Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIPINDI 11

I Muswelo’ka Otumwena mu Misoñanya Idi mu Bible?

I Muswelo’ka Otumwena mu Misoñanya Idi mu Bible?

1. Mwanda waka tusakilwa wa kwitwendeja?

Le misoñanya ya mu Bible itutonona namani twepuke byaka?​—ÑIMBO YA MITŌTO 36:9.

Umpangi wetu udi na tunangu kwitupita. Byadi Tata wa buswe, witutele mutyima. Kadi kasakangapo twiendeje batwe bene. (Yelemia 10:23) Monka musakilwa mwana mutyetye kwendejibwa na bambutwile, netu tusakilwa kwendejibwa na Leza. (Isaya 48:17, 18) Misoñanya ya mu Bible itupanga bwendeji budi bwa kyabuntu kitamba kudi Leza.​—Tanga 2 Temote 3:16.

Bijila bya Yehova ne misoñanya yandi bitufundijanga mwa kwikadila mu būmi dyalelo, ne kwitulombola mwa kumwena mpalo ya nyeke kumeso. Leza byaētupangile, nanshi i biyampe twitabije na nsangaji bwendeji bwandi.​—Tanga Ñimbo ya Mitōto 19:7, 11; Kusokwelwa 4:11.

2. Le misoñanya ya mu Bible i bika?

Misoñanya ya mu Bible i bubine bwa kyalwilo. Ino bijila abyo, bikokeja kwingidijibwa mu mwanda kampanda muyukane. (Kupituluka 22:8) Tufwaninwe kwingidija bukomo bwetu bwa kulanga pa kwivwanija muswelo ukokeja musoñanya kampanda kwingidijibwa mu mwanda kabidye. (Nkindi 2:10-12) Kimfwa, Bible ufundija’mba būmi i kyabuntu kitamba kudi Leza. Uno musoñanya wa kyalwilo ukokeja kwituludika ku kaji, ku njibo, nansha ke mu lwendo. Uketutonona twepuke byaka.​—Tanga Bilongwa 17:28.

3. Lelo i misoñanya’ka ibidi mikatampe mpata?

Yesu wēsambīle pa misoñanya ibidi mitabuke bukata. Umbajinji usokola kitungo kine kya būmi bwa muntu​—ke kya kuyuka Leza kadi, kumusanswa, ne kumwingidila na kikōkeji. Tufwaninwe kuta mutyima ku uno musoñanya umbajinji mu butyibi bwetu bonso. (Nkindi 3:6)  Bonso balonda uno musoñanya bakekala balunda na Leza, bakamona būmi bwa nyeke, ne kwikala na nsangaji ya bine.​—Tanga Mateo 22:36-38.

Musoñanya wa bubidi ukokeja kwitulengeja tupwane na bakwabo. (1 Kodinda 13:4-7) Kulonda uno musoñanya wa bubidi kulomba kwiula mwikadile Leza na bantu.​—Tanga Mateo 7:12; 22:39, 40.

4. Le tumwenanga namani mu misoñanya ya mu Bible?

Misoñanya ya mu Bible ifundijanga bisaka mwa kwikutyila mu bumo na buswe. (Kolose 3:12-14) Kadi Kinenwa kya Leza kikiñanga bisaka na kwibifundija musoñanya mukwabo​—wa amba, busongi bufwaninwe kwikala bwa lonso.​—Tanga Ngalwilo 2:24.

Kulonda bufundiji bwa mu Bible kwitulengeja twikale biyampe ku ngitu ne mu malango. Kimfwa, bakulu ba kaji basakanga bengidi balonda misoñanya ya mu Bible ilomba kubulwa budimbidimbi ne kwikala na kininga. (Nkindi 10:4, 26; Bahebelu 13:18) Kinenwa kya Leza kitufundija kusangela byobya byotudi nabyo ne kukwata na mutyima umo kipwano kyetu na Leza pa kyaba kya bituntwa bya ku ngitu.​—Tanga Mateo 6:24, 25, 33; 1 Temote 6:8-10.

Kulonda misoñanya ya mu Bible kwitukiñanga ku misongo. (Nkindi 14:30; 22:24, 25) Kimfwa, kulonda bijila bya Leza bya kwilama ku bunkolwankolwa kwitukiñanga ku misongo ileta lufu ne ku maakishida. (Nkindi 23:20) Yehova witabije tutome mālwa pa ntomeno. (Ñimbo ya Mitōto 104:15; 1 Kodinda 6:10) Misoñanya ya Leza itukwashanga poitufundija kwilama mu bilongwa byetu ne mu milangwe mwine. (Ñimbo ya Mitōto 119:97-100) Shako, bene Kidishitu ba bine kebalēmekangapo misoñanya ya Leza enka pa mwanda wa kumwena’mo abo bene. Beilondanga mwanda wa kulēmeka Yehova.​—Tanga Mateo 5:14-16.