Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Yesu​—Dishinda, Bubine, ne Būmi

 SHAPITA 93

Mwanā Muntu Usa Kusokolwa

Mwanā Muntu Usa Kusokolwa

LUKA 17:20-37

  • BULOPWE BUDI UMBUKATA MWABO

  • LE BIKEKALA NAMANI SHI YESU WASOKOLWA?

Yesu ukidi shi mu Samadia shi mu Ngadilea. Bafadiseo abamwipangula pano mwanda utala kufika kwa Bulopwe, bobatengele amba busa kwiya na byungwe ne bintyilantyila. Ino webanena’mba: “Bulopwe bwa Leza kebusapo kwiya bumwekelele patōka; kadi bantu kebakanenapo amba, ‘Talai kuno!’ nansha’mba, ‘Kokwa!’ Mwanda talai! Bulopwe bwa Leza budi umbukata mwenu.”​—Luka 17:20, 21.

Bamo abalanga’mba Yesu wanena amba umbikalo wa Bulopwe udi mu mityima ya bengidi ba Leza. Ino ke amopo, Bulopwe bwa Leza kebudipo mu mityima ya Bafadiseo besamba na Yesu. Ino budi umbukata mwabo mwanda Yesu, Mulopwe mutongwe wa Bulopwe bwa Leza udi umbukata mwabo.​—Mateo 21:5.

Bimweka bu Bafadiseo pa kupwa kutaluka, Yesu washintulwila’ko bandi bana ba bwanga myanda mikwabo itala kwiya kwa Bulopwe. Pa bitala kwikala’po kwandi mu lupusa lwa Bulopwe, webadyumuna bidi amba: “Mafuku akāyanga’ko omukasaka kumona difuku dimo dya mu mafuku a Mwanā muntu, ino kemukedimonepo.” (Luka 17:22) Yesu walombola amba kubikikwa kwa Mwanā Muntu mu Bulopwe kukīya kumeso. Kino kitatyi pokekyafikile, bana ba bwanga bamo babwanya kusela mityima kūlu ne kwibukimba, bafwaninwe kwendelela kwibukungila kufika ne kitatyi kitungwe na Leza kya Mwanā muntu kwiya.

Yesu ubweja’ko amba: “Bantu bakemunena’mba, ‘Talai kokwa!’ nansha’mba, ‘Talai kuno!’ Kemwakitambai nansha kwibalonda. Mwanda enka mupenenanga dipeni ku mutamba umo wa diulu kufika ne ku mutamba mukwabo wa diulu, ne Mwanā muntu nandi ukekala’nka nabya mu difuku dyandi.” (Luka 17:23, 24) Le bana ba bwanga ba Yesu bakakingwa namani kutyina kulonda bameshiasa ba bubela? Yesu wanena’mba kwiya kwa Meshiasa wa bine kukamweka patōka tō. Bukamoni bwa kwikala’po kwandi mu Bulopwe bukamweka ku bonso batala.

Kupwa Yesu watela binkumenkume bya kala mwanda wa kudingakanya mukekadila bantu mu kitatyi’kya amba: “Monka mobyālongekele mu mafuku a Noa, e mobikekadila ne mu mafuku a Mwanā muntu . . . Kadi, monka mokyālongekele mu mafuku a Lota: bādi badya, batoma, bādi bapota, bapoteja, bādi bakuna, bādi bobaka. Ino difuku dyātambile Lota mu Sodoma, mudilo ne bibidikityi byānoka mūlu byēbonakanya bonso. Bikekalanga muswelo umo onka mu dyodya difuku dikasokolwa Mwanā muntu.”​—Luka 17:26-30.

Yesu kanenenepo amba bantu ba mu mafuku a Noa ne a Lota bāonakanibwe mwanda bādi balondalonda mingilo myendele’mo ya difuku ne difuku kimfwa, kudya, kutoma, kupota, kupoteja, kukuna, ne kūbaka. Noa, Lota ne bisaka byabo nabo bādi balonga bimo pa bino. Ino bantu bakwabo bādi balonga’byo pampikwa kuta  mutyima ku kiswa-mutyima kya Leza ne kusūla kitatyi kyobadi’mo. Nanshi Yesu udyumunanga bandi bana ba bwanga bate mutyima ku kiswa-mutyima kya Leza ne kwikilonga na bukankamane. Mu uno muswelo, webalombola muswelo wa kulamwa​—ko kunena’mba, kupandija būmi bwabo​—pakaleta Leza bonakani kumeso’ku.

Bana ba bwanga bafwaninwe kwepuka kupuakanibwa na bintu bya mu ino ntanda yobadi’mo, “bintu bidi kunyuma.” Yesu wanena’mba: “Mu dyodya difuku, muntu udi pa musaka wa njibo inoko aye na bintu byandi mu njibo kakitūka kusela’byo, mo monka ne muntu udi mu budimi nandi kafwaninwepo kujokela ku bintu bidi kunyuma. Vulukai mukaja Lota.” (Luka 17:31, 32) Waālamukile ke kyulu kya mwepo.

Yesu pa kwendelela kushintulula ngikadilo ikekala’ko pakabikikwa Mwanā muntu bu Mulopwe, wasapwila bandi bana ba bwanga amba: “Mu bobwa bufuku, bantu babidi bakekala pa butanda bumo; umo ukaselwa, mukwabo ukashibwa.” (Luka 17:34) Nanshi bamo bakapanda, ino bakwabo bakashibwa, ke kujimija būmi bwabo kadi.

Bana ba bwanga abaipangula’mba: “A Mfumwetu, i kwepi?” Yesu webalondolola’mba: “Kokwa kudi umbidi, ko konka kukebungila ne mikebo mine.” (Luka 17:37) Bine bamo bakamona kulampe bwa mikebo. Bano bana ba bwanga bakebungila kudi Kidishitu wa bine, ke Mwanā muntu kadi. Mu kine kitatyi kya kumeso’kya, Yesu ukapa bandi bana ba bwanga bubine bupāna būmi ku boba badi na lwitabijo.