Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIPINDI 3

Le Myanda Miyampe I Mitambe Bine Kudi Leza?

Le Myanda Miyampe I Mitambe Bine Kudi Leza?

1. Le Mwinē Bible i ani?

Myanda miyampe ya amba bantu bakekala na būmi bwa nyeke pano pa ntanda i milembwe mu Bible. (Ñimbo ya Mitōto 37:29) Bible udi na mikanda mityemitye 66. Leza wāingidije bantu ba kikōkeji kubwipi kwa 40 balembe Bible. Mikanda itano mibajinji yālembelwe na Mosesa kintu kya myaka 3 500 kunyuma. Mukanda wa mfulo wālembelwe na mutumibwa Yoano kepadi myaka 1 900 ne kupita. Le ino milangwe yālembelwe na bano balembi yātambile kwepi? I Leza wālombwele’yo bano balembi kupityila ku mushipiditu wandi ujila. (2 Samwele 23:2) Bālembele milangwe ya Leza ke ya abo benepo. O mwanda nanshi Yehova ye Mwinē Bible.​—Tanga 2 Temote 3:16; 2 Petelo 1:20, 21.

Tala video Le I Ani Wālembeje Bible?

2. Le tukayuka namani amba Bible i wa bine?

Tukulupile amba Bible i mutambe kudi Leza mwanda ulombolanga na bubine kamo ne kamo ka bīya kumeso. I kutupu muntu nansha umo ubwanya kulonga namino. (Yoshua 23:14) I enka Leza Mwinē Bukomo Bonso ukokeja kumona bikafikila muzo wa muntu.​—Tanga Isaya 42:9; 46:10.

Dibuku ditamba kudi Leza difwaninwe kwikala dya pa bula, ne bine i dya pa bula. Mamidiyala a Mabible i mabanibwe mu ndimi tutwa na tutwa. Nansha Bible byadi wa kala, ino i mukwatañane na bintu bisokwelwe mu sianse. Kadi bantu 40 bālembele’ye kebēpatenyepo. * Ne kadi, byobya binena Bible pa buswe kebitambengapo kungi poso’nka kudi Leza mwine wa buswe, kadi Bible udi na bukomo bwa kushinta būmi bwa bantu ke buyampe. Ino myanda ke minekenye bantu bavule betabije amba Bible i Kinenwa kya Leza.​—Tanga 1 Tesalonika 2:13.

Tala video Le Tukayuka Namani Amba Bible I wa Bine?

 3. Le Bible wimanine paka?

Bible wimanine pa kusapula myanda miyampe ya amba Leza udi na mpango ya buswe pa bantu. Bisonekwa bishintulula mwājiminine dyese dya bantu dya kwikala mu paladisa pano pa ntanda ku ngalwilo ne kulombola muswelo ukajokejibwa paladisa.​—Tanga Kusokwelwa 21:4, 5.

Mu Kinenwa kya Leza mudi bijila, misoñanya, ne madingi. Kadi mu Bible mudi ne mānga ya mwadi mwikadile Leza na bantu​—mānga isokola patōka ngikadila ya Leza. Nanshi, Bible ukokeja kukukwasha uyuke Leza. Ulombolanga muswelo obwanya kwikala mulunda nandi.​—Tanga Ñimbo ya Mitōto 19:7, 11; Yakoba 2:23; 4:8.

4. I muswelo’ka okokeja kwivwanija Bible?

Uno boloshile ukakukwasha wivwanije Bible na kulonga mwālongēle Yesu. Wādi utela kisonekwa, kyoki ke kyoki ne kulombola “buluji bwa Bisonekwa.”​—Tanga Luka 24:27, 45.

Kekudipo bintu bikunka mutyima bwa myanda miyampe itamba kudi Leza. Shako, bantu bamo i basūle’yo, kadi bakwabo nabo bafutulula’yo. Abe kokakōka. Mwanda pa kusaka’mba wikale na lukulupilo lwa kukamona būmi bwa nyeke, bilomba wifunde kuyuka Leza.​—Tanga Yoano 17:3.

 

^ mus. 3 Tala boloshile Un livre pour tous.