Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 99

Yesu Wabelula Bampofu ne Kukwasha Zakiasa

Yesu Wabelula Bampofu ne Kukwasha Zakiasa

MATEO 20:29-34 MAKO 10:46-52 LUKA 18:35–19:10

  • YESU WABELULA BAMPOFU MU YEDIKO

  • ZAKIASA MUSONKEJI WA MUSONKO WESĀSA

Yesu ne boba badi benda nandi abafika mu Yediko, pantu pendwa lwendo lwa difuku dimo na ku Yelusalema. Mungya buluji, Yediko i bibundi bibidi, kibundi kya kala kidi ku kintu kya kilometele 1 ne kipindi shi utamba ku kibundi kya panopano kyāūbakilwe mu kitatyi kya Loma. Yesu ne kibumbo pobapita mu kibundi kimo ke bafwena ku kikwabo, bampofu babidi ba lulombo abaivwana lunwa. Mpofu umo i Batemisa.

Batemisa ne mukwabo’wa pa kwivwana Yesu upita abaela lubila amba: “A Mfumwetu, witufwile’ko lusa, Mwanā Davida!” (Mateo 20:30) Bamo mu kibumbo abebafunina’mba talalai, ino abo po pene abatundwila’ko mawi. Yesu pa kwivwana lunwa’lo, waimana. Wasapwila baenda nandi bete yao wela mabila’ye. Abaenda kudi ba lulombo ne kusapwila umo amba: “Kankamana! Imana; yao ukwita.” (Mako 10:49) Pa kwivwana nsangaji, mpofu’wa waela kivwalwa kyandi kya pangala, waimana, kaenda kudi Yesu.

Yesu webepangula’mba: “Le musaka nemulongele bika?” Bampofu babidi’ba abamuzenze amba: “Mfumwetu, meso etu apūtuke.” (Mateo 20:32, 33) Yesu pa kukwatwa lusa, watenga meso abo, wanena umo amba: “Enda. Lwitabijo lobe lubakukomeja.” (Mako 10:52) Bampofu babidi ba lulombo bamona, ne kutatana mpika, abo bonso bubidi bashilula kutumbija Leza. Bantu pa kumona byalongeka, nabo kebatendela Leza. Bantu badi bampofu’ba abashilula kulonda Yesu.

Kudi bibumbo bikatampe bijokolokele Yesu papita mu Yediko. Muntu ense usaka kumona muntu mwine wabelulanga bampofu. Bantu abatyinye Yesu ku mitamba yonso; bakwabo kebabwenyepo nansha kumumona kwine. Ne Zakiasa nandi kamumwene. I mukatampe wa basonkeja musonko mu Yediko ne kufula kufula kwandi. Byadi mwipi, kabwanyapo kumona bipita. O mwanda Zakiasa wanyema lubilo kukakanda ku mutyi wa shikama (kikuyu kya ntanda), mutyi udi kufula kwa dishinda dyapityila’mo Yesu. Zakiasa padi kūlu, wamone byonso senene. Yesu pa kufwena ne kumona Zakiasa kūlu, wanena’mba: “Zakiasa, tūka bukidi, mwanda dyalelo mfwaninwe kushikata mu yobe njibo.” (Luka 19:5) Zakiasa watūka ne kwenda lubilo ku njibo mwanda wa kutambula mweni wa pa bula.

Bantu pa kumona byalongeka kebeuninga. Abamone amba ke kyendele’mopo Yesu ekale mweni wa muntu obamona bu kipya-mambo. Zakiasa i mupetele mu manyengenyenge na kusonkeja musonko.

Yesu pa kutwela mu njibo ya Zakiasa, bantu kebatompola’mba: “Waenda kukafikila bu mweni ku njibo ya kipya-mambo.” Ino Yesu aye wamone amba Zakiasa ubwanya kwisāsa. O mwanda kafītyilwepo mutyima. Zakiasa waimana ne  kumulombola’mba: “Tala! A Mfumwami, kipindi kya bintu byami nsa kupāna’kyo ku balanda, kadi kyonso kyonaselele muntu ku manyengenyenge, nsa kumwalwija’kyo paná.”​—Luka 19:7, 8.

Uno shao o muswelo mulumbuluke walombola Zakiasa amba wesāsa bya binebine! Padi wapikula mu byalembele mwanda wa kuyuka bungi bwa bintu byaayete Bayuda palapala, watyipe kujokeja’byo paná. Kibapite ne bine bilombelwe mu bijila bya Leza. (Divilu 22:1; Levi 6:2-5) Kadi Zakiasa walaya kuyata kipindi kya bintu byandi abile’byo balanda.

Yesu wasangela bino biyukeno bya kwisāsa kwa Zakiasa, wamunena’mba: “Dyalelo dino’di lupandilo lubaiya ku ino njibo mwanda nandi i mwanā Abalahama. Mwanda Mwanā muntu waile kukimba ne kupandija kyokya kyadi kijimine.”​—Luka 19:9, 10.

Kepaijije na pesambīle Yesu pa ‘kujimina’ mu kyelekejo kyandi kya mwana mujimine. (Luka 15:11-24) Pano waleta kimfwa kimwekelele kya muntu wadi’nka bwa mujimine ino pano wamweka. Bendeji ba bipwilo ne balondi babo ye bano abatompwela Yesu ne kumufutulula pa kuta mutyima bantu badi bwa Zakiasa. Nansha nankyo, Yesu ukikimba’nka kukimba bano bana bajimine ba Abalahama.