YEU i Yesu udi ku Lūlu lwa Impafu. Bantu baná badi nabo’ba i batumibwa bandi. I bana na bana, Andele na Petelo, Yakoba nandi na Yoano. Yomwene dya kokwa’ya i tempelo ya Leza idi mu Yelusalema.

Kepadi mafuku abidi kasha Yesu ukanda pa mpunda mwana mu Yelusalema. Pano ke mu Dya Bubidi. Lubanga bwē Yesu wadi ku tempelo. Babitobo badi abatompa kukwata Yesu konka mwanda wa kumwipaya. Ino badi abatyina mwanda bantu basenswe Yesu.

Yesu wadi waite bano bakulumpe ba bipwilo’mba: ‘Banwe banyoka ne bana ba banyoka!’ Kupwa Yesu wanena’mba Leza ukebapa mfuto mwanda wa bibi byonso byobalongele. Kupwa Yesu waiya ku Lūlu lwa Impafu, penepo bano batumibwa baná abashilula kumwipangula bipangujo. Le uyukile byobepangula Yesu?

Batumibwa bepangulanga bintu bya mafuku a kumeso. Bayukile’mba Yesu ukapwija bubi bonso budi pa ntanda. Ino basakanga kuyuka i kitatyi’ka kyakapwija’bo. I kitatyi’ka kikāya monka Yesu kuludika bu Mulopwe?

Yesu uyukile’mba balondi bandi kebakamumonepo pakāya dikwabo. Mwanda ukekalanga mūlu, kadi kebakabwanyapo kumumona’mo. Ino Yesu walombola batumibwa bintu bikamweka pano pa ntanda pakaludika bu Mulopwe momwa mūlu. Le i bintu’ka bimobimo?

Yesu wanena’mba, kukekala mavita makatampe, bantu bavule bakabela ne kufwa nzala, butapani bukabipila’ko, kadi kukekala bintenshi bikatampe bya ntanda. Kadi Yesu wanena’mba myanda miyampe ya bulopwe bwa Leza ikasapulwa konsokonso pano pa ntanda. Lelo twi bamone kufikidila kwa bino bintu mu ano etu mafuku? Bine twi bebimone! Nanshi tuyukei’mba Yesu ke mubikale mūlu. Kadi ukapwija panopano bubi bonso pano pa ntanda.

Mateo 21:46; 23:1-39; 24:1-14; Mako 13:3-10.