Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 91

Lazalasa Wasanguka

Lazalasa Wasanguka

YOANO 11:38-54

  • LUSANGUKILO LWA LAZALASA

  • SANEDINI WAKWATA NKUKU YA KWIPAYA YESU

Yesu pa kupwa kwitana na Mata ne Madia kubwipi na Betani, abaenda ku kibundu kya Lazalasa. I mutá mujikwe na dibwe ku kibelo. Yesu wasoñanya amba, “Talulai dibwe.” Mata byakayukilepo bisaka kulonga Yesu, wanena mwalangila’mba. “A Mfumwami, pano ye uno kanunka, mwanda kepadi mafuku aná.” Ino Yesu wamusapwila’mba: “Mwene nakulombolanga’mba shi witabije usa kumona ntumbo ya Leza?”​—Yoano 11:39, 40.

Ebiya abatalula dibwe. Yesu watulula meso mūlu kalombela’mba: “A Tata, wafwa’ko ne kungivwana. Bine, ndyukile amba ungivwananga mafuku onso; ino nanena pa mwanda wa kibumbo kimene koku ne koku, amba betabije amba abe wantumine.” Byalombela Yesu ku meso a  bantu bibalombola boba batala amba byakasake kulonga kalonga’byo na bukomo bwa Leza. Kupwa Yesu waela diwi dikatampe amba: “Lazalasa, tamba’mo!” Lazalasa awa utamba’mo, makasa ne maulu mapombe bipeta byobamujīkile nabyo ne kisandi mu mpala. Yesu wanena’mba: “Mukutululei mumuleke ende.”​—Yoano 11:41-44.

Bayuda bavule badi baye kusenga ba Madia ne Mata pa kumona kino kingelengele, abaitabija mudi Yesu. Ino bakwabo abaenda kukasapwila Bafadiseo byobya byalonga Yesu. Bafadiseo ne babitobo bakulu abebunge mu Sanedini, kidye kikatampe kya Bayuda. Mu kino kitango mudi ne kitobo mukatample, Kaifasa. Bamo mobadi abetompwela’mba: “Le tulonga namani, mwanda uno muntu walonga biyukeno bivule? Shi tumuleke nenki, bonso bakekala na lwitabijo mudi aye, kadi bene Loma bakāya kwituyata kifuko kyetu ne muzo wetu mwine.” (Yoano 11:47, 48) Nansha byobaivwana tumoni twimwenine na meso bukamoni bwa amba Yesu “walonga biyukeno bivule,” bano bantu kebasangedilepo bilonga Leza kupityila kwadi. Kibajinji kyobatele’ko mutyima i bitenta ne lupusa lwabo.

Kusangulwa kwa Lazalasa kubaikala bu kyaso kikatampe ku Basadusea bene kebakulupilepo mu lusangukilo. Kaifasa, Musadusea kishima-tentu amba: “Banwe kemudipo ne kyomuyukile kine, kadi kemujingulwilepo amba i kya kamweno komudi amba umo afwile bantu pa kyaba kya muzo onso konakanibwa.”​—Yoano 11:49, 50; Bilongwa 5:17; 23:8.

Kaifasa byadi ye kitobo mukatampe, Leza wamulengeja anene bino bintu​—kanenene’byopo “na milangwe ya aye mwine.” Kaifasa wanena’mba Yesu ufwaninwe kwipaibwa kutyina lupusa ne bulēme bwa bendeji ba bipwilo bya Bayuda bwakapwa. Ino Kaifasa wanena mu bupolofeto mwanda utala lufu lwa Yesu, amba lukaleta kinkūlwa, ke’nkapo ku Bayuda ino i ne ku ‘bana bonso ba Leza badi bapalakane.’​—Yoano 11:51, 52.

Kaifasa wabwanya kutonona Sanedini akwate nkuku ya kwipaya Yesu. Nikodema wa mu Sanedini kadi mulunda na Yesu, le watompele kumusokwela nkuku’ya? Nansha bikale namani, Yesu wataluka mu Yelusalema kutyina wakafwa kumeso kwa kitatyi kitungilwe na Leza.