Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 KIFUNDWA 9

I Muswelo’ka Omukokeja Kwikala na Nsangaji mu Kisaka?

I Muswelo’ka Omukokeja Kwikala na Nsangaji mu Kisaka?

1. Mwanda waka busongi i bwa kamweno pa kwikala na nsangaji mu kisaka?

Myanda miyampe itambanga kudi Yehova, Leza wa nsangaji, usakila bisaka byonso bikale na nsangaji. (1 Temote 1:11) Ye wātūdile’ko busongi. Kwisonga mungya bijila kudi na mvubu pa kwikala na nsangaji mu kisaka, mwanda kupānanga kifuko kiyampe kulelela’mo bana. Bene Kidishitu bafwaninwe kulēmeka bijila bya mu yabo ntanda bya kwandikija busongi.Tanga Luka 2:1, 4, 5.

Lelo Leza umwene busongi namani? Usakanga bwikale bu kijimba kya nyeke kikutyīle umbumo mwana-mulume ne mwana-mukaji. Yehova usaka ba mulume ne mukaji belamate. (Bahebelu 13:4) Ushikilwe dilubu. (Malaki 2:16) Witabije bene Kidishitu kwilubula ne kusonga nansha kusongwa monka enka shi umo walonga makoji.Tanga Mateo 19:3-6, 9.

2. Le ba mulume ne mukaji bafwaninwe kwimona namani?

Yehova wāpangile mwana-mulume ne mwana-mukaji mwanda wa kwikwasha mu mingilo ya busongi. (Ngalwilo 2:18) Mulume byadi mutwe wa kisaka, ufwaninwe kwendeja kisaka kyandi ne kwikipa byokisakilwa ku ngitu ne kwikifundija myanda ya Leza. Ufwaninwe kuswa mukajandi kwampikwa kwisakila. Ba mulume ne mukaji bafwaninwe kwisanswa ne kwilēmeka abo bonso. Balume ne bakaji bonso byokebabwanininepo, nanshi kwifunda kulekela kyo kintu kya mvubu pa kumona nsangaji mu busongi.Tanga Efisesa 4:31, 32; 5:22-25, 33; 1 Petelo 3:7.

3. Shi busongi i bwampikwa nsangaji, le i kwibunyema?

Shi mubatanwa na makambakano mu busongi bwenu, banwe bonso mufwaninwe kwielela’ko mwanda wa kwilongela  bintu na buswe. (1 Kodinda 13:4, 5) Kinenwa kya Leza kekisoñanyangapo kusansana amba o muswelo wa kupwija makambakano afikilanga bonso mu busongi, mhm.Tanga 1 Kodinda 7:10-13.

4. Banwe bana, le Leza wimusakila bika?

Yehova wimusakila mwikale na nsangaji. Wimupanga madingi mayampe mpata amba musangele bunkasampe bwenu. Usakanga mumwene mu tunangu ne mu bwino bwa bambutwile benu. (Kolose 3:20) Kadi Yehova usaka mumone nsangaji ya kwingidila Umpangi wenu ne wandi Mwana.Tanga Musapudi 11:9–12:1; Mateo 19:13-15; 21:15, 16.

5. A bambutwile, i muswelo’ka ukatana benu bana nsangaji?

Mufwaninwe kwingila bininge mwanda wa kupa benu bana bidibwa, mwa kulāla, ne bivwalwa. (1 Temote 5:8) Ino pa kusaka bana batane nsangaji, mufwaninwe kadi kwibafundija kusanswa Leza ne kumwiula. (Efisesa 6:4) Kimfwa kyenu kya kuswa Leza kikakunka nakampata mityima ya benu bana. Shi byomwibafundija bimanine pa Kinenwa kya Leza, nabya bikalamuna benu bana ke balanga biyampe.Tanga Kupituluka 6:4-7; Nkindi 22:6.

Bana bakamwena’mo shi mwibakankamika ne kwibatendela. Basakilwa kadi kulemununwa ne kudingilwa. Kwibafundija namino kukebakinga ku mwiendelejo ukokeja kwibonena nsangaji. (Nkindi 22:15) Shako, kemufwaninwepo kwibalemununa na kasumalomo nansha na nketekete.Tanga Kolose 3:21.

Batumoni ba Yehova ke balupule mabuku mavule alembelwe mwanda wa kukwasha bambutwile ne bana. Ano mabuku emanine pa Bible.Tanga Mitōto 19:7, 11.