Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MĀNGA YA 77

Abapele Kwivukwila

Abapele Kwivukwila

UBAVULUKA bano bansongwalume basatu’ba? Eyo, i balunda na Danyele bāpelele kudya bidibwa bibi kobadi. Bene Babiloni bādi bebeta bu Shadelake, Meshake ne Abedenengo. Pano wibatale. Le kyobalekela kwivukwila ku nkishi mukatampe mulongela bantu bonso i kika? Tutalei bidi.

Ukivulukile bijila byālembele Yehova bitwa bu Mbila Dikumi? Imbajinji i ino: ‘Kokatōta leza ungi poso’nka ami.’ Bano bansongwalume abakōkela kino kijila, nansha byokidi kikomo kulonga.

Nebukaneza mulopwe wa Babiloni i mwite bantu ba bulēme bavule bāye batōte uno nkishi watūdile. Papo ke mupwe kunena bantu’mba: ‘Shi mubaivwana mawi a bimpungidi, lunsense ne byombanwa bikwabo, mufwaninwe kwivukwila ne kutōta uno nkishi wa nsahabu. Yense wa kuleka kwivukwila ne kutōta ukelwa mu nkelwa ya mudilo utēma.’

Nebukaneza pa kuyuka’mba ba Shadelake, Meshake ne Abedenengo kebevukwidilepo, wakalabala. Webetyija kwadi. Kupwa webanena monka bevukwile. Ino bansongwalume abakulupila mudi Yehova. Abasapwila Nebukaneza’mba: ‘Leza otutōta ukokeja kwitupandija. Nansha shi ketupandijepo, ketukevukwilapo ku meso a nkishi obe wa nsahabu.’

Pa kwivwana bino, Nebukaneza wayula bulobo. Nkelwa nayo byoyadi pabwipi, wanena’mba: ‘Kabijai’yo misunsa isamba-ibidi, ikabe kupita moikadilanga!’ Papo wanena basola ba mpata bakute ba Shadelake, Meshake ne Abedenengo ne kwibela mu nkelwa ya mudilo. Nkelwa yadi mikabe bininge, lubimbi lwayo lubaipaya’nka ne bana-balume ba mpata’ba bene. Lelo bansongwalume baelwa munda nabo?

Mulopwe watale mu nkelwa, ne moyo ubamukwata. Kaipangula’mba: ‘Mwene tubakute bantu basatu botwaela mu nkelwa ya mudilo?’

Bengidi abalondolola’mba: ‘Eyo, ye motwalongela.’

Nandi amba: ‘Ino namone bantu baná bendakana mu mudilo. Kebakutwepo, kadi mudilo kewibasokangapo. Kadi wa buná udi’nka bwa leza.’ Mulopwe wafwena ku kibelo kya nkelwa ya mudilo kaela lubila’mba: ‘Shadelake! Meshake! Abedenengo! Tambai’mo, banwe bengidi ba Leza Mukatakata Mwine!’

Abo pa kutamba, bonso abebatale amba kebatēmenepo. Penepo mulopwe wanena’mba: ‘Atōtwe Leza wa Shadelake, Meshake ne Abedenengo! Watume mwikeulu wandi wa kwibapandija mwanda abapele kwivukwila ne kutōta leza ye-yense poso’nka Leza wabo.’

Mwene kino ye kimfwa kya kikōkeji kudi Yehova kyotufwaninwe kulonda?