Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 88

Kushinta kwa Mpeta ne kwa Lazalasa

Kushinta kwa Mpeta ne kwa Lazalasa

LUKA 16:14-31

  • KYELEKEJO KYA MPETA NE LAZALASA

Yesu wapele bana bandi ba bwanga bufundiji bulumbuluke bwa mwa kwingidijija bupeta bwa ku ngitu. Ino ke’nkapo bana ba bwanga bamwivwene. Bafadiseo nabo badi’po, kadi badi bafwaninwe kulonda madingi a Yesu. Mwanda? Mwanda nabo i “bansanswa-lupeto.” Abo pa kwivwana byanena Yesu, ‘bashilula kumusepa bya kafutululo.’​—Luka 15:2; 16:13, 14.

Nansha nankyo Yesu katuyukile’byopo. Webanena’mba: “Banwe e boba betelanga bu boloke ku meso a bantu, ino Leza uyukile mityima yenu. Mwanda kyokya kimona bantu bu kizunzulwe i kya munyanji ku meso a Leza.”​—Luka 16:15.

Tamba kala Bafadiseo ‘bazunzwilwe na bantu,’ ino pano ke kitatyi kifwaninwe kya kushinta, kitatyi kya mpeta ekale mulanda. Boba badi batumbijibwa na bantu, bampeta mu ino ntanda, bankomokomo mu politike, mu bya bipwilo abafwaninwa pano kutūkijibwa pa nshi. Bantu bitupu bayukile bisakibwa byabo bya ku mushipiditu abafwaninwa kuzunzulwa. Yesu walombola patōka’mba kusa kwikala kushinta kukatampe, wanena’mba:

“Bijila ne Bapolofeto byāikele’ko kufika ne kudi Yoano. Tamba penepa, Bulopwe bwa Leza busapulwanga bu myanda miyampe, kadi bantu ba miswelo yonso beelelanga na kininga kwenda’ko. I bine, i kipēla diulu ne ntanda kupita kutabuka’ko kapindi ka disomo ka mu Bijila kapite kufikidila mpika.” (Luka 3:18; 16:16, 17) Le binenwa bya Yesu bilombola namani amba kuno kushinta kulongekanga pano?

Bendeji ba bipwilo bya Bayuda bemonanga na mitatulo amba balamete ku Bijila bya Mosesa. Vuluka, Yesu paajokejije muntu umo bukomo bwa kumona mu Yelusalema, Bafadiseo banenene na mitatulo amba: “Batwe twi bana ba bwanga ba Mosesa. Tuyukile amba Leza wēsambile na Mosesa.” (Yoano 9:13, 28, 29) Kitungo kibajinji kyāpedilwe Mosesa Bijila i kuludikila boba betyepeje kudi Meshiasa, ko kunena’mba Yesu. Yoano Mubatyiji wāyukenye Yesu bu Kana ka Mukōko ka Leza. (Yoano 1:29-34) Kushilwila’tu paānjile Yoano mwingilo, Bayuda betyepeje, nakampata balanda, bāivwene myanda ya “Bulopwe bwa Leza.” Bine, kudi “myanda miyampe” ku boba bonso basaka kubikalwa na Bulopwe bwa Leza ne kumwena’mo.

Bijila bya Mosesa bifikidilanga; ne kadi bidi, i bitwale bantu kudi Meshiasa. Kukimba kwibilonda ke kupwe kala. Kimfwa, Bijila byādi bipa muntu lupusa lwa kwilubula pa mwanda o-onso, ino pano Yesu washintulula’mba “yewa ulubula wandi mukaji kadi wasonga mukwabo nankyo walonga makoji, kadi yewa usonga mwana-mukaji mulubulwe na mulume nankyo walonga makoji.” (Luka 16:18) Bine bino binenwa bibalobeja Bafadiseo basenswe kutūla bijilajila!

