MWANA-MULUME ufukatyile’u i Shitevani. I mwanā bwanga wa kikōkeji wa Yesu. Ino tala byamufikila pano! Bano bantu bamwasanga mabwe makatampe. Le kyobamushikilwe ne kulonga kino kintu kibi nenki i kika? Tutalei.

Leza ukwashanga Shitevani alonge bingelengele bitendelwa. Bano bantu abebishikwe, penepo kebapatana nandi pa mwanda utala kufundija bantu bubinebine. Ino Leza wape Shitevani tunangu tuvule, penepo Shitevani walombola’mba bano bantu bafundijanga bintu bya bubela. Kino kibebalobeja bininge. Penepo abamukwata ne kwita bantu bamubepele bya bubela.

Kitobo mukatampe waipangula Shitevani’mba: ‘Lelo bino bintu i bya bine?’ Shitevani walondolola na kunena mwisambo muyampe wa mu Bible. Ku mfulo kwao, wanena bantu babi mobāshikilwe bapolofeto ba Yehova tamba kala. Kupwa wanena’mba: ‘Nenu mudi bwa bano bantu. Mwaipaile Yesu mwingidi wa Leza ne kukōkela bijila bya Leza mpika.’

Kino kibalobeja bakulumpe ba bipwilo kashā! Abesume meno na bukalabale. Kupwa Shitevani watale mūlu kanena’mba: ‘Talai! Namone Yesu wimene mūlu ku lundyo lwa Leza.’ Pa kino, bano bantu abejike mu matwi ne kuteukila Shitevani. Abamukwata kebenda nandi panja pa kibundi.

Kufika kuno, abavula bisandi byabo abape’byo nkasampe Solo ebilame. Le umwene Solo? Kupwa bantu bamo abashilula kwasa Shitevani mabwe. Penepo Shitevani wafukata, enka na momwenine’mu, kalombela’mba: ‘Yehova kokebapa mfuto pa mwanda wa kino kintu kibi.’ Wayuka’mba bamo i bongolwe na bakulumpe ba bipwilo. Kupwa Shitevani wafu.

Shi muntu wakulubila, lelo umujokelejanga kinongo nansha ulombanga Leza amusanshije? Shitevani ne Yesu kebālongelepo nankyo. Bādi biyampe ne na bantu bēbalongēle bibi bene. Tutompei kulonda kimfwa kyabo.

Bilongwa 6:8-15; 7:1-60.