Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIPINDI 12

I Muswelo’ka Okokeja Kufwena Kudi Leza?

I Muswelo’ka Okokeja Kufwena Kudi Leza?

1. Le Leza wivwananga milombelo yonso?

Leza wita bantu ba miswelo yonso bamufwene kupityila ku milombelo. (Ñimbo ya Mitōto 65:2) Inoko, kevwanangapo nansha kwitabija milombelo yonso. Kimfwa kevwanangapo milombelo ya muntu ususula wandi mukaji. (1 Petelo 3:7) Kadi kitatyi kyāendelele bene Isalela’nka na kulonga bibi, Leza wāpelele kwivwana milombelo yabo. Bine, milombelo i dyese. Ne kadi, Leza ukokeja kwitabija milombelo ya bankuma-bibi shi abesāsa.​—Tanga Isaya 1:15; 55:7.

Tala video Le Leza Wivwananga Milombelo Yonso?

2. I muswelo’ka otufwaninwe kulombela?

Milombelo i kipindi kya butōtyi bwetu, nanshi tufwaninwe kulombela enka kudi Umpangi wetu, Yehova. (Mateo 4:10; 6:9) Kadi, byotudi ba kubulwa kubwaninina, tufwaninwe kulombela mu dijina dya Yesu, mwanda wāfwidile bubi bwetu. (Yoano 14:6) Yehova kasakengapo tulombele na kupituluka ku mutwe milombelo nansha na kutanga milombelo milembe pantu. Usaka tulombe milombelo itamba ku mutyima.​—Tanga Mateo 6:7; Fidipai 4:6, 7.

Umpangi wetu ubwanya kwivwana nansha ke milombelo ya mundamunda. (1 Samwele 1:12, 13) Witwita tumulombe kitatyi kyo-kyonso, kimfwa pa kubūka nansha pa kulāla, pa kudya, ne kitatyi kyotutanwa na makambakano.​—Tanga Ñimbo ya Mitōto 55:22; Mateo 15:36.

3. Mwanda waka bene Kidishitu bapwilanga?

Kufwena kudi Leza ke kupēlangapo mwanda tudi mu bukata mwa bantu babudilwe lwitabijo mudi Leza ne bafutulula mulao wandi wa kuleta ndoe pano pa ntanda. (2 Temote 3:1, 4; 2 Petelo 3:3, 13) O mwanda tusakilwa kwikankamika na kwibungila pamo na banabetu mu lwitabijo.​—Tanga Bahebelu 10:24, 25.

 Kupwila na bantu basenswe Leza kwitukwashanga tumufwene pabwipi. Kupwila kwa Batumoni ba Yehova i mukenga muyampe wa kukankamikwa na lwitabijo lwa bakwabo.​—Tanga Loma 1:11, 12.

4. I muswelo’ka okokeja kufwena kudi Leza?

Ukokeja kufwena kudi Leza na kulangulukila pa byobya byowefundile mu Kinenwa kyandi. Langulukila pa byalonga, pa madingi, ne pa milao yandi. Kulanguluka na katentekeji kutamijanga mutyima wa kufwija’ko Leza pa buswe ne tunangu twandi.​—Tanga Yoshua 1:8; Ñimbo ya Mitōto 1:1-3.

Ukokeja kufwena kudi Leza enka shi umukulupile, ne shi umwitabije. Inoko lwitabijo ludi pamo bwa kintu kyūmi kilomba kudishibwa. Ufwaninwe kudisha lwitabijo lobe kitatyi ne kitatyi na kutala bine bikulengeje witabije.​—Tanga Mateo 4:4; Bahebelu 11:1, 6.

5. Le i bika byokamwena mu kufwena Leza?

Yehova ulamanga boba bamusenswe. Ubwanya kwibakinga ku kintu kyonso kikokeja kōna lwitabijo ne lukulupilo lwabo lwa būmi bwa nyeke. (Ñimbo ya Mitōto 91:1, 2, 7-10) Witudyumunanga ku mwiendelejo ōna būmi ne nsangaji yetu. Yehova witufundijanga mwa kwikadila na būmi bulumbuluke.​—Tanga Ñimbo ya Mitōto 73:27, 28; Yakoba 4:4, 8.