Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 28

I Kika Kekishikidilwapo Bana ba Bwanga ba Yesu na Nzala?

I Kika Kekishikidilwapo Bana ba Bwanga ba Yesu na Nzala?

MATEO 9:14-17 MAKO 2:18-22 LUKA 5:33-39

  • BANA BA BWANGA BA YOANO ABAIPANGULA YESU MWANDA UTALA KUSHIKILWA NA NZALA

Yoano wakutyilwe kyaba kityetye kupwa kwa Yesu kutanwa ku Pashika wa mu 30 Yesu ke mwiye. Yoano wadi usaka bana bandi ba bwanga bekale balondi ba Yesu, ino ke bonsopo baikele’bo mu myeji mityetye ilondakana na kukutwa kwa Yoano.

Pano, Pashika ya mu 31 Yesu ke mwiye ibafwena, bana ba bwanga bamo ba Yoano abaiya kwipangula Yesu amba: “Mwanda waka batwe ne Bafadiseo tushikilwanga na nzala ino bobe bana ba bwanga kushikilwa na nzala mpikila?” (Mateo 9:14) Bafadiseo bashikilwanga na nzala bu kisela kya kipwilo. Mwenda mafuku, Yesu waletele ne kimfwa kya Mufadiseo umo wadi wimona bu moloke ulombela’mba: “A Leza, nakufwija’ko mwanda ami nkidipo mwikadile bantu bakwabo . . . Nshikilwanga na nzala misunsa ibidi ku yenga.” (Luka 18:11, 12) Mobimwekela bana ba bwanga ba Yoano nabo badi bashikilwa na nzala bu kibidiji. Nansha padi, bakwabo badi bashikilwa mwanda wa kudila kukutwa kwa Yoano. Padi boba batala nabo, beipangulanga mwanda waka bana ba bwanga ba Yesu kebashikilwapo na nzala mwanda wa bulanda bwa byobya bitene Yoano.

Yesu walondolola na kuleta kimfwa kimo amba: “Balunda na musoñañani kebadipo ne kyobadidila madilo kine pobakidi na musoñañani, ke amopo? Ino mafuku akāya’ko pakebatalulwa musoñañani, penepa kebakashikilwa na nzala.”​—Mateo 9:15.

Yoano mwine watelele Yesu bu musoñañani. (Yoano 3:28, 29) I amo, shi Yesu mwine ukidi’po, bana ba bwanga bandi kebadipo na kyobashikidilwa na nzala kine. Mwenda mafuku pasa kufwa Yesu, bana bandi ba bwanga bakadila kadi kebakekalapo ne na mutyima mwine wa kudya. Ino pakasangulwa Yesu, bintu bikashinta. Kebakekalapo na kintu kya kwibalengeja bashikilwe na nzala badila.

Kupwa, Yesu waleta bino byelekejo bibidi: “I kutupu welanga kilaka kya kisandi kipya ku kivwalwa kikulu kya pangala, mwanda kilaka kipya kitukumukanga pa kivwalwa ne kipunzu nakyo kyabaila’ko bibi kutabuka. Kadi bantu kebelangapo vinyu mipya mu milondo ya biseba mikulu. Shi beyele’mo, nankyo milondo ya biseba ikasabika, vinyu nayo yamwangika ne milondo mine yaoneka. Ino bantu belanga vinyu mipya mu milondo ya biseba mipya.” (Mateo 9:16, 17) I bika bisaka kunena Yesu?

Yesu usaka kukwasha bana ba bwanga ba Yoano Mubatyiji bayuke amba, balondi ba Yesu kebanenwepo kulonda bisela bya kala bya Bayuda, kimfwa kisela kya kushikilwa na nzala. Kaidilepo kulongolola nansha kwendeleja bya kala, mutōtelo moneke, ngikadilo yonso ya mutōtelo usa kutalulwa’ko. Mutōtelo ukankamika Yesu ke owapo wa Buyuda ulonda bisela bya bantu. Kakimbengapo kulamika kilaka kya kisandi kipya pa kivwalwa kya kala, nansha kwela vinyu mipya mu milondo ya biseba myūmu kadi ya kala.