Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 1

Misapu Ibidi Itamba Kudi Leza

Misapu Ibidi Itamba Kudi Leza

LUKA 1:5-33

  • MWIKEULU NGABUDYELE WALAYA KUBUTULWA KWA YOANO MUBATYIJI

  • NGABUDYELE WALAYA’MBA MADIA UKABUTULA YESU

Na bubine, tubwanya kumona Bible yense mutuntulu bu musapu utamba kudi Leza. Tata wetu wa mūlu i mwitupe’ye mwanda wa kwitufundija. Tala bidi ino misapu ibidi ya pa bula, yāletelwe pano ke padi myaka 2 000 ne kupita. Yāletelwe na mwikeulu Ngabudyele, “wimananga pabwipi ku meso a Leza.” (Luka 1:19) Le byādi namani pāletele mwikeulu ino misapu?

Tudi mu mwaka wa 3 Yesu kaile. I kwepi kwakatwala Ngabudyele musapu mubajinji? I mu mikuna ya Yudea, kubwipi na Yelusalema, kudi kitobo wa Yehova wa dijina dya bu Zekadia. Aye ne Edisabeta mukajandi ke banunu, kadi kebadipo na mwana nansha umo. Pano ke kitatyi kya Zekadia kitobo wa Leza kutwela mu tempelo ya mu Yelusalema mwanda wa kwingila. Zekadia padi mu tempelo, Ngabudyele awa utwela mu kitulumukila ne kwimana kubwipi na kisōkelo kya ensense.

Bine Zekadia wazakala pa uno mwanda. Inoko mwikeulu watūkija moyo wa Zekadia na kumunena’mba: “Kokakwatwa moyo, Zekadia, mwanda kwabija kobe kubaivwanikwa biyampe, kadi obe mukaji Edisabeta usa kukubutwila mwana mwana-mulume, ukamwinika bu Yoano.” Ngabudyele wabweja’ko amba Yoano “ukekala mukatampe ku meso a Yehova” kadi ukateakenya “Yehova bantu balongololwe.”​—Luka 1:13-17.

Zekadia wakomenwa kwitabija uno mwanda. Mwanda? Mwanda aye ne Edisabeta ke banunu bininge. O mwanda Ngabudyele wamusapwila’mba: “Ukekala talala nyā kadi kukakokejapo kunena kufika ne difuku dikafika bino bintu’bi, mwanda kwitabijepo binenwa byami.”​—Luka 1:20.

Papo bantu panja kebeipangula kyaijija Zekadia kutamba mpika. Amba batale, awa utamba, ino kunena kutupu. Zekadia kanena enka na maboko. Bibamweka kala’mba kudi kingelengele kyaamona mu tempelo.

Zekadia byapwa mwingilo wandi ku tempelo, wajokela kwandi. Na pano kala, Edisabeta waimita! Edisabeta Pailaija kubutula, wakashikata kufula mu njibo mu bula bwa myeji itano.

Kupwa Ngabudyele waiya dikwabo. Kudi ani? I kudi nsongwakaji umo wampikwa kusongwa witwa bu Madia, wikalanga ku ntanda ya Ngadilea dya kungala, mu kibundi kya Nazala. Le i bika byamusapwila mwikeulu? Wamusapwila’mba: “Leza wakutōkelwa mutyima.” Ngabudyele wasapwila Madia monka amba: “Tala! usa kwimita dīmi kadi ukabutula mwana mwana-mulume, ukamwinika bu Yesu.” Ngabudyele wabweja’ko amba: “Uno’u ukekala mukatampe kadi uketwa bu Mwanā Mwine wa Mūlu Mwine, . . . kadi ukabikala bu Mulopwe pa njibo ya Yakoba nyeke, ne Bulopwe bwandi kebukekalapo na mfulo.”​—Luka 1:30-33.

Ubwanya kufwatakanya mwēivwanina Ngabudyele pa kupebwa dyese dya kusapula ino misapu ibidi. Shi twifunde bivule padi Yoano ne Yesu, ukamona kikadile ino misapu na mvubu mikatampe.