Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIFUNDWA 2

Lelo Leza I Ani?

Lelo Leza I Ani?

1. Mwanda waka tufwaninwe kutōta Leza?

Leza wa bine i yewa wāpangile bintu byonso. Kadipo na ngalwilo kadi kakekalapo na mfulo. (Mitōto 90:2) Aye ye Nsulo ya myanda miyampe itanwa mu Bible. (1 Temote 1:11) Byadi i aye witupele būmi, nanshi i aye kete otufwaninwe kutōta.Tanga Kusokwelwa 4:11.

2. Lelo Leza udi namani?

I kutupu muntu nansha umo ke mumone Leza mwanda aye i Mushipiditu, ko kunena’mba udi na būmi bwa muswelo wa peulu bininge kupita bipangwa bya pano pa ntanda. (Yoano 1:18; 4:24) Ino nansha nankyo, tukokeja kumona mwaikadile kupityila ku bintu byālongele. Kimfwa, bipa ne maluba a miswelo palapala bitulombola’mba udi na buswe ne tunangu. Bukatakata bwa umbuo wa diulu ne ntanda bilombola bukomokomo bwandi.Tanga Loma 1:20.

Tukokeja kuyuka bivule bitala pa mwikadile Leza na kutanga Bible. Kimfwa, Bible witulombolanga bine bidi Leza ne byakadipo, mwamwena bantu, ne byakokeja kwibalongela mu ngikadilo ya miswelo palapala.Tanga Mitōto 103:7-10.

3. Lelo Leza udi na dijina?

Yesu wānene’mba: “Tata wetu wa mūlu, dijina dyobe dipandulwe.” (Mateo 6:9) Nansha Leza byadi na bitenta bivule, ino udi na dijina dimo kete. Ludimi ne ludimi lwiditelanga mu muswelo walo. Mu Kiluba ditelwanga bu “Yehova.” Inoko bantu bamo beditelanga bu “Yahweh.”Tanga Mitōto 83:18.

Dijina dya Leza i ditalulwe mu malamuni mavule a Bible ne kwidipingakanya na bitenta pamo bwa Mfumwetu nansha Leza. Ino kitatyi kyāsonekelwe Bible, dyādi ditanwa’mo  kubwipi kwa misunsa 7 000. Yesu wāyukenye dijina dya Leza kitatyi kyaādi usapwila bantu myanda ya Leza.Tanga Yoano 17:26.

4. Lelo Yehova witutele mutyima?

Pamo bwa uno shabana wa buswe, Leza witulongelanga bintu byotumwena’mo mafuku onso

Le masusu asambakene koku ne koku alombola’mba Yehova i Leza ketutelepo mutyima? Bantu bamo balañanga’mba Leza witususulanga mwanda wa kwitutompa. Ino buno i bubela.Tanga Yakoba 1:13.

Leza i mupe muntu bwanapabo bwa kwitongela. Lelo ketukokejapo kusangela buno bwanapabo na kutonga kumwingidila? (Yoshua 24:15) Ino yō, bantu bavule i batonge kulonga bibi ku bakwabo, bya kwibasusula. Yehova ufitwanga pa mutyima pa kumona buno bukondame.Tanga Ngalwilo 6:5, 6.

Yehova i Leza witutele mutyima. Witusakilanga tusangele būmi. Panopano ponka usa kutalula masusu ne bene balengeja’o. Pano’ko bidi, Leza udi na bubinga bwalekele’o mu bula bwa kitatyi kityetye. Mu Kifundwa 8, tukayuka buno bubinga.Tanga 2 Petelo 2:9; 3:7, 13.

5. Le tukokeja kufwena namani kudi Leza?

Yehova witwita tumufwene na kwisamba nandi kupityila ku milombelo. Witutēle mutyima umo ne umo. (Mitōto 65:2; 145:18) Witulekelanga bilubo na mutyima umo. Uyukile bukomo botulonga mwanda wa kumusangaja nansha byotukankalwanga kitatyi kimokimo. Nansha byotudi bampikwa kubwaninina, tukokeja kupwana kipwano kya mpwaninine na Leza.Tanga Mitōto 103:12-14; Yakoba 4:8.

Yehova byadi i aye witupele būmi, nanshi tufwaninwe kumusanswa kupita muntu yense. (Mako 12:30) Kitatyi kyolombola buswe bobe kudi Leza na kwifunda bivule padi aye ne na kulonga byasaka, ukekala mulunda nandi wa binebine.Tanga 1 Temote 2:4; 1 Yoano 5:3.