Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 6

Mwana Wālailwe

Mwana Wālailwe

LUKA 2:21-39

  • YESU WATWEJIBWA KWISAO KUPWA WALETWA KU TEMPELO

Ba Yosefa ne Madia abashala ku Betelema pa kyaba kya kujokela ku Nazala. Yesu pa kubwanya mafuku 8, abamutweja kwisao, monka mwikisoñenya Bijila bya Leza kudi Isalela. (Levi 12:2, 3) Kadi mungya kibidiji i mu dino difuku mobenikanga mwana dijina. Abainika wabo mwana bu Yesu, dijina dyebalombwele mwikeulu Ngabudyele.

Kupwa kwa kweji umo ne musubu, Yesu wabwanya mafuku 40. Le bambutwile bandi abamuselela kwepi? Abaenda nandi ku tempelo ya mu Yelusalema, idi ku makilometele’tu matyetye na kobashikatanga. Bijila binena’mba, shi inamwana wabutula, kupwa’tu kwa mafuku 40, unenenwe kupāna mulambu wa kwitōkeja ku tempelo.​—Levi 12:4-8.

Ye byakalonga Madia. Waleta toni tubidi bu kyamulambu kyandi. Kino kitulombola mwikadile misokwe ya ba Yosefa ne Madia. Mungya Bijila, mukōko mwana ne koni byo byādi bifwaninwe kupānwa. Shi inabana kabwanyapo kupāna mukōko, nabya ukapāna tukutyikutyi tubidi nansha bankunda babidi. To twapāna Madia mungya musokwe wandi.

Ba Yosefa ne Madia pobadi ku tempelo, muntu umo mununu webafwena. Dyandi i Shimioni. Leza wamulombwele amba kumeso kwa aye kufwa ukamona Kidishitu, nansha’mba Meshiasa wālailwe na Yehova. Mu dino difuku Shimioni waludikilwa na mushipiditu ujila ku tempelo, kwine kwaatana ba Yosefa, Madia ne kana kabo. Shimioni wasela mwana wa lukeke mu makasa andi.

Shimioni paakiselele Yesu, wafwija’ko Leza amba: “Pano’ko, a Mfumu Mwinē Lupusa Lonso, leka umpika obe eendele talala nyā mu ndoe mwendele binenwa byobe, mwanda meso ami abamone dishinda dyobe dya lupandilo dyolongolwele kala kumeso a bantu bonsololo, kitōkeji kya kutalula kilēnda ku mizo, ne ntumbo ya Isalela, bantu bobe.”​—Luka 2:29-32.

Ba Yosefa ne Madia abatulumuka pa kwivwana’byo. Shimioni webesela ne kunena Madia amba wabo mwana “i mutongwe mwanda wa kupona ne kulangulwa kwa bavule bene mu Isalela” kadi kyāso, na kya kutapwa na lupete, kikakukwata.​—Luka 2:34.

Kudi muntu mukwabo udi ku tempelo dino difuku. I Ana, mupolofeto mukaji wa myaka 84. Aye, kashikilwangapo kwenda mpika ku tempelo. Enka mu kitatyi’kya, au wiya kudi ba Yosefa, Madia, ne mwana Yesu. Ana washilula kufwija’ko Leza ne kwisamba myanda ya mwana ku bonso bateja.

Ba Yosefa ne Madia abasangala pa bino byobamona ku tempelo! Na bubine, bino byonso bibebakulupija amba uno mwana wabo i Mulaibwe na Leza.