Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 106

Abalupulwa mu Kifungo

Abalupulwa mu Kifungo

TALA uno mwikeulu ushitula mulango wa ku kifungo. Bantu balupula’ba i batumibwa ba Yesu. Tutalei bidi kyobebakutyile.

Padi kepaijije tamba mushipiditu sandu upungulwilwa pa bana ba bwanga ba Yesu. Tala mobyafikila: Kyolwa kimo, ba Petelo ne Yoano abaenda ku tempelo mu Yelusalema. Kubwipi na kibelo, kudi mwana-mulume kisheta tamba ubutulwa. Bantu bamuletanga kuno mwanda wa alombe lupeto ku bantu batwela mu tempelo. Aye pa kumona ba Petelo ne Yoano, webalombe bamupe’ko kantu. Batumibwa basa kulonga bika?

Abaimana kebatale mwana-mulume mulanda’wa. Kupwa Petelo wanena’mba: ‘Nkidipo na lupeto, inoko nsa kukupa kyondi nakyo. Mu dijina dya Yesu, imana wende!’ Penepo Petelo wamukwata na kuboko kulume, ponka’po waimana kaenda. Bantu pa kumona kino, abatulumuka ne kusangela kino kingelengele kya kutendelwa.

Petelo kanena’mba: ‘Tubalonga kino kingelengele ku bukomo bwa Leza wasangwile Yesu mu lufu.’ Aye ne Yoano bakisamba, bakulumpe ba bipwilo bamo abaiya. Abalobe bininge mwanda ba Petelo ne Yoano basapwilanga bantu myanda ya lusangukilo lwa Yesu. Penepo abebakwata ne kwibela mu kifungo.

Kesha, bakulumpe ba bipwilo abakute kidye kikatampe. Abatweja Petelo, Yoano ne muntu obakomeje’wa. Bakulumpe abaipangula’mba: ‘I bukomo’ka bomwalongele nabo kino kingelengele?’

Petelo webalombola’mba i na bukomo bwa Leza wasangwile Yesu mu lufu. Babitobo abakomenwa kya kulonga, mwa kunenena’tu amba kino kingelengele kekyalongekelepo mubakoma. Ebiya abanena batumibwa baleke kusapula myanda ya Yesu, penepo abebalekelela.

Mafuku pa kupita, batumibwa abaendelela na kusapula myanda ya Yesu ne kubelula babela. Myanda ya bino bingelengele ibatumbe. Kupwa ne bibumbo bya mu bibundi bya mufula mwa Yelusalema bibaletela batumibwa babela ba kukomeja. Kino kibakwatyija bakulumpe ba bipwilo mukao, abakwata batumibwa ne kwibela mu kifungo. Inoko kebejije’mopo.

Mwikeulu wa Leza waiya kushitula mulango wa ku kifungo bufuku, enka na momwenine pano’mu. Mwikeulu wanena’mba: ‘Endai mukemane mu tempelo, kadi endelelai na kusapwila bantu.’ Ke lubanga, bakulumpe ba bipwilo pa kutuma bantu ba kukatala batumibwa ku kifungo, abebatana bende. Kupwa bantu abebatana bafundija mu tempelo, penepo abakebatūla ku njibo ya Kidye Kikatampe.

Bakulumpe ba bipwilo abanena’mba: ‘Twemukomene’mba, kemwakifundija nansha dimo myanda ya Yesu. Ino mubasambakanya Yelusalema na lufundijo lwenu.’ Kupwa batumibwa abalondolola’mba: ‘Tufwaninwe kukōkela Leza pamo bwa mbikavu kupita’ko bantu.’ Kupwa abaendelela na kufundija “myanda miyampe.” Mwene kino i kimfwa kiyampe kyotufwaninwe kulonda?

Bilongwa shapita 3 ku 5.