Yesu pano waleta kyelekejo kishintulula bukatampe  bwa kushinta kulongeka. I kyelekejo kya bantu babidi—būmi bwa muntu ne muntu ne ngikadilo bibashinta mu kitulumukila. Poteja kino kyelekejo, vuluka’mba mu boba bevwana, mudi ne Bafadiseo bansanswa-lupeto batumbijibwa na bantu.

Yesu wanena’mba: “Kwadi mpeta umo wadi uvwala bya bulēme bityilakana ne bya bukonge, wisangaja difuku ne difuku na bukatampe bwa ntumbo. Ino wa lulombo umo utelwa dya bu Lazalasa wadi utūlwa pa kibelo kyandi, musambakane bilonda ngitu yonso, wabila kwikuta bipona ku meza a mpeta. Bine, enka ne bambwa badi bāya bamulamba pa bilonda.”​—Luka 16:19-21.

Bafadiseo basenswe lupeto, le kudi kya kutatena amba i abo belekejibwa na Yesu bu uno “mpeta”? Bano bendeji ba bipwilo bya Bayuda basenswe kuvwala bivwalwa bya katutu. Kutentekela pa bupeta bobadi nabo, i batumbe mwanda wa madyese a mingilo ne mikenga mikwabo yobadi nayo. Bine, kwibelekeja na muntu uvwele bivwalwa bya bulopwe bityilakana kulombola bitenta byabo, kadi bivwalwa bya bukonge bitōka nabyo kulombola boloke bobemona abo bene.​—Danyele 5:7.

Le bano bendeji bampeta ba mitatulo, bamwene namani balanda, ne bantu bitupu? Bebamwene na kafutululo bu ba ‛am ha·’aʹrets, nansha bantu ba pa nshi (ntanda), kebayukilepo ne Bijila bine ne kebafwaninwepo ne  kwibifundija kwine. (Yoano 7:49) Kino kimwekeja ngikadilo ya “wa lulombo . . . utelwa dya bu Lazalasa,” mwine wabila ne “kwikuta bipona ku meza a mpeta.” Pamo bwa Lazalasa udi na bilonda ngitu yonso, bantu bitupu bafutululwanga, bwa abo badi na misongo ya ku mushipiditu.

Ino ngikadilo ya bulanda yāikele’ko mu kitatyi kampanda, ino Yesu wamone amba kitatyi kibafika kya kushinta kukatampe mu ngikadilo ya boba badi bu mpeta ne boba badi bwa Lazalasa.

KUSHINTA KWA MPETA NE KWA LAZALASA

Yesu waendelela na kushintulula kuno kushinta kukatampe. Wanena’mba, “Penepa, mwenda mafuku, wa lulombo’wa wafwa, waselelwa na bamwikeulu ku mutamba wa Abalahama. Kupwa ne mpeta mwine wafwa ne kujīkwa wajīkwa. Penepo aye mu Kibundu watulula meso, papo ususuka bya mwiko, wamona Abalahama kulampe ne Lazalasa ku mutamba wandi.”​—Luka 16:22, 23.

Boba bevwana Yesu bayukile amba Abalahama wāfwile tamba kala kadi udi mu Kibundu. Bisonekwa binena patōka’mba muntu udi mu Kibundu nansha Sheole, kabwanyapo kumona nansha kwisamba, enka ne Abalahama mwine. (Musapudi 9:5, 10) Le penepo bano bendeji ba bipwilo abayuka bine bisaka kwisamba Yesu mu kino kyelekejo? Le i bāni bawaelekeja na bantu bitupu ne na bendeji ba bipwilo bansanswa-lupeto?

Yesu watela kuno kushinta panena’mba ‘Bijila ne Bapolofeto byāikele’ko kufika ne kudi Yoano Mubatyiji. Tamba penepa, Bulopwe bwa Leza busapulwanga bu myanda miyampe.’ Nanshi, i mu kitatyi kya busapudi bwa Yoano ne bwa Yesu Kidishitu mufwa ba Lazalasa ne mpeta ku būmi bwabo ne ngikadilo yabo ya kala, kebadi mu ngikadilo mipya ku meso a Leza.

