Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 96

Yesu Walondolola Nkasampe Umo Mpeta Kadi Muledi

Yesu Walondolola Nkasampe Umo Mpeta Kadi Muledi

MATEO 19:16-30 MAKO 10:17-31 LUKA 18:18-30

  • MPETA UMO WAIPANGULA PA BITALA BŪMI BWA NYEKE

Yesu ukyenda upita mu Pelea paenda ku Yelusalema. Mpeta umo nkasampe wanyemena kwadi ne kupona ku maulu a Yesu. Uno muntu i “muledi umo,” padi wingilanga bu mwendeji wa shinankonka nansha padi i wa mu Sanedini. Waipangula’mba, “A Mufundiji Muyampe, i kika kyomfwaninwe kulonga nkapyane būmi bwa nyeke?”​—Luka 8:41; 18:18; 24:20.

Yesu wamulondolola’mba, “Kyoungityila bu muyampe i kika? I kutupu muyampe poso umo kete, ke Leza kadi.” Padi uno nkasampe waingidija kishima “muyampe” bu kitenta, na mulongelanga balabi. Nansha Yesu byadi mufundiji muyampe, ino wasake muntu ayuke amba kino kitenta, “Muyampe” kifwaninwe’nka Leza kete.

Wamudingila’mba, “Ino shi usaka kukatwela mu būmi, nankyo londa nyeke mbila.” Ebiya nkasampe’wa waipangula’mba: “Mbila’ka?” Yesu watela itano mu Mbila Dikumi​—itala pa kwipayañana, makoji, kwiba, kuleta bukamoni bwa bubela, ne kulēmeka bambutwile. Kupwa wabweja’ko mbila mikatampe kutabuka amba: “Sanswa mukwenu mowisanshilwe abe mwine.”​—Mateo 19:17-19.

Muntu’wa walondolola’mba, “Amiwa ndamine byabyo byonso’byo; i kika kikwabo kyombudilwe?” (Mateo 19:20) Wemone bu kudi kintu kampanda kiyampe kyabudilwe, kilongwa kya bukankamane kikamulengeja akamone būmi bwa nyeke. Yesu pa kumona kininga kyandi kya kulomba, “wamusanswa.” (Mako 10:21) Inoko, uno muntu udi na kijika kimukankaja.

Uno muntu ulamete bininge ku bintu byandi, o mwanda Yesu wamunena’mba: “Kudi kintu kimo kyowabulwa: Enda, kapoteje bintu byodi nabyo ne kupāna ku balanda, penepo ukekala na byabulēme mūlu; kupwa iya wikale mulondi wami.” Bine, uno muntu udi na muswelo wabila lupeto lwandi ku balanda bene kebabwanyapo kumujokeleja kintu, ebiya ekale mwanā bwanga wa  Yesu. Padi Yesu wamukwatyilwa bulanda, wamumone utaluka ne kwenda mufītwe. Kulamata kulamete uno muntu ku bupeta, ku byandi “bintu bingibingi,” kubamusabe meso kakimwene bupeta bwa binebine. (Mako 10:21, 22) Yesu wanena amba: “Bine kikekala kikomo bininge ku boba badi na lupeto kutwela mu Bulopwe bwa Leza!”​—Luka 18:24.

Bana ba bwanga abatulumuka bino binenwa ne bikwabo byabweja’ko Yesu amba: “I kipēla’ko ngamedia kupita mu keso ka lushinge lusonwa nalo kutabuka’ko mpeta kutwela mu Bulopwe bwa Leza.” Kino kibalengeja bana ba bwanga bepangule amba: “Le i ani ubwanya kukapanda?” Le kupanda i kukomo kekubwanyapo kufikila’po muntu? Yesu webatale sō ne kunene’mba: “Byobya bintu kebibwanikangapo kudi bantu bibwanikanga kudi Leza.”​—Luka 18:25-27.

Petelo walombola’mba i mulonge butongi bwishile na bwa uno mpeta, wanena’mba: “Tala! Batwe tubashiye bintu byonso ketukulonda; penepo, i bika bine byotukatambula?” Yesu walombola byobakamwena mu butongi bwabo buyampe amba: “Kitatyi kya kupangulula, pakashikata Mwanā muntu pa lupona lwandi lwa ntumbo, banwe banonda nenu mukashikatanga pa mpona 12, mutyiba mambo a bisaka 12 bya Isalela.”​—Mateo 19:27, 28.

Na bubine, Yesu ulañanga kitatyi kya kumeso kikapangululwa bintu pano pa ntanda amba ijokele mu ngikadilo yo yādi’mo mu budimi bwa Edena. Petelo ne bana ba bwanga bakwabo bakaludika na Yesu Paladisa ya pano pa ntanda, mpalo keidingakenepo nansha na kwipāna kobepāna!

Inoko mpalo yabo ke enkapo ya kumeso. Kudi imo imwenine kala bana bandi ba bwanga. Yesu wanena’mba: “I kutupu washile njibo nansha mukaji nansha banababo nansha bambutwile nansha bana pa mwanda wa Bulopwe bwa Leza ukabulwa kutambula misunsa mivule mpata mu kino kitatyi, kadi mu ngikadilo ya bintu ikāya’ko namo, būmi bwa nyeke.”​—Luka 18:29, 30.

Bine konso kwenda bana ba bwanga, bemwenanga bu bana na bana bwa batōtyi nabo bobapwene nabo bininge ne bulēme kupita ne bwa banababo ba ku mashi. I kya bulanda, uno mpeta nkasampe muledi usa kujimija dyese dyandi enka ne mpalo ya būmi mu Bulopwe bwa Leza bwa mūlu.

Yesu wabweja’ko amba: “Ino bavule babajinji bakekala ba mfulo, ba mfulo nabo babajinji.” (Mateo 19:30) Le ko kunena namani?

Mpeta nkasampe muledi byadi wa mu bendeji Bayuda, udi mu “babajinji.” Byalamine mbila ya Leza nanshi udi na dyese dya kumona bivule kumeso. Ino aye watūla bupeta ne bintu byandi kumeso kwa byonso mu būmi bwandi. Kino kibeshila na mwalongela bantu bitupu bamona Yesu ufundija bubine ne kulombola dishinda ditwala ku būmi. Nanshi badi “ba mfulo,” ino pano abaikala “babajinji.” Bakokeja kutengela kushikata pa mpona ya mūlu na Yesu ne kuludika Paladisa ya pano pa ntanda.