Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 92

Yesu Usangula Bafwe

Yesu Usangula Bafwe

UNO mwanuke mwana-mukaji’u udi na myaka 12. Yesu umukwete ku kuboko, kadi ba inandi ne shandi bemene kubwipi nandi. Le uyukile byobasangadile? Tutalei bidi.

Shandya mwanuke’u i muntu mulēme witwa bu Yelusa. Difuku dimo wandi mwana mwana-mukaji wabelele, abamulādika pa butanda. Ino kwivwana biyampe mpika. Misongo ibaningila’ko. Yelusa ne wandi mukaji kebatompola, mwanda bimweka bu mwana usa kufwa. Kadi i mwana umo kete. Kupwa Yelusa wakakimbe Yesu. Waivwene besambila pa bingelengele bya Yesu.

Yelusa watana Yesu mujokolokwe na kibumbo kya bantu. Ino Yelusa wepenya mu kibumbo kaponena ku maulu a Yesu. Kanena’mba: ‘Wami mwana ubela bininge.’ Kupwa kalombe amba: ‘Nakwisāshila, iya ukambelwile’ye.’ Yesu waitabija kwenda.

Abo pa kwenda, kibumbo kibamufwena bininge. Ponka’po Yesu waimana. Kaipangula’mba: ‘I ani wauntenga?’ Yesu waivwana bukomo bwamutyepa’mo, o mwanda wayuka’mba kudi wamutenga. Ino le i ani? I mwana-mukaji wadi na misongo ke milāle myaka 12. Waiya kutenga ku kisandi kya Yesu, penepo wakoma!

Kino kibasangaja Yelusa mwanda wamone’mba, kudi Yesu, kukomeja muntu i makayo. Kupwa kubaiya mukendi. Kanena Yelusa’mba: ‘Kokakambakanya Yesu bitupu. Obe mwana wafu.’ Yesu waivwana, kupwa wanena Yelusa’mba: ‘Kokitompola, usa kukoma.’

Abo pa kutwela mu njibo ya Yelusa, abatana bantu badila bayoyokota. Ino Yesu webanena’mba: ‘Kemwakidilai. Mwana kafwilepo. Ulēle bitupu.’ Ino abasepa ne kuzawila Yesu, mwanda bayukile’mba i mufwe.

Kupwa Yesu watwela na shandya mwana ne inandi ne batumibwa basatu mu kyumba mudi mwana. Wamukwata ku kuboko kanena’mba: ‘Languka!’ Ponka’po waikala mūmi, enka na momwenine’mu. Penepo wabuka kaenda! O mwanda inandi ne shandi i basangale bininge.

Uno ke muntupo umbajinji kusangulwa na Yesu. Umbajinji utelelwe mu Bible i mwanā wa kishala wa mu kibundi kya Neni. Kupwa Yesu wasangwile ne Lazalasa, mwanabo na Madia ne Mata. Pakabikikwa Yesu na Leza, ukasangulanga bantu bavulevule. Mwene tukokeja kusangela uno mwanda?