Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Myanda Miyampe Itamba Kudi Leza!

 KIFUNDWA 8

Mwanda Waka Leza Ulekele Bubi ne Masusu?

Mwanda Waka Leza Ulekele Bubi ne Masusu?

1. Bubi bwaānjile muswelo’ka?

Leza i muleke bantu baludike mu kitatyi kampanda, mwa kulombwela’mba bantu kebabwanyapo kupwija makambakano abo

Bubi bwaānjile pano pa ntanda kitatyi kyābepele Satana bubela bubajinji. Satana wādi bidi mwikeulu mubwaninine, ino ne “kwimanapo mu byabinebine, mpika.” (Yoano 8:44) Wātamije kilokoloko kya kusaka kutōtwa, ako kuntu kufwaninwe enka Leza kete. Satana wāongwele Eva, mwana-mukaji umbajinji ne kumutonona amukōkele aye kupita’ko kukōkela Leza. Adama nandi wēlunga kudi Eva na kutombokela Leza. Byālongele Adama byo biletele masusu ne lufu.Tanga Ngalwilo 3:1-6, 19.

Satana pa kunena Eva aleke kukōkela Leza, i kushilula kwaāshilwile butomboki bwa kutombokela bubikadi bwa Leza, nansha kifuko kyandi kya bu Mwine Mukatakata Mwine. Bavule belungile kudi Satana na kupela kubikalwa na Leza. Mu uno muswelo, Satana wāikala ke “mulopwe wa ino ntanda.”Tanga Yoano 14:30; 1 Yoano 5:19.

2. Le bupangi bwa Leza i bukankalwe?

Byonso bilongele Leza i bibwaninine. Leza wāpangile bantu ne bamwikeulu na bukomo bwa kumukōkela mu bubwaninine. (Kupituluka 32:4, 5) Le wētupangile na bwanapabo bwa kutonga kulonga kiyampe nansha kibi. Buno bwanapabo bwitupanga mukenga wa kulombola motuswelele Leza.Tanga Yakoba 1:13-15; 1 Yoano 5:3.

3. Mwanda waka Leza ukilekele masusu?

Mwanda waka Yehova i muleke mu bula bwa kitatyi kampanda butomboki bobatombokele bubikadi bwandi? I mwanda wa kulombola’mba bukomo bwa kubikala kwampikwa Leza, kebukendekapo.  (Musapudi 7:29; 8:9) Mānga ya muzo wa muntu mu bula bwa myaka 6 000 ibingija uno mwanda. Buludiki bwa bantu i bukomenwe kupwija mavita, butapani, bukondame, ne mbá.Tanga Yelemia 10:23; Loma 9:17.

Buludiki bwa Leza i bwishile na bwa bantu, mwanda babikalwa babo bamwenanga’mo. (Isaya 48:17, 18) Panopano ponka, Yehova usa kufudija umbikalo wa muntu. Enka boba batonga kuludikwa na Leza kete, bo bakapyana ntanda.Isaya 11:9; Tanga Danyele 2:44.

4. Le kitūkijetyima kya Leza kitukwasha tulonge bika?

Satana wānene amba i kutupu muntu ukengidila Yehova ku buswe bitupu. Le ukimba kumubepulula? Bine ubwanya! Kitūkijetyima kya Leza kitukwasha tulombole shi tusaka kuludikwa na Leza nansha na muntu. Byotulonga mu būmi byo bilombola byotutongele.Tanga Yoba 1:8-12; Nkindi 27:11.

5. Le tukatonga namani Leza bu Mulopwe wetu?

Byotutonga bilombola shi tusakanga kubikalwa na Leza

Tukatonga Leza bu Mulopwe wetu na kukimba ne kutwela mu kipwilo kya bine kimanine pa Kinenwa kya Leza, Bible. (Yoano 4:23) Tukokeja kupela kubikalwa na Satana, na kuleka kwiela mu politike ne mu mavita, na mwālongele Yesu.Tanga Yoano 17:14.

Satana wingidijanga bukomo bwandi mwanda wa kutumbija bilongwa bibi kadi bileta musala. Shi tupele’byo, balunda ne babutule betu bamo bakokeja kwitusepa ne kwitulwa. (1 Petelo 4:3, 4) Pano tusakilwa kutonga. Le tukapwana na bantu baswele Leza? Le tukakōkela bijila byandi biyampe ne bya buswe? Shi tulonge namino, tubabepulula bubela bwa Satana bwa amba shi muntu watanwa na bikoleja kabwanyapo kukōkela binena Leza.Tanga 1 Kodinda 6:9, 10; 15:33.

Buswe buswele Leza bantu bwitukulupija amba bubi ne masusu bisa kupwa. Bonso balombola’mba betabije uno mwanda, bakamona būmi bwa nyeke pano pa ntanda.Tanga Yoano 3:16.