Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 57

Yesu Wabelula Nsongwakaji ne wa Kitwi

Yesu Wabelula Nsongwakaji ne wa Kitwi

MATEO 15:21-31 MAKO 7:24-37

  • YESU WABELULA MWANĀ MWANA-MUKAJI MWINE FENISEA

  • WABELULA WA KITWI KADI KAMĀMA

Yesu pa kupwa kutopeka patōka bisela bitūdile’ko Bafadiseo pa kamweno kabo, wataluka na bandi bana ba bwanga. Waenda ku ntanda ya Tyila ne Shidona mu Fenisea ku makilometele mavule dya pa bukata bwa kungala ne kushika.

Yesu wasokola njibo ya kushikata’mo ino kasakilepo bantu bayuke amba mo mwadi. Nansha nabya, bantu abamuyuka ne muno mwine. Mwana-mukaji umo Mungidiki ino mubutwilwe mu ino ntanda wamone Yesu ne kumuzenza’mba: “Mfwile’ko lusa, Mfumwami, Mwanā Davida. Wami mwana mwana-mukaji i mukwatwe na ndemona byamalwa.”​—Mateo 15:22; Mako 7:26.

Kyaba kityetye, bana ba bwanga abamwisāshila Yesu amba: “Mupange ende, mwanda yeu wiya witwela mabila kunyuma.” Pa kulondolola, Yesu walombola buluji bwaasūdila’ko amba: “Nkyatuminwepo ku bantu bakwabo, poso enka ku mikōko mijimine ya njibo ya Isalela.” Ino, mwana-mukaji kuzoza mpika. Wafwena ne kupona kudi Yesu, kamuzenze amba: “A Mfumwami, nkwashe’ko!”​—Mateo 15:23-25.

Padi Yesu pa kukimba kutompa lwitabijo lwandi, watela mu muswelo mufyame mumweno umwene Bayuda bantu ba mizo mikwabo amba: “Ke biyampepo kusela mukate wa bana koela’o tubwa.” (Mateo 15:26) Yesu pa kutela “tubwa,” walombola’mba utele mutyima ku boba ke Bayudapo. Mumwekelo wa mpala yandi ne muswelo utamba diwi keubudilwepo kumwekeja lusa lwandi.

Mwana-mukaji’wa pa kyaba kya kufītwa, nandi wesambila pa mushikwa wa Bayuda na kwityepeja amba: “I amo, Mfumwami, ino na bubine tubwa tudyanga bukūku bupona ku meza a bamfumwato.” Yesu wamone mwikadile mutyima muyampe wa uno mwana-mukaji, wamunena’mba: “Abe Mwana-mukaji, lwitabijo lobe i lukatampe; kikulongelwe monka mowasakila.” (Mateo 15:27, 28) Ne i bine kibalongeka nansha mwana byadi kukwabo! Mwana-mukaji pa kujokela kwandi, watana wandi mwana mwana-mukaji ulēle pa kitanda, mukomo nkē​—“ndemona papo muye kala”!​—Mako 7:30.

Yesu ne bandi bana ba bwanga abatambe mu ntanda ya Fenisea abatyibulukila dya kungala kwa Munonga wa Yodano. Padi abatyibulukila Yodano dya kungala kwa Dijiba dya Ngadilea ne kutwela mu ntanda ya Dekapodi. Kwine’kwa, abaenda ku lūlu, ino bibumbo bibebalonda’ko. Bantu abaiya kudi Yesu na babilema, basunkuta, tumama, ne bampofu. Abalādika babela’ba ku maulu a Yesu, nandi webabelula. Bantu pa kutulumuka, kebatendela Leza wa Isalela.

Yesu wate mutyima ku muntu umo wa kitwi kadi kabwanyapo kwisamba. Fwatakanya’po mwaweivwanina mu kibumbo kikatampe. Yesu pa kumona muswelo ukambakana uno muntu, wamuselela kufula. Pobadi kufula, Yesu wamulombola byasaka kumulongela. Watweja minwe mu matwi a muntu, kupwa wapela mata, ne kutenga ludimi lwa muntu. Yesu pa kutala mūlu, wanena mu ludimi lwa Bayuda bishima bishintulula’mba “Jikuka.” Ponka’po, muntu’wa kaivwana kadi kaesambe ne kwisamba biyampe. Yesu kasakilepo uno mwanda uyukane, ino usaka bantu bamwitabije kupityila ku byobemwena abo bene ne ku byobeivwanina.​—Mako 7:32-36.

Bukomo bwa Yesu bwa kubelula uno muswelo bubaikala na lupusa pa boba batala, “baana ne kwana bya binebine.” Kebanena’mba: “Walonga bintu byonso biyampe shē. Wajikula ne ba matwi majike kebevwana ne batumāma nabo kebanena.”​—Mako 7:37.