Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 108

Mu Dishinda Wenda ku Damakasa

Mu Dishinda Wenda ku Damakasa

UYUKILE yeu ulēle panshi’u? I Solo. Vuluka, i yewa wadi ulama bisandi bya bantu baashile Shitevani mabwe. Tala kike kitema’ki! I kika kyamumwekela?

Kupwa lufu lwa Shitevani, Solo waanza kupangapanga balondi ba Yesu mwanda wa kwibasusula. Waenda njibo na njibo wibatambija ne kwibela mu kifungo. Bana ba bwanga bavule abanyemena mu bibundi bikwabo ne kusapula’mo “myanda miyampe.” Ino Solo wakakimbe balondi ba Yesu ne ku bibundi bikwabo kwine. Pano wendanga ku Damakasa. Ino, ukidi mwishinda, kubalupuka kino kintu kitulumukwa:

Ponka’po kubalupuka kike mu makumbi, kibajokoloka Solo. Penepo wapone panshi, enka na motumwenine pano’mu. Kupwa diwi dibalupuka’mo amba: ‘Solo, Solo! Le i kika kyounsuswila?’ Bantu badi na Solo abamone kike ne kuteja diwi, ino kwivwana byobanena mpika.

Solo waipangula’mba: ‘Mfumwami, le wi ani?’

Diwi dibanena’mba: ‘Ne Yesu oenda ususula.’ Yesu wanena nenki mwanda pasusula Solo balondi bandi, Yesu wimonanga bu aye obasusula.

Penepo Solo wāipangula’mba: ‘Mfumwami, le nonge kika?’

Yesu wanena’mba: ‘Būka wende ku Damakasa. Ye kobakakulombola kya kulonga.’ Solo pa kubūka, wapūtula meso, ino kumona kintu mpika. Ke mpofu! Penepo bantu badi nabo abamukwata ku makasa kebamutwala ku Damakasa.

Yesu wanena mwanā bwanga umo mu Damakasa’mba: ‘Ananaisa, languka. Enda ku mukenza witwa bu Boloke. Kepangule muntu obeta bu Solo ku njibo ya Yudasa. Namutonge kwikala mwingidi wami wa pa bula.’

Ananaisa wakōkela. Pa kwimona na Solo, wamutenteka maboko kanena’mba: ‘Mfumwetu wantume’mba umone monka ne kuyulwa mushipiditu sandu.’ Ponka’po, mu meso a Solo mubapone bidi bwa bitato, penepo wamone.

Solo waingidijibwa bikatampe mwanda wa kusapwila bantu ba mizo mivule. Wayukana bu mutumibwa Polo, otukefundila’po bintu bivule. Dibajinji bidi, tutalei Leza byaatuma Petelo kulonga.

Bilongwa 8:1-4; 9:1-20; 22:6-16; 26:8-20.