Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 85

Kusangela Kipya-Mambo Wesāsa

Kusangela Kipya-Mambo Wesāsa

LUKA 15:1-10

  • KYELEKEJO KYA MUKŌKO NE KITYELE KIJIMINE

  • BAMWIKEULU BA MŪLU BASANGALANGA

Yesu wakomeneje mu mwingilo wandi kitatyi ne kitatyi kamweno ka kwityepeja. (Luka 14:8-11) Udi na kipyupyu kya kumona bana-balume ne bana-bakaji badi na mutyima wa kwingidila Leza na kwityepeja. Kufika ne pano, bamo mobadi bakiyukene bu babipya-mambo.

Bafadiseo ne basonekeji i bamone bano bantu​—bobamona bu bampikwa mvubu​—bakokwa na Yesu ne na musapu wandi. Abatompola’mba: “Uno muntu’u utambulanga babipya-mambo kadi udya nabo.” (Luka 15:2) Bafadiseo ne basonekeji bemwene bu badi peulu bamona bakwabo pamo bwa butyafu budi mu mayo abo. Bano bendeji bengidijanga kishima kya Kehebelu ‛am ha·’aʹrets’ ko kunena’mba “bantu ba pa nshi [ntanda],” mwanda wa kulombola kafutululo kobafutulwile bantu bakwabo.

Ino Yesu aye wibalēmekele, wibakwete na kanye ne na lusa. Bano bantu ba munshi, kubadila’mo ne boba badi balongalonga bubi, basangedile kwivwana Yesu. Penepa Yesu webimone namani, ne walonga bika pa kulondolola ku matope obamutopeka’mba utambulanga ne kukwasha bano bantu ba munshi?

Malondololo abamweka patōka paasekununa kino kyelekejo kitenga mutyima kiifwene na kyaaletele mu Kapanama. (Mateo 18:12-14) Yesu wasekununa’kyo mu muswelo umwekeja Bafadiseo bu boloke, badi mu luombe lukingwe lwa Leza. Ino, bantu ba munshi abamweka bwa bantu basāsuke ne bajimine. Yesu wanena’mba:

“Le i muntu’ka momudi’mo udi na mikōko 100, shi kubajimina umo, kakashiyepo yoya 99 kunyuma mu ntanda mutuputupu kakalonda owa mujimine kufika ne byawiumona? Kadi aye pa kwiumona, weusela pa bipuji kasepelela. Aye pa kufika kwandi, waita balunda nandi pamo ne balondakani nandi, kaebanena’mba, ‘Sangalai nami pamo, mwanda namone mukōko wami wadi mujimine’wa.’”​—Luka 15:4-6.

I mwanda’ka ukimba kufundija Yesu? Washintulula’mba: “Nemulombola’mba, kukekalanga nsangaji mikatampe mūlu pa mwanda wa kipya-mambo umo wisāsa, kutabuka’ko boloke 99 kebasakilwapo kwisāsa.”​—Luka 15:7.

Kwisāsa kwatela Yesu kubatulumuja Bafadiseo. Bemonanga abo bene bu boloke kebadipo ne kya kwisāshila. Bamo mobadi pobatopekele Yesu mafuku kunyuma amba mwanda udyanga na basonkeja musonko ne babipya-mambo, walondolwele amba: “Naidile kwita babipya-mambo, ke bantu bolokepo, aa.” (Mako 2:15-17) Bafadiseo bemona abo bene bu boloke ba kubulwa  kyobesāshila, kebaletelepo nsangaji mūlu. Ino shi kipya-mambo wesāsa, mūlu mwikalanga nsangaji.

Yesu pa kulombola’mba kujoka kwa kipya-mambo mujimine kuletanga nsangaji mikatampe mūlu, waleta kyelekejo kikwabo kya mwanda ulongekanga mu njibo amba: “Le i mwana-mukaji’ka udi na bityele dikumi bya ndakuma, shi wajimija’ko ndakuma imo, kakākijapo kinanu ne kukomba mu njibo yandi, ukimba biyampe’nka ne byaekimona? Kadi aye pa kwikimona, waita balunda nandi pamo ne balondakani nandi, kanena’mba, ‘Sangalai nami pamo, mwanda namone kityele kya ndakuma kyonajimije’kya.’”​—Luka 15:8, 9.

Bufundiji bwaalupula’mo bubeifwana na bwaalupulanga pa kupwa kuleta kyelekejo kya mukōko mujimine. Pano wanena’mba: “Mo monka, nemulombola’mba, kwikalanga nsangaji mu bamwikeulu ba Leza pa mwanda wa kipya-mambo umo wisāsa.”​—Luka 15:10.

Langa’po bamwikeulu ba Leza basangala nenki kitatyi kijokejibwa kipya-mambo! Kino kidi na mvubu mikatampe mwanda kipya-mambo wisāsa shi watwela kubikala mu Bulopwe bwa Leza momwa mūlu wikalanga pa kifuko kikatampe kupita ne kya bamwikeulu! (1 Kodinda 6:2, 3) Nansha nankyo bamwikeulu kebevwanangapo mukao. Le batwe netu tufwaninwe kwiivwana namani shi kipya-mambo wajokela kudi Leza na kwisāsa bya binebine?