Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Yesu​—Dishinda, Bubine, ne Būmi

 SHAPITA 9

Watamina mu Nazala

Watamina mu Nazala

MATEO 13:55, 56 MAKO 6:3

  • KISAKA KYA YOSEFA NE MADIA KIBABAILA’KO

  • YESU WEFUNDE KAJI KA MAKASA

Yesu watamina mu kibundi kya Nazala, kakibundi katyetye, ka kubulwa kutumba. Kadi kungala, mu ngulu ya ku Ngadilea, kushika kwa dijiba dikatampe diyukene bu Dijiba dya Ngadilea.

Padi Yesu wadi na myaka ibidi pamuselēle ba Madia ne Yosefa ku Edipito. Bimweka’mba mu kino kitatyi aye ye wandi mwana umo kete mu kisaka. Inoko, mwenda mafuku, banababo bakwabo ababutulwa​—ba Yakoba, Yosefa, Shimona, ne Yuda. Ba Yosefa ne Madia ababutwila’ko ne bana bana-bakaji, banababo na Yesu. Bine, pano Yesu kadi na bankasandi bana-balume ne bana-bakaji basamba.

Ino, Yesu udi ne babutule bakwabo. Tuyukile kala Edisabeta ne wandi mwana Yoano. Ushikatanga dya kunshi mu Yudea, ku makilometele mavule. Salome ushikatanga kubwipi mu Ngadilea, mobimwekela i mwanabo na Madia, nanshi Yesu umwita bu mama. Mulumya Salome i Zebede. Babo bana babidi, ba Yakoba ne Yoano, bamweka bu ye banababo na Yesu babajinji ba kwa mwanabo na inandi. Ketuyukilepo shi Yesu upityijanga ne kitatyi kivule na bano bankasampe paenda utama, inoko mwenda mafuku abaikala ke balunda, ne kwingila bu batumibwa babidi ba Yesu.

Yosefa ufwaninwe kwingila bininge pa kukwatakanya kisaka kyenda kibaila’ko. I sendwe wa mbao. Yosefa watamija Yesu enka bwa wandi mwana wa kwibutwila, o mwanda Yesu witwanga bu “mwanā  sendwe wa mbao.” (Mateo 13:55) Yosefa wafundija Yesu ekale bu sendwe wa mbao, kadi webiyuka biyampe. Mwanda mwenda mafuku bantu badi kebete Yesu bu “sendwe wa mbao.”​—Mako 6:3.

Kisaka kya Yosefa kitele mutyima bininge ku kutōta Yehova. Ba Yosefa ne Madia byobalamine Bijila bya Leza, abape babo bana bulombodi bwa ku mushipiditu ‘pa kushikata mwabo mu njibo, pobenda mwishinda, ne pobalāla, ne pobabūka pene.’ (Kupituluka 6:6-9) Mu Nazala mudi shinankonka. Tukulupile amba Yosefa wendanga’ko kyaba ne kyaba na kyandi kisaka kukatōta. Mwenda mafuku byayukene amba Yesu wadi wendanga ku shinankonka “mungya kibidiji kyandi mu difuku dya Sabato.” (Luka 4:16) Kadi kino kisaka kisangelanga kwenda kitatyi ne kitatyi ku tempelo ya Yehova mu Yelusalema.