Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 98

Batumibwa Abafwila Monka Bukata

Batumibwa Abafwila Monka Bukata

MATEO 20:17-28 MAKO 10:32-45 LUKA 18:31-34

  • YESU WALAYA MONKA LUFU LWANDI

  • WAPWIJA MWANDA WA BATUMIBWA BASAKA BUKATA

Yesu ne bana bandi ba bwanga bakidi mu lwendo lwa ku Yelusalema, i bapityile dya kunshi, ku Pelea, abaabuka Munonga wa Yodano udi kubwipi na Yediko. Kudi bakwabo benda nabo ku Pashika wa mu 33 Yesu ke mwiye.

Yesu udi kumeso kwa bandi bana ba bwanga, usumininwe kufika mu kibundi pa kitatyi mwanda wa Pashika. Ino bana ba bwanga badi na moyo. Mafuku kunyuma pafwile Lazalasa, Yesu wadi kasake kutamba ku Pelea, ende ku Yudea, Tomase wasapwila bakwabo amba: “Twendei netu, amba tukafwe nandi pamo.” (Yoano 11:16, 47-53) Mwanda kwenda ku Yelusalema kudi kyaka, bana bandi ba bwanga bakwatwa moyo amba i bikomo kwivwana.

Yesu pa kusaka kuteakanya batumibwa bandi ku bimutengele kumeso webaselela kufula kaebasapwila’mba: “Yeu tukanda ku Yelusalema, Mwanā muntu ukapānwa ku babitobo bakulu ne basonekeji. Bakamuponeja’mba epaibwe kadi bakamupāna ku bantu ba mizo, amba bamusepe bya kibengo ne kumukupila nsonde ne kumupopa ku mutyi; kupwa mu difuku dya busatu, ukasangulwa.”​—Mateo 20:18, 19.

Uno i musunsa wa busatu wasapwila Yesu bana bandi ba bwanga mwanda wa lufu ne lusangukilo lwandi. (Mateo 16:21; 17:22, 23) Inoko, mu uno musunsa webasapwila’mba usa kwipaibwa ku mutyi. Abamwivwana, ino kebevwanijepo buluji bwa byaanena. Padi batengele kujokejibwa pano pa ntanda kwa bulopwe bwa Isalela amba bekale na ntumbo ne bulēme mu bulopwe bwa pano pa ntanda bwa Kidishitu.

Inandya mutumibwa, Yakoba ne Yoano, padi i Salome udi mu mulongo wa benda. Yesu wapele bano batumibwa babidi dijina dishintulula’mba “Bana ba Mikungulo,” ne kutatana mpika i pa mwanda kebejangapo kuloba. (Mako 3:17; Luka 9:54) Kyaba kimo, bano bantu babidi  balombwele mutyima wabo wa kusaka bukata mu Bulopwe bwa Kidishitu. Inabo uyukile’o. Pano wafwena Yesu pa mwanda wabo, wafukata ku meso andi ne kumulomba ebatōkelwe mutyima. Yesu wamwipangula’mba: “Le usaka bika?” Nandi amba: “Leta kishima’mba bano bami bana babidi’ba bashikate, umo ku kuboko kobe kwa lundyo mukwabo nandi ku lunkuso lobe, mu Bulopwe bobe.”​—Mateo 20:20, 21.

Byaalomba i bimulombwele ba Yakoba ne Yoano. Yesu watela bumvu ne kufutululwa kwasa kufutululwa, webalombola’mba: “Banwe kemuyukilepo byomulomba’byo. Le mubwanya kutoma kitomeno kyonsa kutoma?” Nabo bamunena’mba: “En-en tubwanya.” (Mateo 20:22) Ne pano pene kebevwanijepo byasaka kunena.

Ino Yesu webasapwila amba: “Bine mukatoma kitomeno kyami, ino kushikata ku kuboko kwami kwa lundyo ne ku lunkuso lwami ke kyamipo kya kupāna, ino i kya boba balongolwedilwe’kyo kala na Tata.”​—Mateo 20:23.

Batumibwa bakwabo dikumi abafītwa pa kwivwana byalomba ba Yakoba ne Yoano. Le i mwanda ba Yakoba ne Yoano bo besambile bininge pobadi bafwila bukata musunsa mukwabo’wa? (Luka 9:46-48) Nansha nankyo, ino byobalomba pano bilombola’mba ba Dikumi ne Babidi kebalondelepo madingi ebapele Yesu a kwityepeja. Bakifwila ne pano bukata.

Yesu watonge kupwija luno lupata ne kine kilengeje baleke kumvwañana. Waityila pamo ba Dikumi ne Babidi ne kwibadingila na buswe amba: “Muyukile amba boba bamweka bu babikele bantu ba mizo bebatādilanga kadi bakatampe babo bengidijanga lupusa pobadi. Kekifwaninwepo kwikala namino mu bukata mwenu; ino yewa usaka kwikala mukatampe mu bukata mwenu ufwaninwe kwikala mwingidi wenu, kadi yewa usaka kwikala mubajinji mu bukata mwenu ufwaninwe kwikala umpika wa bonso.”​—Mako 10:42-44.

Yesu walombola patōka kimfwa kyobafwaninwe kwiula​—ke kimfwa kyandi kadi. Washintulula amba: “Monka mwaidile Mwanā muntu, ke mwandapo wa kwingidilwa, aa, ino i kwingidila bantu ne kupāna būmi bwandi ke kinkūlwa kya kukūla bavule bene.” (Mateo 20:28) Kintu kya myaka isatu, Yesu wadi’nka wingidila bakwabo. Kadi usa kwibengidila mu muswelo mukatampe na kufwa mwanda wa bantu! Bana ba bwanga nabo basakilwa kwikala na mutyima wa Kidishitu, kwingidila bakwabo pa kyaba kya kwingidilwa, ne wa kwikala mutyetye pa kyaba kya kusaka bukata.