Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 95

Bufundiji Butala pa Dilubu ne Kusanswa Bana

Bufundiji Butala pa Dilubu ne Kusanswa Bana

MATEO 19:1-15 MAKO 10:1-16 LUKA 18:15-17

  • YESU WALOMBOLA MUMWENA LEZA DILUBU

  • KYABUNTU KYA BUKUNGA

  • MVUBU YA KWIKADILA BWA BANA BATYETYE

Yesu ne bandi bana ba bwanga abatambe ku Ngadilea abaabuka Munonga wa Yodano ne kwenda mu dishinda dya kunshi dipityila ku Pelea. Dya mfulo dyadi Yesu mu Pelea, walombwele Bafadiseo mumwena Leza dilubu. (Luka 16:18) Pano abalangula mwanda umo onka mwanda wa kutompa Yesu.

Mosesa wālembele amba mwana-mukaji ubwanya kulubulwa pa mwanda wa “kintu kyampikwa kwendela’mo” kyatanwa mwadi. (Kupituluka 24:1) Kubaikala milangwe mishileshile pa kine kya kulubwila’po mukaji. Bamo bamwene amba ukokeja kulubulwa nansha ke pa kamwanda katyete kene. O mwanda Bafadiseo abaipangula’mba: “Lelo ke kijilapo muntu kulubula wandi mukaji pa myanda yo-yonso?”​—Mateo 19:3.

Yesu pa kyaba kya kutela mulangila bantu, aye watela na bunwa kine kyātūdile’ko Leza busongi. “Le kemwatangilepo amba yewa wēbapangile tamba ku ngalwilo wēbalongele mwana-mulume ne mwana-mukaji ne kunena’mba: ‘O mwanda mwine mwana-mulume ukashiya shandi ne inandi kadi ukalamata wandi mukaji, penepo abo babidi bakekala ngitu imo’? Papo kebakidipo babidi, aa, ino ke ngitu imo. Nanshi kyokya kyakuta Leza pamo mu lupungu, muntu nansha umo kakikalañanya’kyo.” (Mateo 19:4-6) Leza paātūdile’ko busongi pa ba Adama ne Eva, kātūdile’kopo mpangiko ya kutyiba busongi.

Bafadiseo abasela mwanda’wa, abanena Yesu amba: “Mwanda waka Mosesa wāsoñenye kupa mukaji mukanda wa kumupanga ne kumulubula?” (Mateo 19:7) Yesu webasapwila amba: “Pa mwanda wa mityima yenu myūmu, Mosesa wēmulekele mulubule bakaji benu, ino kekyādipo nankyo tamba ku ngalwilo.” (Mateo 19:8) “Tamba ku ngalwilo,” ke kunenapo amba i mu mafuku a Mosesa; ino i tamba Leza utūla’ko busongi mu Edena.

Kupwa Yesu wanena bubine bwa kamweno amba: “Nemunena’mba yewa ense ulubula wandi mukaji shi ke’nkapo pa mwanda wa busekese [mu Kingidiki, por·neiʹa], kadi wasonga ungi nankyo walonga makoji.” (Mateo 19:9) Nanshi mungya Bisonekwa i enka busekese kete o mwanda wa kwilubwila’po.

Kino kibatonona bana ba bwanga banene amba: “Shi bidi nankyo pa bukata bwa muntu ne wandi mukaji, nabya ke biyampepo kusonga.” (Mateo 19:10) Bine, boba bakimba busongi, bafwaninwe kwibumona bu kintu kya lonso!

Pa mwanda utala bukunga, Yesu washintulula’mba bamo i babutulwe bu bantungu, kebadipo na bukomo bwa kusambakena pamo. Bakwabo i batungulwe na bantu, kebakidipo na bukomo bwa bwana-bulume. Ino kudi bakwabo, bakomena kilokoloko kyabo kya kusambakena pamo. Bakomenanga’kyo mwanda wa kuta mutyima bininge ku myanda ya Bulopwe. Yesu wasoñanya bevwaniki bandi amba: “Yewa ubwanya kwitabija’o [wa bukunga] etabije’o.”​—Mateo 19:12.

Bantu abashilula kuleta babo bana batyetye kudi Yesu. Ino bana ba bwanga abashilula kupeleja bantu, padi batyina bakakambakanya Yesu. Yesu pa kumona nabya wafītwa kaebanena’mba: “Lekai bana batyetye bāye kondi; kemwakatompai kwibakankaja, mwanda Bulopwe bwa Leza i bwa boba badi bwa abo. I bine nemulombola’mba, yewa ense katambulapo Bulopwe bwa Leza pamo bwa mwana mutyetye kakatwela’mopo nansha dimo.”​—Mako 10:14, 15; Luka 18:15.

Bine buno i bufundiji bwa kamweno! Pa kutambula Bulopwe bwa Leza, tufwaninwe kwikala betyepeje ne bafundijibwa pamo bwa bana batyetye. Yesu walombola’mba uswele bana batyetye na kwibasela mu maboko ne kwibesela. Kadi mo monka mwasanshīlwe ne ‘yewa ense utambula Bulopwe bwa Leza pamo bwa mwana mutyetye.’​—Luka 18:17.