Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIPINDI 4

Le Yesu Kidishitu I Ani?

Le Yesu Kidishitu I Ani?

1. Le būmi bwa Yesu bwāshilwile muswelo’ka?

I ngikadila’ka yālengeje Yesu ekale ulumbwa?—MATEO 11:29; MAKO 10:13-16.

Yesu i mwishile na bantu bakwabo mwanda wādi bidi momwa mūlu bu muntu wa ku mushipiditu kumeso kwa kubutulwa’ye pano pa ntanda. (Yoano 8:23) I kipangwa kibajinji kya Leza, kadi wākweshe’ko pa kupanga bintu bikwabo byonso. Aye i kipangwa kimo kete kyāpangilwe na Yehova kasuku kandi, o mwanda i byendele’mo etwe bu Mwana “wa bunka” wa Leza. (Yoano 1:14) Yesu wāingile bu Mukendi wa kusapula binena Leza, o mwanda witwanga bu “Kinenwa.”​—Tanga Nkindi 8:22, 23, 30; Kolose 1:15, 16.

2. I kika kyāidile Yesu pano pa ntanda?

Leza wātumine wandi Mwana pano pa ntanda na kutundulwila būmi bwa wandi Mwana mu difu dya Madia, mujike Mwine Yuda. O mwanda Yesu kādipo na shandi wa ku mashi. (Luka 1:30-35) Yesu wāile pano pa ntanda (1) kufundija mwikadile Leza binebine, (2) kwitushila kimfwa kya mwa kulongela kiswa-mutyima kya Leza nansha ke potudi mu makambakano, ne (3) kupāna būmi bwandi bubwaninine ke “kinkūlwa.”​—Tanga Mateo 20:28.

3. Mwanda waka tusakilwa kinkūlwa?

Kinkūlwa i mfutwa ipānwanga mwanda wa kunyongolola muntu mu kyaka kya lufu. (Divilu 21:29, 30) Mu mpango ya Leza itala muzo wa muntu, kemwādipo bununu ne lufu. Le tubayuka kino namani? Leza wāsapwidile Adama, muntu umbajinji amba shi alonge kyokya kitela Bible bu “bubi,” nankyo ukafwa. Nanshi shi Adama kālongelepo bubi, kādipo wa kufwa. (Ngalwilo 2:16, 17; 5:5) Mungya Bible, lufu ‘lwātwelele’ pano pa ntanda kupityila kudi Adama. Adama nandi wāsambulwila bandi bana bonso  bubi ne mfuto yabo, ke lufu kadi. Tusakilwa kinkūlwa kya kwitunyongolola mu mfuto ya lufu yotwapyene kudi Adama.​—Tanga Loma 5:12; 6:23.

Le i ani wādi ubwanya kufuta kinkūlwa pa kwitunyongolola mu lufu? Lufu lotufwa, tufutanga mfutwa ya bubi bwetu. Kekudipo muntu wa kubulwa kubwaninina ubwanya kufuta mfutwa ya bubi bwa mukwabo.​—Tanga Ñimbo ya Mitōto 49:7-9.

4. I kika kyāfwidile Yesu?

Yesu i mwishile netu, aye i mubwaninine. O mwanda kādipo usakilwa kufwa pa bubi bwandi​—mwanda kālongele’bopo. Ino, Yesu wāfwidile bubi bwa bakwabo. Leza wālombwele bantu buswe kebwamwekele kashā pa kutuma wandi Mwana etufwile. Yesu nandi wālombwele buswe kotudi na kukōkela Shandi ne kupāna būmi bwandi pa bubi bwetu.​—Tanga Yoano 3:16; Loma 5:18, 19.

Tala video Mwanda Waka Yesu Wāfwile?

5. Le i bika bilonga Yesu pano?

Yesu paādi pano pa ntanda, wābelwile babela, wāsangula bafwe, ne kupandija bantu mu byaka. Mu uno muswelo, wālombwele byakalongela bantu ba kikōkeji mu mafuku āya kumeso. (Mateo 15:30, 31; Yoano 5:28) Yesu pa kufwa, Leza wāmusangwile bu muntu wa ku mushipiditu. (1 Petelo 3:18) Penepa, Yesu wākelaija ku lundyo lwa Yehova Leza kufika ne paāmubikikile bu Mulopwe wa kuludika ntanda yonso. (Bahebelu 10:12, 13) Pano Yesu uludikanga bu Mulopwe momwa mūlu, kadi balondi bandi basapulanga ino myanda miyampe ntanda yonso.​—Tanga Danyele 7:13, 14; Mateo 24:14.

Panopano, Yesu usa kwingidija lupusa lwandi lwa Bulopwe mwanda wa kutalula masusu onso ne boba bealengeja bene. Bonso batamija lwitabijo mudi Yesu na kumukōkela bakamonanga būmi bwa nyeke mu paladisa pano pa ntanda.​—Tanga Ñimbo ya Mitōto 37:9-11.