Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Yesu​—Dishinda, Bubine, ne Būmi

 SHAPITA 32

I Bika Bitabijibwe Kulonga mu dya Sabato?

I Bika Bitabijibwe Kulonga mu dya Sabato?

MATEO 12:9-14 MAKO 3:1-6 LUKA 6:6-11

  • WABELULA KUBOKO KWA MUNTU DYA SABATO

Mu dya Sabato dikwabo, Yesu waenda ku shinankonka, padi i ya mu Ngadilea. Mwine’mwa watana’mo muntu wa kuboko kwa lundyo kūmu. (Luka 6:6) Basonekeji ne Bafadiseo kebatale Yesu sō. Mwanda? Abasokola abo bene bibadi ku mutyima pa kwipangula amba: “Lelo ke kijilapo kubelula muntu mu dya Sabato?”​—Mateo 12:10.

Bendeji ba bipwilo bya Bayuda bakulupile amba i byendele’mo kubelula mu dya Sabato enka shi būmi budi mu kyaka. Kimfwa amba mu dya Sabato ke kyendele’mopo kulunga mukupa mutyumuke nansha kukuta pa kilonda, mwanda kekitūlapo būmi mu kyaka. Na bubine basonekeji ne Bafadiseo kebepangwilepo Yesu mwanda wa lusa lobaivwanina uno muntu ususuka, aa. Ino bakimba kuboya kilubo pa kutopekela Yesu.

Ino Yesu uyukile milangwe yabo minyengakane. Wamone amba badi na mumweno ungi, wampikwa kukwatañana na bisonekwa pa mingilo ipelejibwe dya Sabato. (Divilu 20:8-10) Mwanda ke bamufutulule ne dikwabo byampikwa kwendela’mo pa mingilo yandi miyampe. Pano Yesu wakolomona lupotopoto pa kusapwila muntu wa kuboko kūmu amba: “Imana, iya pa bukata.”​—Mako 3:3.

Yesu waalamukila kudi basonekeji ne Bafadiseo, kanena’mba: “Shi udi na mukōko umo, kadi mukōko’wa ubaponena mu kīna mu dya Sabato, le i ani mu bukata mwenu kasapo kwiukwata ne kwiwabula’mo?” (Mateo 12:11) Mukōko umo i lupeto, o mwanda kebabwanyapo kwiuleka ulāle mu kina; mwanda ubwanya kufwa, nabya abajimija lupeto. Ino Bisonekwa binena’mba: “Moloke utanga mutyima ku banyema bandi ba nja.”​—Nkindi 12:10.

Yesu pa kwibidingakanya mobyendele, wanena’mba: “Muntu utabukile mukōko bulēme papo ke pepi! Nanshi ke kijilapo kulonga kintu kilumbuluke mu dya Sabato.” (Mateo 12:12) Nanshi, Yesu kajilwilepo dya Sabato pa kubelula muntu. I bikomo bendeji ba bipwilo batune uno mulangwe mwendele’mo, mulangilo wa lusa. O mwanda abaube nyā.

Yesu pa kufītwa ne bulanda ponka mwanda wa milangwe yabo minyengakane watale koku ne koku. Ko kunena muntu’wa amba: “Olola kuboko.” (Mateo 12:13) Muntu’wa pa kōlola kuboko kwandi kūmu, enka papo kubakoma ne kukoma. Kino kibasangaja uno muntu, ino le bibaikala namani ku boba badi bata Yesu makinga?

Pa kyaba kya kusangala’mba kuboko kwa muntu kubakoma, Bafadiseo abatambe panja kukuta kitumba “na kitango kya balondi ba Heloda, mwanda wa kumwipaya [Yesu].” (Mako 3:6) Padi mu kino kitango kya politike mudi ne bantu ba kisumpi kikwabo kya kipwilo kya Basadusea. Tamba kala, Basadusea ne Bafadiseo kebadipo beivwana, ino pano abekute bininge mu bumo mwanda wa kulwa na Yesu.