Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 83

Lelo I Bāni Betyilwe na Leza ku Bidibwa?

Lelo I Bāni Betyilwe na Leza ku Bidibwa?

LUKA 14:7-24

  • BUFUNDIJI BUTALA PA KWITYEPEJA

  • BETWE ABEKAÑANYA

Yesu pa kupwa kubelula muntu wadi ususuka na misongo ya kuyulwa ngitu, ukidi’nka mu njibo ya Mufadiseo. Yesu wamone betwa bamo betongela bifuko biyampe ku bidibwa, o mwanda waingidija uno mukenga mwanda wa kufundija bufundiji butala pa kwityepeja.

Yesu wanena’mba: “Shi muntu wakwite ku masobo a butundaile, kokishikata pa kyaba kya bulēme kutabuka. Padi kudi ne muntu ukupityile bulēme wityilwe. Ebiya yewa wimwityile abe ne aye ukāya kakunena’mba, ‘Mushile uno kyobe kyaba’kyo.’ Penepa ukataluka bya bumvu kokashikata pa kyaba kya munshi.”​—Luka 14:8, 9.

Yesu wabweja’ko amba: “Shi abakwite, enda ukashikate pa kyaba kya munshi, amba yewa ukwityile pa kwiya, ukakunena’mba, ‘A mulunda, kanda pa kyaba kya peulu.’ Penepo ukekala na bulēme ku meso a bakwenu bonso betyilwe.” Kulonga namino ke’nkapo’tu kulombola bibidiji biyampe kete. Yesu washintulula amba: “Mwanda yewa ense wizunzula ukatūkijibwa, kadi yewa witūkija ukazunzulwa.” (Luka 14:10, 11) Bine ukankamikanga bevwaniki bandi batamije kwityepeja.

Kupwa Yesu waleta bufundiji bukwabo ku Mufadiseo wamwitanga​—mwa kwityila bantu ku bidibwa mu muswelo usangaja Leza. Yesu wanena’mba: “Shi ubatēkeja bidibwa bya dyuba nansha bya kyolwa, kokita balunda nobe, banabenu, babutule bobe, nansha bakwenu bampeta. Shi bitupu nabo bakakwita, nankyo bikekala bwa abyo byakulubwilwa. Ino shi ubatēkeja masobo, ita balanda, babilema, babisheta, ne bampofu; nabya ukekala wa katōkwe, mwanda kebadipo na kya kukulubwila.”​—Luka 14:12-14.

Yesu kanenenepo amba i bibi kwita balunda, babutule, nansha balondakani ku bidibwa. Ino wakomeneja mulangwe wa amba kwita boba basakilwa bukwashi, balanda, babilema, nansha bampofu, kuletanga madyese mavule. Yesu washintulwila umwityile’wa amba: “Ke-pantu ukalubwilwa ku lusangukilo lwa boloke.” Mwitwa mukwabo wepatentulula amba: “Wa katōkwe i yewa udya mu Bulopwe bwa Leza.” (Luka 14:15) Wamone amba dino i dyese dikatampe. Ino ke bonsopo basangela uno mwanda nabya, o mwanda Yesu walunguluka na kyelekejo amba:

“Muntu umo watēkeje bidibwa bya kyolwa bivule, kadi waita’ko bantu bavule. Watuma umpika . . . akalombole betwa’mba, ‘Iyai, mwanda bintu byonso pano ke bilongololwe kala.’ Ino bonso baalula kwikañanya. Umbajinji wamunena’mba, ‘Napotele budimi, nsaka ñende nkebutale; nakulombe, mfwile’ko lusa.’ Mukwabo nandi wanena’mba, ‘Napotele bañombe dikumi bakute babidi babidi mu lupungu, keñenda nkebabandaule; nakulombe, mfwile’ko lusa.’ Ungi nandi wanena’mba, ‘Natundaile mukaji’nka panō, o mwanda nkibwanyapo kwiya.’”​—Luka 14:16-20.

Tuno i tubepelo’tu! Mungya buluji muntu utalanga budimi kumeso kwa kwibupota, nanshi kepakidipo kampeja-bukidi ka kwibutadila aye ke mupwe kwibupota. Wa busatu nandi kadipo wilongolola kusonga. Wadi ke musonge kala, nanshi kino kekimukankajapo kwitabija luno lwito lwa mvubu. Mfumu pa kwivwana kuno kwikañanya, wasapwila umpika wandi na bulobo amba:

“Enda bukidi mu bipito bikatampe ne bityetye bya mu kibundi, ulete kuno balanda ne balemane ne bampofu ne babisheta.” Umpika pa kupwa kwitañana, amo mukidi’nka kyaba. Mfumu wanena umpika amba: “Tambila mu bilayi ne mu tushinda, wibaningile bāye batwele mwanda wa njibo yami iyule bā. Mwanda nemulombola’mba, ku boba badi betwe i kutupu nansha umo  ukatompa ku byami bidibwa bya kyolwa.”​—Luka 14:21-24.

Bino byasekununa Yesu mu kyelekejo bilombola Yehova Leza mwaātumīne Yesu Kidishitu kwita bantu bafwaninwe Bulopwe bwa mūlu. Bayuda, nakampata bendeji ba bipwilo, bo bādi babajinji kwitwa. Ino bavule, bapelele lwito lwadi lwitañana Yesu mu bula bwa mwingilo wandi onso. Luno lwito kelwakadikilepo’nka kobadi. Yesu walombola’mba mu mafuku a kumeso kukekala lwito lwa bubidi luketwa betyepeje ba mu muzo wa Bayuda ne boba ba kwalamuka. Kupwa kukekala lwa busatu, lo lwito lwa mfulo lwa bantu bamonwa na Bayuda amba kebafwaninwepo ku meso a Leza.​—Bilongwa 10:28-48.

Bine, bino byanena Yesu bibabingija byanenanga yewa mwitwa mukwabo amba: “Wa katōkwe i yewa udya mu Bulopwe bwa Leza.”