1. Lelo Bulopwe bwa Leza i bika?

I bika bilengeje Yesu ekale bu Mulopwe mufwaninwe?MAKO 1:40-42.

Bulopwe bwa Leza i umbikalo wa mūlu. Bukapingakana imbikalo yonso ne kulengeja kiswa-mutyima kya Leza kilongeke mūlu ne pano pa ntanda. Myanda itala Bulopwe bwa Leza i miyampe. Panopano ponka Bulopwe bwa Leza bukavuija kisakibwa kya muntu kya kukimba umbikalo muyampe. Bukakutyila umbumo bantu bonso badi pano pa ntanda.Tanga Danyele 2:44; Mateo 6:9, 10; 24:14.

Bulopwe bonso bufwaninwe kwikala na mulopwe. Yehova i mutonge wandi Mwana, Yesu Kidishitu ekale Mulopwe wa Bulopwe bwandi.Tanga Kusokwelwa 11:15.

2. Mwanda waka Yesu i Mulopwe mufwaninwe?

Mwanā Leza i Mulopwe mufwaninwe mwanda udi na kanye kadi ulamete ku byobya byoloke. (Yoano 1:14) Kadi monka, udi na bukomo bubwanya kukwasha bantu, mwanda ukaludika ntanda yonso aye’ko mūlu. Pa kupwa kusanguka wākandile mūlu kukashikata ku lundyo lwa Yehova kakungile. (Bahebelu 10:12, 13) Ku mfulo Leza wamupele lupusa lwa kushilula kuludika.Tanga Danyele 7:13, 14.

3. I bāni bakaludika na Yesu?

Bantu betwa bu “bapandulwemo” bakaludika na Yesu mūlu. (Danyele 7:27) “Bapandulwemo” babajinji kutongwa i batumibwa ba Yesu ba kikōkeji. Yehova i mwendelele na kutonga kufika ne dyalelo bana-balume ne bana-bakaji ba kikōkeji bu bapandulwe’mo. Basangulwanga na ngitu ya ku mushipiditu pamo bwa Yesu.Tanga Yoano 14:1-3; 1 Kodinda 15:42-44.

 I bantu banga ba kwenda mūlu? Yesu wibatela bu “kaluombe katyetye.” (Luka 12:32) Kibalwa kyabo kine i bantu 144 000. Bakaludika ntanda pamo na Yesu.Tanga Kusokwelwa 14:1.

4. I bika byalongekele pashilwile Yesu kuludika?

Bulopwe bwa Leza bwashilwile kuludika mu 1914. * Kilongwa kibajinji kyālongele Yesu bu Mulopwe i kya kwela Satana ne bandemona bandi pano pa ntanda. Satana wakalabele ne kushilula kuleta kavutakanya pano pa ntanda. (Kusokwelwa 12:7-10, 12) Tamba pene’pa, malwa a bantu i mavudile’ko. Mavita, nzala, bipupo bya mbá, ne bintenshi, byonso bino bibadilwa mu ‘kiyukeno’ kilombola’mba panopano ponka Bulopwe busa kuludika ntanda yonso.Tanga Luka 21:7, 10, 11, 31.

5. I bika bilonga Bulopwe bwa Leza dyalelo?

Kupityila ku mwingilo wa busapudi wingilwa ntanda yonso, Bulopwe bwa Leza ke bukongakanye kibumbo kikatampe kya bantu batambile mu mizo yonso. Midiyo ne midiyo ya bantu ba kikōkeji i betabije kubikalwa na Yesu. Bulopwe bwa Leza bukebakinga pobukonakanya ino ngikadilo mibi ya bintu pano pa ntanda. O mwanda bonso basaka kumwena mu Bulopwe bwa Leza bafwaninwe kwifunda kwikala bu babikalwa ba kikōkeji ba Yesu.Tanga Kusokwelwa 7:9, 14, 16, 17.

Mu bula bwa myaka 1 000, buno Bulopwe bukafikidija mpango imbajinjibajinji ya Leza itala muzo wa muntu. Ntanda yonso ikalamuka ke paladisa. Mfulo mfulō, Yesu ukajokejeja Shandi Bulopwe. (1 Kodinda 15:24-26) Le uyukile muntu kampanda okokeja kusapwila myanda itala Bulopwe bwa Leza?Tanga Mitōto 37:10, 11, 29.

 

^ mus. 6 Shi usaka kuyukila’ko bivule bya mwālaile bupolofeto bwa Bible mwaka wa 1914, tala dibuku Lelo I Bika Bine Bifundija Bible? paje 215-218.