Nakampata, boba betyepeje ne balanda i basusulwe kitatyi kilampe pampikwa kudishibwa ku mushipiditu. Ino abakwashibwa na musapu utala pa Bulopwe wasapwilwe bidi na Yoano Mubatyiji kupwa ne na Yesu kadi abaitabija’o. Dibajinji badi’tu badya tubintu tutyetye ‘tukukuka ku meza a ku mushipiditu’ a bendeji ba bipwilo. Pano kebadishibwa na bubine bwa kamweno bwa mu Bisonekwa, nakampata bintu bya kutendelwa bishintulula Yesu. Abaikala pano bwa abo badi mu ngikadilo miyampe ku meso a Yehova Leza.

Ino, boba bampeta ne bendeji ba bipwilo badi na lupusa lukatampe i bapele kwitabija musapu wa Bulopwe wadi usapula Yoano ne owa usapula Yesu konsokonso mu ntanda’ya. (Mateo 3:1, 2; 4:17) Ino i balobe ne kususuka pa mwanda wa uno musapu, bukalabale bwa Leza busa kwibafikila. (Mateo 3:7-12) Bendeji ba bipwilo  bansanswa-lupeto badi ba kusengwa shi Yesu ne bana bandi ba bwanga abaleka’byo kusapula musapu wa Leza. Bano bendeji ba bipwilo badi pamo bwa mpeta wa mu kyelekejo, ulomba’mba: “A tata Abalahama, mfwile’ko lusa, tuma Lazalasa atubike nsongo ya munwe wandi mu mema antalaje pa ludimi, mwanda namone malwa mu uno mudilo udyendyemuka.”​—Luka 16:24.

Ino kapelwepo byalomba. Bendeji bavule ba bipwilo kebasapo kushinta. I bapele kwivwana “Mosesa ne Bapolofeto,” bene bālembele bintu bifwaninwe kwibatwala ku kwitabija Yesu bu Meshiasa wa Leza ne bu Mulopwe. (Luka 16:29, 31; Ngalatea 3:24) Kadi kebetyepejepo nansha kwifwana balanda betabije Yesu kadi batōkelwa mutyima pano na Leza. Bana ba bwanga ba Yesu abo kebalekele’byopo nansha kutalaja bubine mwanda’tu wa kusangaja bano bendeji ba bipwilo bakimba kusengwa. Yesu washintulula mu kyelekejo kyandi binenwa byānene “Tata Abalahama” kudi mpeta amba:

“A mwana, vuluka’mba powadi mūmi wadi na bintu biyampe biyule bā, ino Lazalasa papo utambula bintu bibi. Ino pano yeu usengibwa kuno, ino nobe komone malwa. Kadi kutentekela pa bino byonso, kudi kinkolankola kikatampe pa bukata bwetu ne banwe, amba boba basaka kutamba kuno kwiya komudi kebakokejapo, nansha bantu kutamba kwako kwabukila kotudi.”​—Luka 16:25, 26.

Bine i kyendele’mo kwikale kuno kushinta kukatampe! Kubaikala kushinta kwa bifuko pa bukata bwa bendeji ba bipwilo ba mitatulo na bantu betyepeje betabija lupungu lwa Yesu. Bano betyepeje abatūkijibwa pano mutyima, abatūjibwa ne kudishibwa ku mushipiditu. (Mateo 11:28-30) Kuno kushinta kusa kumwekela’ko myeji mityetye pasa kupingakanibwa kipwano kya Bijila na kipwano kipya. (Yelemia 31:31-33; Kolose 2:14; Bahebelu 8:7-13) Leza pasa kupungulula mushipiditu ujila mu difuku dya Pentekosa wa mu 33 Yesu ke mwiye, ye pobisa kumwekelela patōka’mba Leza i mwitabije bana ba bwanga ba Yesu, ino i mupele Bafadiseo ne bipwilo bibakwatakenye.