Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Myanda Miyampe Itamba Kudi Leza!

 KIFUNDWA 5

Lelo Leza Udi na Mpango’ka Itala Ino Ntanda?

Lelo Leza Udi na Mpango’ka Itala Ino Ntanda?

1. Mwanda waka Leza wāpangile ino ntanda?

Yehova i mupe bana-balume ne bana-bakaji ino ntanda. Ntanda i kīkalo kyetu. Nanshi, mwana-mulume ne mwana-mukaji umbajinji, ba Adama ne Eva, kebāpangilwepo mwanda wa kukayuja mūlu—mūlu mudi kala Leza ne bamwikeulu. (Yoba 38:4, 7) Inoko Leza, wātūdile muntu umbajinji mu paladisa ya dyangi itwa bu Edena. (Ngalwilo 2:15-17) Yehova wāmupele aye pamo ne bana bandi dyese dya kwikala na būmi bwa kubulwa mfulo pano pa ntanda.Tanga Mitōto 37:29; 115:16.

Ku ngalwilo, budimi bwa Edena kete yo yādi paladisa. Ba mulume ne mukaji babajinji bādi ba kubutula bana ne kuyuja ntanda. Mwenda mafuku, bādi ba kunekenya ntanda yonso ne kwiyalamuna ke paladisa. (Ngalwilo 1:28) Ino nshi keikonakanibwapo nansha dimo. Ikashadidila bu kikalo kya muzo wa muntu.Tanga Mitōto 104:5.

2. Mwanda waka dyalelo ntanda ke paladisapo?

Ba Adama ne Eva bātombokele, kadi Yehova wēbapangila panja pa budimi. Paladisa yājimina, kadi kekudipo muntu wābwenye kwiijokeja. Bible unena’mba: “Panopanshi i papebwe mu dikasa dya mubi.”—Yoba 9:24; Tanga Ngalwilo 3:23, 24.

Le Yehova wālekele mpango yandi imbajinjibajinji itala bantu? Mhm! Aye i Mwinē Bukomo Bonso. Kakankalwangapo. (Isaya 45:18) Ukajokeja bantu ku būmi bwaādi wibasakila.Tanga Mitōto 37:11, 34.

3. Le Paladisa ikajokejibwa muswelo’ka?

Paladisa ikajokejibwa pano pa ntanda’nka shi Yesu kaludika bu Mulopwe utongelwe na Leza. Ku divita ditwa bu Amakedona, Yesu ukendeja bamwikeulu ba Leza ne konakanya  balwana na Leza bonso. Kupwa Yesu ukakuta Satana mu kifungo mu bula bwa myaka 1 000. Bantu ba Leza bakapanda ku bonakani, mwanda Yesu ukebendeja ne kwibakinga. Bakamona būmi bwa nyeke mu Paladisa pano pa ntanda.Tanga Kusokwelwa 20:1-3; 21:3, 4.

4. Le masusu akafula kitatyi’ka?

Le i kitatyi’ka kikafudija Leza bubi pano pa ntanda? Yesu wāletele ‘kiyukeno’ kilombola kufwena kwa mfulo. Ngikadilo ya ntanda dyalelo itūlanga būmi bwa bantu pa katele bulenda, kadi ilombola amba tudi ku “mvuyo ya ngikadilo ya bintu.”Tanga Mateo 24:3, 7-14, 21, 22.

Umbula bwa umbikalo wa myaka 1 000, Yesu ukafudija masusu onso. (Isaya 9:6, 7; 11:9) Kutentekela pa kwingila bu Mulopwe, Yesu ukengila ne bu Mupidishitu Mukatampe ukafundwila kulampe bubi bwa boba baswele Leza. Mu uno muswelo, Leza, kupityila kudi Yesu, ukafundula misongo, bununu, ne lufu.Tanga Isaya 25:8; 33:24.

5. Le i ani ukekala mu Paladisa īya kumeso’ku?

Ku Njibo ya Bulopwe, ukatana’ko bantu baswele Leza ne basaka kwifunda mwa kumusangeja

Bantu bakōkele Leza bo bakekala mu Paladisa. (1 Yoano 2:17) Yesu wātumine balondi bandi kukakimba bantu batūkanye ne kwibafundija bya kulonga pa kwitabijibwa na Leza. Dyalelo, Yehova uteakanyanga midiyo ne midiyo ya bantu mwa kukekadila’bo mu Paladisa pano pa ntanda. (Zefenia 2:3) Ku Njibo ya Bulopwe ya Batumoni ba Yehova, bantu befundanga’ko mwa kwikadila balume, bashabana, bakaji ne bainabana balumbuluke. Bana ne bambutwile batōtela’ko pamo, ne kwifunda muswelo wa kumwena mu myanda miyampe.Tanga Mika 4:1-4.