Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 109

Petelo kwa Konilusa

Petelo kwa Konilusa

WIMENE’U i mutumibwa Petelo, ne badi kunyuma kwandi’ba i balunda nandi bamobamo. Ino mwanda waka yeu mwana-mulume wivukwila kudi Petelo? Lelo ufwaninwe kwikilonga? Le umuyukile?

Mwana-mulume’u i Konilusa. I mukata wa basola Mwine Loma. Konilusa kayukilepo Petelo, inoko bamulombwele amwite ku njibo yandi. Tutalei mobyaikadile.

Balondi ba Yesu babajinji badi Bayuda, ino Konilusa ke Muyudapo. Eyo, usenswe Leza ne kulombela kwadi, kadi ulongelanga bantu bintu biyampe bivule. Ebiya, kyolwa kimo mwikeulu wamumwekela kanena’mba: ‘Leza wakutōkelwa, pano ukalondolola ku milombelo yobe. Tuma bantu bamo bende kudi muntu witwa bu Petelo. Udi mu Yopa mu njibo ya Shimona, ushikatanga dya ku dijiba.’

Ponka’po Konilusa watume bantu bakakimbe Petelo. Ke dya kesha, bantu pa kufika kubwipi na Yopa, Petelo wadi pa musaka wa njibo ya Shimona. Penepo Leza wamwekeja Petelo kidi bwa kisandi kīya mūlu. Mu kisandi mudi miswelo yonso ya banyema. Mungya bijila bya Leza, bano banyema badi ba disubi kudya’bo, ino diwi dibanena’mba: ‘Petelo, languka. Tapa udye.’

Petelo’mba: ‘Mhm! Nkyadile kashā kintu kya disubi.’ Ino diwi dibanena Petelo’mba: ‘Kokita kyanena Leza’mba i kitōka bu kyadisubi.’ Kibalongeka misunsa isatu. Aye Petelo ukiipangula nshintulwilo ya bino bintu, bantu batuminwe na Konilusa abafika ku njibo kebepangula Petelo.

Petelo watūka kanena’mba: ‘Omukimba i ami. Le i kika kyomwaila?’ Bantu pa kumusapwila’mba mwikeulu wanena Konilusa akwite ku njibo yandi, Petelo waitabija kwenda nabo. Ke dya kesha, Petelo ne balunda nandi abaenda ku kapempula Konilusa mu Kesalea.

Papo Konilusa i mubunge babutule ne balunda nandi ba pa mutyima. Petelo pa kwiya, Konilusa wamusambakana. Wapone panshi kaevukwila ku maulu a Petelo, enka momwenine’mu. Ino Petelo wanena’mba: ‘Imana; ami nami ne muntu bitupu.’ I amo, Bible unenanga’mba i kibi kwivukwila ne kutōta muntu. Tufwaninwe kutōta’nka Yehova kete.

Papo Petelo kasapwila bantu bebungile’ba. Kanena’mba: ‘Namone’mba Leza witabije muntu yense umwingidila.’ Aye ukinena, Leza watume mushipiditu sandu, bantu abanena ndimi mishileshile. Kino kibatulumuna bana ba bwanga Bayuda baile na Petelo, mwanda badi balanga’mba Leza witabije’nka Bayuda kete. Nanshi kino kibebafundija’mba Leza kamonengapo bantu bu bayampe nansha bu ba mvubu amba mwandapo i ba ku lukoba kampanda nansha kansangwa. Mwene kino i kintu kyotufwaninwe kuvuluka batwe bonso?