalanga nansha kufītwa. Padi bakiipangula mwanda waka wapele bantu balonga bukomo bwa kumubikika bu mulopwe ne mwanda waka wapele kulonga kiyukeno kimuyukanya na bubine mwine mwaikadile.

Bana ba bwanga pa kufika kwine kwadi kulombela Yesu webepangula’mba: “Le bantu banenanga’mba Mwanā muntu i ani?” Nabo banena’mba: “Bamo banenanga’mba i Yoano Mubatyiji, bakwabo amba i Ediya, bangi nabo amba i Yelemia nansha umo wa mu bapolofeto.” Bine bantu bakilanga’mba Yesu ubadilwa mu bantu basangwilwe mu bafu. Yesu pa kusaka kuyuka bilanga bandi bana ba bwanga, webepangula’mba: “Le banwe nenu, munenanga’mba ne ani?” Petelo kala wamulondolola’mba: “Abe wi Kidishitu, Mwanā Leza mūmi.”​—Mateo 16:13-16.

Yesu wanena’mba Petelo asangale mwanda i Leza wamusokwela’kyo, wabweja’ko amba: “Abe wi Petelo, kadi pa dino dibwe nkōbaka’po kipwilo kyami, ne bibelo bya Kibundu kebikekitādilapo.” Yesu wanena’mba aye mwine ukōbaka kipwilo kadi amba ne Kibundu kine kekikakwatapo misungi bantu bandi shi balame kikōkeji mu lwendo lwabo pano pa ntanda. Walaya Petelo amba: “Nkakupa mafungulo a Bulopwe bwa mūlu.”​—Mateo 16:18, 19.

Yesu kapēlepo Petelo kifuko kibajinji mu batumibwa, kadi Yesu kamutūdilepo bu kyalwilo kya kipwilo. Yesu aye mwine dyo Dibwe pakōbakwa kipwilo. (1 Kodinda 3:11; Efisesa 2:20) Ino Petelo usa kupebwa mafungulo asatu. Ukekala na kyepelo kya kushitwila bantu mukenga wa kutwela mu Bulopwe bwa mūlu.

 Petelo ukengidija lufungulo lubajinji pa Pentekosa 33 Yesu ke mwiye, na kulombola Bayuda besāsa ne ba kwalamuka bya kulonga pa kusaka bapande. Lwa bubidi ukelwingidija pa kushitwila bene Samadia betabija mukenga wa kutwela mu Bulopwe bwa Leza. Ebiya mu 36 Yesu ke mwiye, Petelo ukengidija lufungulo lwa busatu mwanda wa kupāna mukenga ku Bajentaila bampikwa kutwela kwisao, Konilusa ne bakwabo.​—Bilongwa 2:37, 38; 8:14-17; 10:44-48.

Mu ino mīsambo, batumibwa ba Yesu abavutakanibwa milangwe pebasapwila Yesu masusu ne lufu lwandi bisa kumutana panopano ku Yelusalema. Petelo byakayukilepo amba Yesu usa kusangwilwa ku būmi bwa mūlu, wamukokela kufula kamufunina amba: “A Mfumwetu, wididile’ko lusa; uno mwanda keukakufikilapo nansha dimo.” Ino Yesu wamwela nyuma kanena’mba: “Jokela mu nyuma, abe Satana! Wi kikukaja kondi mwanda abe ulañanga milangwe ya bantu ke milangwepo ya Leza.”​—Mateo 16:22, 23.

Ebiya Yesu waityila kufula batumibwa bakwabo kaebashintulwila amba kebipēlapo kwikala mulondi wandi. Wanena’mba: “Shi muntu usaka kunonda, nankyo epele aye mwine, asele mutyi wandi wa masusu kadi anonde nyeke. Ke-muntu yewa ense usaka kupandija būmi bwandi ukebujimija, ino yewa ense ujimija būmi bwandi pa mwanda wa amiwa ne myanda miyampe ukebupandija.”​—Mako 8:34, 35.

Bine, pa kwitabijibwa na Yesu bu mulondi, muntu’wa ufwaninwe kwikala mukankamane ne mwipāne. Yesu wanena’mba: “Yewa umfwa bumvu ami ne binenwa byami mu luno lukongo lwa makoji ne lwa bubi, Mwanā muntu nandi ukamufwanga bumvu pakafika mu ntumbo ya Shandi na bamwikeulu bajila.” (Mako 8:38) I amo, pasa kwiya Yesu, usa ukalubwila “muntu ne muntu mwendele mwikadilo wandi.”​—Mateo 16:27.