Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 100

Yesu Umbudimi

Yesu Umbudimi

KUPWA kutamba mu njibo ya pangala, Yesu ne batumibwa bandi abaenda ku budimi bwa Ngesemani. Badi bāya’ko kala misunsa mivule. Pano Yesu webanena bakeshe ne kulombela. Kupwa waenda kinselensele, wakuvumana mpala panshi, kalombela.

Kupwa Yesu waiya kudi batumibwa. Molangila, baloñanga bika? Badi mu tulo! Yesu webanena misunsa isatu’mba keshai. Ino, kitatyi kyonso kyajoka, wibatana balēle. Yesu webanena pa kujoka musunsa wa mfulo’mba: ‘Kyomulādila mu kitatyi kidi bwa kino i kika? Kitatyi kya ami kupānwa ku balwana nami kibabwana.’

Ponka’po abaivwanika mawi a bantu bavule. Tala! Bantu abaiya na bipete ne impini! Baselele ne bimuni bya kwimunikila. Abo pa kufwena, muntu umo watambe umbukata mwabo ne kulumba padi Yesu. Wamufifye, enka momwena pano’mu. Uno muntu i Yudasa Isakadiota! Mwanda waka wafifye Yesu?

Yesu waipangula’mba: ‘A Yudasa, lelo koungaba na kumfifya?’ Bine, kuno kufifya i kiyukeno. I kiyukeno kilombola bantu badi na Yudasa’mba, Yesu omusaka au keye. Kupwa balwana na Yesu abamutetukila. Ino Petelo kebalekelepo bakwate Yesu pampikwa kulwa. Wakulumuna kipete kyadi nakyo, watape’kyo muntu obadi befwenene nandi. Ino kipete kibatupe mutwe wa muntu kibapitula kutwi kwandi kulume. Ino Yesu watenga kutwi kwa uno muntu wekukomeja.

Yesu wanena Petelo’mba: ‘Kuja kipete pokyadi. Le kuyukilepo’mba nkokeja kulomba Tata tununu twa bamwikeulu ba kumpandija?’ Eyo, ukokeja! Ino Yesu kalombelepo Leza atume mwikeulu nansha umo, mwanda uyukile’mba kitatyi kya kumukwata balwana nandi kibabwana. Penepo webaleka bende nandi. Tutalei byafikila Yesu pano.