Enda ku bidi'mo

Enda ku ntwelelo ya bubidi

Enda ku kifunka

Batumoni ba Yehova

Kiluba

Myanda Miyampe Itamba Kudi Leza!

 KIFUNDWA 10

Le Ukayuka Namani Mutōtelo wa Bine?

Le Ukayuka Namani Mutōtelo wa Bine?

1. Lelo kudi enka kipwilo kimo kete kya bine?

“Dyumukai ne [bapolofeto] ba mabela.” —MATEO 7:15.

Yesu wāfundije balondi bandi enka mutōtelo umo kete, ke mutōtelo wa bine kadi. Udi bwa kashinda katwala ku būmi bwa nyeke. Yesu wānene amba: “Ba kwidisokola bene i batyetye.” (Mateo 7:14) Leza witabijanga mutōtelo wimanine enka pa Kinenwa kyandi kya binebine. Batōtyi bonso ba bine badi enka mu kipwilo kimo.Tanga Yoano 4:23, 24; 14:6; Efisesa 4:4, 5.

2. Le i bika byānene Yesu pa bitala Bene Kidishitu ba bubela?

“Aku banena’mba: Tuyūkile Leza; kadi bamupela ku mīngilo yabo.”TETUSA 1:16.

Yesu wādyumwine amba bapolofeto ba bubela bakasubija bwine Kidishitu. Bano bapolofeto ba bubela bemwekejanga bu batōtyi ba bine. Bipwilo byabo bītelanga bu bya bwine Kidishitu. Inoko ukokeja kuyuka bano bantu mwine mobekadile. Namani? Enka mutōtelo wa bine o ulupula bwine Kidishitu bwa bine buyukena ku ngikadila ne bilongwa byabo.Tanga Mateo 7:13-23.

3. Le ukayuka namani batōtyi ba bine?

Tala bino biyukeno bitano:

  • Batōtyi ba bine balēmekele Bible amba i Kinenwa kya Leza. Baloñanga bukomo bwa kulonda misoñanya idi’mo. O mwanda kipwilo kya bine i kishile na bipwilo bikwabo bimanine pa milangwe ya bantu. (Mateo 15:7-9) Batōtyi ba bine kebafundijangapo  bintu bishile na byobalonga.Tanga Yoano 17:17; 2 Temote 3:16, 17.

  • Balondi ba bine ba Yesu balēmekele dijina dya Leza, Yehova. Yesu wādi ulēmekele dijina dya Leza ne kwidiyukanya. Wākweshe bantu bayuke Leza, kadi wēbafundija balombe amba dijina dya Leza dipandulwe. (Matthew 6:9) Mu kibundi kyenu, le i kipwilo’ka kiyukanya dijina dya Leza?Tanga Yoano 17:26; Loma 10:13, 14.

  • Bene Kidishitu ba bine basapulanga Bulopwe bwa Leza. Leza wātumine Yesu akasapule myanda miyampe ya Bulopwe. Bulopwe bwa Leza lo lukulupilo lumo kete ku muzo wa muntu. Yesu wāendelele na kwibusapula kufika’nka ne difuku dyaāfwile. (Luka 4:43; 8:1; 23:42, 43) Kadi wānene amba balondi bandi nabo bafwaninwe kwibusapula. Shi ubamone muntu wakufwena mwisambile nandi pa Bulopwe bwa Leza, le molangila ukokeja kwikala wa mu kipwilo’ka?Tanga Mateo 24:14.

  • Balondi ba Yesu kebekujangapo mu ino ntanda mibi. Ukebayukila ku kubulwa kwikuja mu ñuma ya politike ne tubila. (Yoano 17:16; 18:36) Kadi kebeulangapo bilongwa ne ngikadila imbi ya ino ntanda.Tanga Yakoba 4:4.

  • Bene Kidishitu ba bine badi na buswe bukatampe umbukata mwabo. I befunde mu Kinenwa kya Leza kulēmeka bantu ba tubila tonso. Nansha bipwilo bya bubela byobyendelela kukwatakanya bininge mavita a mizo, batōtyi ba bine abo bapelanga kukwatakanya’o. (Mika 4:1-3) Bene Kidishitu ba bine bengidijanga kitatyi kyabo ne lupeto mwanda wa kukwasha ne kukankamika bakwabo, mwino mpika.Tanga Yoano 13:34, 35; 1 Yoano 4:20.

4. Le pano ubwanya kujingulula kipwilo kya bine?

Le i kipwilo’ka kimaninanga’nka pa Kinenwa kya Leza mu byonso byokifundija, kilēmeka dijina dya Leza, ne kusapula Bulopwe bwa Leza bu lo lukulupilo lumo kete ku bantu? Le i bāni badi na buswe bwa bine ne bapela kwikuja mu mavita? Nenanga molangila, a?Tanga 1 Yoano 3:10-12.