Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 SHAPITA 5

Kifuko ne Kitatyi kya Kubutulwa kwa Yesu

Kifuko ne Kitatyi kya Kubutulwa kwa Yesu

LUKA 2:1-20

  • YESU WABUTWILWA MU BETELEMA

  • BAKUMBI ABAKATALE YESU MWANA WA LUKEKE

Kesala Akutusa, mbikavu wa Umbikalo wa Loma waeleja lubila amba muntu ense ufwaninwe kwilembeja. O mwanda ba Yosefa ne Madia abaenda ku kibundi kyabo, kibundi kya Betelema, dya kunshi kwa Yelusalema.

Mu Betelema mudi bantu bavule baiya kwilembeja. Kifuko kimo kete mukokeja kufikila ba Yosefa ne Madia i enka mu kipombo, mulālanga bampunda ne banyama bakwabo. Mo mwabutwilwa Yesu. Madia wamuvungila mu bisandi ne kumulādika mu kidīlo, mwadi byakudya bya banyama.

Leza ye uno walengeje Kesala Akutusa alete luno lubila lwa kwilembeja. Mwanda waka? Mwanda kino kibalengeja Yesu abutwilwe mu Betelema, kibundi kya Mulopwe Davida, mukulutuba wandi. Bisonekwa byālaile tamba kala amba kino kyo kibundi kikabutwilwa’mo Mulopwe wālailwe.​—Mika 5:2.

Bine buno i bufuku bwa mvubu mikatampe! Mu madimi namo kitōkeji kibamunikila kisumpi kya bakumbi. I ntumbo ya Yehova! Mwikeulu umo wa Leza wasapwila bakumbi amba: “Kemwakikwatwai moyo, mwanda talai! nemusapwila myanda miyampe ya nsangaji mikatampe ikekala na bantu bonso. Mwanda dyalelo dino’di, mu kibundi kya Davida mubemubutwilwa Umpandiji, ke Kidishitu Mfumwetu kadi. Kadi kiyukeno kyomukayukila’po i kino: Mukatana mwana mutyetye uvungilwe mu bisandi ulēle mu kidīlo.” Na mu kitulumukila kubamweka bamwikeulu bavule kebanena’mba: “Ntumbo kudi Leza momwa mūlu mulampe, ne pano panshi napo ndoe mu bantu batōkēlwe.”​—Luka 2:10-14.

Bamwikeulu pa kutaluka, bakumbi ke benena amba: “Bine twayai ku Betelema tukamone kino kintu kyalongeka’ki, kine kyetuyukija Yehova.” (Luka 2:15) Abaenda’ko bukidi ne kutana Yesu mubutulwe enka kokwa kwadi kubebalombola mwikeulu. Bakumbi pa kusekununa byebalombolanga mwikeulu, bantu abatulumuka. Madia wakwata na bulēme bino binenwa byonso ne kulanguluka’byo mu mutyima wandi.

Bantu bavule dyalelo bakulupile amba Yesu wābutwilwe mafuku 25 Kweji 12. Ino mu ntanda ya Betelema, Kweji 12 i kweji wa mvula ne mashika. Kyaba kimo kuponanga ne mashika mekwate. Mu kino kitatyi kya mwaka byādi bya kukomena bakumbi kwikala panja mu ntanda bufuku na luombe lwabo. Kadi, mbikavu wa Loma kādipo wa kwitabija bantu bādi basaka kumutombokela bende kukelembeja mu buyo bwa mashika makomo. Bimweka bu Yesu wābutwilwe padi mu Kweji 10.