Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 84

Kwikala Mwanā Bwanga Ke Makayopo Namani?

Kwikala Mwanā Bwanga Ke Makayopo Namani?

LUKA 14:25-35

  • BILOMBWA PA KWIKALA MWANĀ BWANGA

Yesu wafundija bufundiji bwa kamweno paadi udya ku njibo ya mwendeji wa Bafadiseo. Yesu paenda ku Yelusalema, bibumbo bikatampe bibaenda nandi. Mwanda waka? Le bine basakanga kwikala balondi bandi ba bine, nansha shi bibalomba bivule?

Pobenda mwishinda, Yesu wanena kintu kimo kyasansa bamo amba: “Shi muntu wiya kondi ino kashikilwepo shandi, inandi, mukajandi, bandi bana, banababo bana-balume ne bana-bakaji, bine, enka ne būmi bwandi bwine, kabwanyapo kwikala wami mwanā bwanga.” (Luka 14:26) Le ukimba kunena bika?

Yesu kasakilepo kunena kishima pa kishima amba boba bonso bekala bu balondi bandi bafwaninwe kushikwa babutule babo. Ino bafwaninwe kwibashikwa mu buluji bwa amba buswe bobebasenswe kebwakitabuka bobasenswe Yesu, ne kuleka kwikala bwa muntu wa mu kyelekejo kyandi wapelele lwito lwa kamweno mwanda’po’tu wasongele. (Luka 14:20) I kilembwe’mba, Yakoba mukulutuba wa Bayuda wādi ‘ushikilwe’ Lea ne kusanswa’ko Letyela, ko kunena’mba buswe bwa kuswa Lea bwādi butyetye kupita bwaādi uswele Letyela.​—Ngalwilo 29:31; kunshi kwa dyani.

Vuluka, Yesu wanena’mba mwanā bwanga ufwaninwe kushikwa “enka ne būmi bwandi bwine,” ko kunena’mba muya wandi. Nanshi mwanā bwanga wa bine ufwaninwe kusanswa Yesu bininge kupita mwasanshilwe bwandi būmi, witabija’nka ne kwibujimija shi bibakole. Bine, kwikala mwanā bwanga wa Kidishitu ke makayopo. Ke kwa kukwatyilapo ku nsongo ya minwe, na kwibupēleka.

Kwikala mwanā bwanga kubwanya kuleta bikoleja ne kupangwapangwa, mwanda Yesu wanena’mba: “Muntu ense kaselelepo mutyi wandi wa masusu ne kunonda mpika kakokejapo kwikala wami mwanā bwanga.” (Luka 14:27) Bine, mwanā bwanga wa bine wa Yesu ufwaninwe kwitabija kusela kiselwa kya kufutululwa na mwāfutulwidilwe Yesu. Yesu wānenene’nka ne kunena’mba usa kufwila mu makasa a balwana nandi.

Nanshi bibumbo byenda na Yesu bifwaninwe kubandaula na katentekeji byobya bilombwa pa kwikala mwanā bwanga wa Kidishitu. Yesu wakomeneja uno mwanda na kyelekejo. Wanena’mba: “Kimfwa, i ani momudi’mo usaka kūbaka kiteba kashikatapo bidi wapikula lupeto lwasa kujimija ne kumona shi udi na lupeto lubwane mwa kuvuila’kyo? Shi bitupu, ukāla kyalwilo kyakyo ino wakomenwa kupwa’kyo.” (Luka 14:28, 29) Nanshi kumeso kwa kwikala bana ba bwanga ba Kidishitu, bafwaninwe kukwata butyibi busumininwe bwa kuvuija bine bilombwa ne pa mfulo. Wakomeneja uno mulangwe na kyelekejo kikwabo amba:

“Le i mulopwe’ka wenda kuketamba divita na mulopwe mukwabo kashikatapo bidi kukala ñeni shi ubwanya na basola 10 000 kukalwa na yewa wiya na 20 000? Ino shi kabwanyapo, nabya  enka pakidi yewa mukwabo kulampe, ukatuma’ko kitango kya mikendi yandi mwanda wa kukimba kupwana.” Yesu watōkeja mulangwe wandi amba: “Mo monka, nenu kulupilai’tu amba muntu ense kashiyepo bintu byonso byadi nabyo, kabwanyapo kwikala wami mwanā bwanga.”​—Luka 14:31-33.

Na bubine, Yesu kanenangapo enka bibumbo bimulonda mu dishinda. Boba bonso bayuka Kidishitu bafwaninwe kwitabija kulonga byanena pano’bi. Ko kunena’mba bekale kala kwiteakanya kupāna kintu kyonso kyobadi nakyo​—bintu byabo, enka ne būmi bwabo​—shi basaka kwikala bana bandi ba bwanga. Uno i mwanda ufwaninwe kulangulukila’po ne kulombela.

Pano Yesu watela mwanda waesambile’po mu Busapudi bwandi bwa ku Lūlu paanenene bandi ba bwanga amba “mwi mwepo wa pano pa ntanda.” (Mateo 5:13) Monka mulaminanga mwepo bintu byakabola, bana ba bwanga nabo bafwaninwe kwikala na lupusa luyampe pa bantu, kwibakinga ku mushipiditu ne ku mwikadilo mubole. Pano, mwingilo wandi byokewenda ku mfulo, wanena’mba: “Mwepo, na bubine i mulumbuluke. Ino shi mwepo ujimije bukomo bwao, lelo ukatobajibwa na bika?” (Luka 14:34) Bevwaniki bandi bayukile amba kudi mwepo mubi okebengidijangapo, mwanda wikalanga utyangilwe na bityakuku, keukidipo na mvubu.

O mwanda Yesu walombola amba nansha ke boba bekele bu bana ba bwanga pano ke kitatyi kilampe kebafwaninwepo kuzoza. Shi bazoze, abaikala ba kubulwa mvubu pamo bwa mwepo wajimija bukomo bwao. Ntanda ibwanya kwibasepa. Kutabukidila, kebakafwaninwapo ku meso a Leza, bakafutulwija’nka ne dijina dyandi. Yesu walombola mvubu ya kwepukila bino bintu amba: “Yewa wa matwi a kwivwana, evwane.”​—Luka 14:35.