Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 116

Muswelo Otukokeja Kwikala na Būmi bwa Nyeke

Muswelo Otukokeja Kwikala na Būmi bwa Nyeke

LELO ukokeja kulombola bitanga mwanuke mwana-mukaji ne balunda nandi bano? Bine, i enka dino dibuku dyotanga’di—Dibuku Dyami dya Mānga ya mu Bible. Kadi batañanga’nka mānga yodi’poi—“Muswelo Otukokeja Kwikala na Būmi bwa Nyeke.”

Le uyukile byobafunda? Dibajinji, amba tufwaninwe kuyuka Yehova ne wandi Mwana Yesu shi tusaka kwikala na būmi bwa nyeke. Bible unena’mba: ‘Muswelo wa kwikala na būmi bwa nyeke i uno. Mwifundei kuyuka Leza wa bine, ne Yesu Kidishitu wandi Mwana waātumine pano pa ntanda.’

Tukokeja kwifunda kuyuka Yehova Leza ne wandi Mwana Yesu muswelo’ka? Muswelo umo bidi, i kutanga Dibuku Dyami dya Mānga ya mu Bible tamba ku ngalwilo kufika ne ku mfulo. I disambile pa myanda mivule itala Yehova ne Yesu, mwene i amo? Kadi i dilombole bintu bivule byobālongele ne byobakalonga. Ino tufwaninwe kulonga bivule kupita’ko enka kutanga dino dibuku.

Mwene umwene dibuku dikwabo dilēle panshi’di? I Bible. Bine, ikala na muntu wa kukutangila bipindi bya mu Bible bimanine’po mānga ya dino dibuku. Bible witulombolanga myanda yonso itusakila mwanda wa kwingidila Yehova umboloke ne kukamona būmi bwa nyeke. Nanshi twiibidijei kwifunda divule Bible.

Ino kwifunda’tu kuyuka Yehova Leza ne Yesu Kidishitu kekubwenepo. Tukokeja kwikala na buyuki buvule bwa myanda ibatala ne bwa bufundiji bwabo, ino kumona būmi bwa nyeke mpika. Le uyukile bisakibwa bikwabo?

Kadi tufwaninwe kwikala na būmi bukwatañene na byotwifunda. Le ukivulukile Yudasa Isakadiota? Wādi mu bantu 12 bātongelwe na Yesu bu batumibwa bandi. Yudasa wādi na buyuki buvule butala padi Yehova ne Yesu. Ino i kika kyāmufikīle? Kitatyi kityetye kupita’po, wāikele na kwisakila ne kwaba wāaba Yesu ku balwana nandi ku bityele 30 bya ndalama. Nanshi Yudasa kakatambulangapo būmi bwa nyeke.

Lelo ukivulukile Ngehazi, mwana-mulume otwēfundile mu Mānga ya 69? Wāsakile kuyata bisandi ne lupeto lwa bene. Penepo wākabepa mwanda wa kwibiyata. Ino Yehova wāmupele mfuto. Ne batwe netu tukapebwa mfuto shi ketukōkelepo ku bijila byandi.

Ino kudi bantu bavule bayampe bāingidile Yehova na kikōkeji. Twikalei mobādi bekadile, mwene i amo? Nkasampe Samwele i kimfwa kiyampe kya kulonda. Vuluka, enka na motwāmwenine mu Mānga ya 55, wāshilwile kwingidila Yehova mu tabenakulo aye na myaka iná nansha itano kete. Nanshi bwanuke bobe kebudipo na mwanda, kadi kudipo mwanuke bininge ukokeja kukomenwa kwingidila Yehova.

Bine, muntu otusaka kulonda batwe bonso i Yesu Kidishitu. Tala Mānga ya 87, nansha byaādi mwanuke, wāshikete mu tempelo usapwila bakwabo myanda ya Shandi wa mūlu. Tulondei kimfwa kyandi. Tusapwilei bantu bavule myanda itala Yehova Leza wa kutendelwa ne wandi Mwana, Yesu Kidishitu. Shi tulonge bino bintu, nankyo tukekala nyeke pano pa ntanda mu paladisa impya ya Leza.

Yoano 17:3; Mitōto 145:1-21.